Wok Man i Mas Mekim Bilong Stiaim Elefan — Wastaua INTENET LAIBRERI

Wok Man i Mas Mekim Bilong Stiaim Elefan

DISPELA STORI I KAM LONG INDIA

WANPELA man bilong stiaim elefan, ol i kolim mahaut, em i kukim kaikai bilong em long arere bilong wara Narmada. Em i lusim liklik pikinini man bilong em namel long longpela nus na 2-pela lek bilong elefan husat i malolo i stap. Buk Project Elephant i tok, planti taim dispela pikinini i traim long surik i go, tasol “elefan i raunim longpela nus bilong em long pikinini na pulim em i kam bek long hap we papa i bin lusim em. Papa i wok long kuk i stap na i luk olsem em i bilip tru olsem i no gat wanpela hevi inap painim pikinini.”

Ol elefan bilong mekim wok i bin helpim ol man kirap long yia 2000 B.C.E. na i kam. Long bipo, ol i skulim planti elefan long insait long pait. Long nau, long India ol i save skulim ol elefan long mekim wok. Ol i save yusim ol elefan long wok bilong katim na rausim ol diwai, long ol bung bilong lotu na ol weding, long wok bilong edvetaisim ol samting, long ol so, na bilong askim ol man long givim mani samting. Olsem wanem ol i skulim ol dispela elefan bilong i stap isi na bihainim tok? Olsem wanem ol i save skulim ol long mekim wok?

Kos Bilong Lain Long Skulim Elefan

Planti ples bilong skulim ol elefan long India i gat ol samting bilong lukautim ol pikinini elefan em ol man i bin kisim na banisim, o mama i bin lusim ol, o ol i bin kisim bagarap long bus. Wanpela ples olsem i stap long Koni, long provins Kerala. Long dispela ples ol i save skulim ol pikinini elefan long mekim wok. Pastaim mahaut i mas mekim ol samting na bai elefan i kirap trastim em. Pasin bilong givim kaikai i wanpela bikpela samting bilong kirapim elefan long trastim mahaut. Pikinini elefan i save long nek bilong mahaut bilong em, na taim em i singautim elefan long kam kaikai, elefan bai kam hariap bilong kisim susu na kaikai ol i bin wokim long wit samting. Ol i kirap skulim ol yangpela elefan long mekim wok taim ol i gat 13 krismas samting. Na taim ol i gat 25 krismas ol i kirap mekim wok. Long Kerala, gavman i putim lo olsem ol elefan bilong mekim wok i mas pinis long wok taim ol i gat 65 krismas.

Bilong stiaim elefan na hevi i no ken kamap, mahaut i mas kisim gutpela skul. Wanpela lain (Elephant Welfare Association) long Trichur, Kerala, i tok nupela mahaut i mas kisim skul inap 3-pela mun. Ol i skulim em long givim ol oda long elefan, na tu, ol i skulim em long olgeta samting bilong laip bilong elefan.

Ol i mas lusim longpela hap taim moa bilong skulim elefan i bikpela pinis. Man bilong skulim elefan i stap ausait long banis we elefan i stap, na em i skulim elefan long save long ol oda em i givim. Long Kerala, mahaut i yusim inap 20 tok na mak bilong kirapim elefan long mekim wok. Mahaut i kolim strong na klia ol tok taim em i givim oda, na long wankain taim em i yusim stik bilong kirapim elefan na soim long em ol samting em i mas mekim. Taim elefan i bihainim tok, em bai kisim sampela liklik kaikai em i laikim tru. Taim man bilong skulim elefan i save olsem elefan bai i no birua long em, em bai go insait long banis na mekim gut long elefan. Dispela i mekim na pasin bilong trastim narapela i stap namel long elefan na mahaut. Bihain, mahaut i ken kisim elefan i kam ausait—⁠tasol em i mas was gut, long wanem, sampela wail pasin bilong elefan i stap yet. I kam inap long taim em i klia tru olsem elefan i stap isi na i bihainim ol tok, ol i pasim em long sen namel long tupela elefan ol i yusim bilong skulim ol elefan, na ol i kisim em i go waswas o long sampela narapela hap.

Taim elefan i kliagut long ol oda mahaut i givim, mahaut bai sindaun long baksait bilong em na skulim em long bihainim ol oda mahaut i givim long rot bilong pinga bilong lek o baksait bilong lek. Bilong kirapim elefan long wokabaut i go, mahaut i subim tupela bikpela pinga bilong lek long baksait bilong yau bilong elefan. Bilong mekim elefan i rives i kam bek, mahaut i subim tupela baksait bilong lek long sol bilong elefan. Bilong elefan i no ken paul, wanpela mahaut tasol i save givim ol oda. Insait long 3-pela o 4-pela yia, elefan bai kliagut long olgeta oda. Bihain long dispela, em bai no inap lusim tingting long ol. Maski kru bilong elefan i liklik taim yumi skelim wantaim sais bilong bodi bilong en, elefan i smat long tingting.

