Longpela Nus Bilong Elefan

● Ol saveman i wokim wanpela robot han we em i isi long tanim tanim na mekim gut olgeta kain wok. Bosman bilong kampani we i kamapim dispela robot han, i tok dispela nupela han “em i winim tru ol narapela masin robot em ol man i wokim long nau.” Ol i kisim aidia we bilong wokim dispela nupela robot han? Em i tok: “Ol i kisim aidia long longpela nus bilong elefan.”

Tingim: Hevi bilong longpela nus bilong elefan em 140 kilogram, na em i gat nem olsem “gutpela samting bilong mekim kain kain wok.” Nus bilong en inap mekim planti kain wok, olsem pulim win long en, dring long en, o yusim olsem han. Na tu, em inap yusim long smelim samting, kisim samting, na mekim bikpela singaut!

Tasol i no dispela tasol. Nus bilong elefan i gat 40,000 masol we i mekim na em inap tanim tanim long kain kain wei. Em inap yusim liklik hap long fran bilong nus long kisim wanpela liklik koin. Na tu, em inap yusim nus bilong en long karim ol hevipela samting inap olsem 270 kilogram!

Ol saveman i ting taim ol i bihainim stail bilong longpela nus bilong elefan, dispela bai helpim ol long wokim wanpela supa robot we inap mekim kain kain wok bilong haus na bilong ol faktori. Mausman bilong dispela kampani, em i tok: “Dispela nupela robot han em mipela i wokim pinis, em i wanpela nupela kain masin robot bilong helpim ol man. Dispela em namba 1 taim we ol man na masin robot inap wok gut wantaim na bagarap i no kamap.”

Yu ting wanem? Longpela nus bilong elefan i kamap nating? O wanpela man i bin wokim?