Beten

4 Long Wanem Samting?

OL MAN i save kolim dispela beten planti taim moa, winim ol narapela beten bilong ol Kristen. Dispela tok em i tru o nogat, beten em Jisas i skulim ol disaipel long en​—sampela taim ol i kolim Beten Bilong Bikpela, o Papa Bilong Mipela​—em wanpela beten planti man i no kliagut long en. Planti milion manmeri i save kolim dispela beten planti taim long olgeta de. Tasol Jisas i no laik ol man i mekim dispela beten long kain rot olsem. Olsem wanem yumi save long dispela?

Paslain liklik long kolim dispela beten, Jisas i tok: “Taim yupela i mekim prea, maski long mekim planti toktok nating.” (Matyu 6:7) Yu ting Jisas i daunim dispela tok bilong em long rot bilong kamapim wanpela beten em ol man i mas tingim long bel na kolim planti taim? Nogat, a? Jisas i skulim yumi long wanem samting yumi ken beten long en, na ol bikpela samting yumi mas tingim taim yumi beten. Orait nau yumi ken tingim ol tok em i bin mekim. Dispela beten i stap long Matyu 6:​9-13.

“Papa bilong mipela, yu stap long heven, nem bilong yu i mas i stap holi.”

Jisas i kirapim ol disaipel long tingim olsem ol i mas mekim olgeta beten i go long Papa bilong em, Jehova. Tasol yu save long as na nem bilong God i bikpela samting na dispela nem i mas i stap holi?

Long bipo yet na i kam inap long nau, ol i kamapim ol tok giaman na krungutim nem holi bilong God. Birua bilong God, Satan, i kolim Jehova olsem Man bilong giaman na tingim em yet tasol, na em i no gat rait long bosim ol samting Em i bin wokim. (Stat 3:​1-6) Planti man i wanbel wantaim Satan, na ol i skulim ol man olsem God i no save tingim yumi, em i Man nogut bilong bagarapim ol man, na ol i sakim tingting olsem em i Man Bilong Wokim olgeta samting. Sampela i bin rausim nem bilong Jehova long ol Baibel na tambuim ol man long yusim dispela nem.

Baibel i kamapim olsem God bai stretim bek ol dispela pasin i no stret. (Esekiel 39:7) Taim em i mekim olsem, em bai inapim olgeta samting yu mas kisim na pinisim olgeta hevi bilong yu. Em bai mekim olsem wanem? Ol tok Jisas nau i mekim long beten bilong em i bekim dispela askim.

“Kingdom bilong yu i mas i kam.”

Long nau, planti tisa bilong lotu i paul long Kingdom Bilong God em i wanem samting. Tasol ol man i harim tok bilong Jisas i bin save, longtaim pinis ol profet bilong God i bin tokaut long Mesaia, em Man God i bin makim bilong kisim bek ol man, em bai bosim wanpela Kingdom na senisim ol pasin i stap long dispela graun. (Aisaia 9:​6, 7; Daniel 2:44) Em bai mekim holi nem bilong God long rot bilong kamapim klia tok giaman bilong Satan na daunim Satan na ol wok bilong em. Kingdom Bilong God bai pinisim ol woa, sik, hangre, na em bai pinisim tu i dai. (Song 46:9; 72:​12-16; Aisaia 25:8; 33:24) Taim yu beten long Kingdom Bilong God i mas i kam, yu beten long olgeta dispela tok promis i mas kamap tru.

“Mipela i mas bihainim laik bilong yu long graun olsem ol i save bihainim long heven.”

Ol tok bilong Jisas i soim olsem laik bilong God bai kamap long graun wankain olsem i kamap long heven, em hap we God i stap long en. Laik bilong God i save kamap oltaim long heven; long dispela hap Pikinini Bilong God i bin pait wantaim Satan na lain bilong em na rausim ol i kam daun long graun. (KTH 12:​9-12) Namba 3 samting long dispela beten, wankain olsem 2-pela samting yumi stori pinis long en, i helpim yumi long holim klia long tingting samting i bikpela samting moa​—em laik bilong God, na i no laik bilong yumi. Dispela laik bilong God i save helpim tru olgeta samting em i bin wokim. Olsem na Jisas, em man i gutpela olgeta, em tu i tokim Papa bilong em: “Yu no ken bihainim laik bilong mi. Nogat. Yu mas bihainim laik bilong yu tasol.”​—Luk 22:42.

“Givim mipela kaikai inap long dispela de.”

Orait nau Jisas i kamapim klia olsem yumi ken beten long ol samting yumi mas kisim. I no gat rong long beten askim God long ol samting yumi mas kisim long olgeta wan wan de. Taim yumi mekim olsem, dispela i kirapim yumi long tingim olsem Jehova em Man husat “i save givim laip na win na olgeta samting long olgeta manmeri.” (Aposel 17:25) Baibel i tok em i olsem wanpela gutpela Papa husat i amamas long givim long ol pikinini bilong em ol samting ol i mas kisim. Tasol olsem gutpela Papa, em i no inap givim ol samting long ol pikinini, em ol samting inap bagarapim ol.

“Lusim ol rong bilong mipela.”

Yu bin mekim rong long God? Yu laik em i mas lusim rong bilong yu? Planti man long nau i no kliagut olsem sin em i wanpela samting nogut tru. Tasol Baibel i kamapim klia olsem sin em i as tru bilong olgeta samting nogut i save painim yumi, na em i as tru bilong kamapim indai long yumi ol manmeri. Mama i karim yumi olsem sinman, na planti taim yumi save mekim sin, na wanpela rot tasol bilong kisim laip oltaim em God i mas lusim sin bilong yumi. (Rom 3:23; 5:12; 6:23) Yumi ken amamas long kisim save long tok Baibel i mekim, olsem: “Bikpela, yu gutpela tru na yu save rausim sin bilong mipela.”​—Song 86:5.

“Kisim bek mipela long ol samting [“man,” NW] nogut.”

Yu luksave olsem em i bikpela samting long God i sambai long yu? Planti man i no bilip olsem Satan, dispela “man nogut,” em i stap tru. Tasol Jisas i bin skulim ol man olsem Satan em i stap tru, na em i kolim em “hetman i save bosim dispela graun.” (Jon 12:31; 16:11) Satan i bagarapim dispela graun em i bosim, na em i laik tru long bagarapim yu tu. Em i no laik yu kisim pasin bilong pren gut wantaim Papa bilong yu, em Jehova. (1 Pita 5:8) Tasol strong bilong Jehova i winim strong bilong Satan, na Jehova i gat laik tru long lukautim ol manmeri i laikim Em.

Dispela stori yumi mekim long ol bikpela tok bilong beten bilong Jisas i no kolim olgeta samting em yumi inap beten long en. Tingim, 1 Jon 5:14 i tokim yumi long God olsem: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi.” Olsem na yu no ken ting ol hevi bilong yu i liklik tumas na yu no laik kamapim long God.​—1 Pita 5:7.

Tasol olsem wanem? Em i bikpela samting long wanem taim na wanem hap yumi beten?