Wok Bilong Lukautim Elefan

Em i bikpela samting long lukautim gut elefan na bai em i stap amamas na i no kisim sik, na tu, mahaut i mas wasim elefan long olgeta de. Long taim bilong waswas, mahaut i save yusim ol ston na skin bilong kokonas bilong skrapim skin bilong elefan, em skin i bikpela na malumalum na inap pilim ol samting.

Bilong redim kaikai bilong moningtaim, mahaut i redim sup em i wokim long wit na ol narapela kunai samting ol animal i save kaikai. Bikpela kaikai bilong elefan em mambu, lip bilong pam, na gras. Elefan bai amamas sapos em i kisim tu ol karot na stik suga. Ol elefan i save lusim bikpela hap taim long kaikai. Long olgeta de ol i mas kisim kaikai inap 140 kilo na dring 150 lita wara! Bilong pas gut wantaim elefan, mahaut i mas givim ol dispela samting long em.

Mekim Nogut Long Elefan

Man i no inap fosim elefan bilong India long mekim wok i go inap long wok i abrusim mak bilong elefan. Ol elefan inap kirap pait long ol mahaut husat i bikmaus o mekim narapela samting bilong givim strafe long ol elefan. Nius Sunday Herald i stori long wanpela man elefan i gat bikpela tit, em i “go wail olgeta . . . bihain long ol mahaut i mekim nogut long em. Elefan i go wail, long wanem, mahaut i paitim em . . . na ol i mas givim sut long elefan bilong mekim em i slip i dai.” Long Epril 2007, nius India Today International i tok: “Insait long laspela tupela mun, winim 10-pela man elefan i bin kirap pait long ol bikpela bung; kirap long Janueri long las yia, ol elefan i kros i bin kilim i dai inap 48 mahaut.” Dispela samting i save kamap long olgeta yia long taim bilong ol elefan long kamapim pikinini, em taim we mak bilong homon testosteron bilong ol bikpela man elefan i save go antap. Dispela i mekim na ol elefan i save kros nating long ol narapela man elefan na ol manmeri. Dispela haptaim bilong kamapim pikinini inap i stap 15 de i go inap long 3-pela mun.

Narapela samting inap mekim elefan i kros, em taim ol i salim elefan na nupela mahaut i kirap lukautim em. Elefan i save pas gut wantaim mahaut bilong en long bipo. Bilong elefan i ken lain long nupela ples bilong en, mahaut bilong bipo i go wantaim em. Long nupela ples, olpela na nupela mahaut i wok wantaim i go inap long taim nupela mahaut i lain long ol pasin bilong elefan. Taim mahaut i dai na nupela i kirap lukautim elefan, ol bikpela hevi moa inap kamap. Tasol isi isi elefan i luksave long nupela ples bilong en na i orait long en.

Maski sampela manmeri inap pret long dispela bikpela animal, elefan ol i bin skulim gut, em bai harim tok bilong mahaut i gat gutpela pasin. Taim mahaut i mekim gut long elefan, i no gat wok long pasim elefan long sen taim mahaut i stap long narapela hap inap liklik taim. Mahaut bai putim tasol wanpela hap bilong stik antap long lek bilong elefan na narapela hap bilong stik i slip long graun, na em i tokim elefan long stap. Elefan bai harim tok na sanap, na stik bai stap olsem tasol. Olsem kirap bilong dispela stori i kamapim, pasin bilong elefan na mahaut long wok gut wantaim em samting yumi kirap nogut long en na pilim tru. Em nau, gutpela mahaut inap trastim elefan bilong em.

[Blok/Piksa long pes 18]

LONG BIPO YET MAN I MEKIM WOK LONG ELEFAN

Long bipo yet ol man i bin skulim ol elefan long bihainim tok. Wanpela man olsem em planti man i save long en, em Hanibal, wanpela jeneral bilong Carthage. Long ol yia 300-201 B.C.E., inap planti taim taun Carthage long Not Afrika i bin pait (Punic Wars) wantaim Rom. Hanibal i bungim lain ami long taun Cartagena, Spen, na i tingting long mats i go long Rom. Pastaim em i brukim ol maunten Pyrenees bilong i go insait long kantri nau ol i kolim Frans. Bihain, olsem nius Archaeology i tok, lain ami bilong em i mekim “wanpela narakain samting tru bilong mekim pait.” Lain ami bilong em i gat 25,000 man, na 37 elefan bilong Afrika na planti donki samting bilong karim kago, na ol i brukim ol maunten Alps na i go long Itali. Ol i kisim taim stret long kol, bikpela ais i pundaun, graun i bruk na ol bikpela ston i pundaun, na ol lain i sindaun long ol maunten i birua long ol. Ol dispela elefan i hatwok tru long mekim dispela wokabaut. Olgeta i dai insait long namba wan yia bilong Hanibal i stap long Itali.

[Kredit Lain]

[Piksa long pes 17]

Mahaut i skrapim bikpela skin bilong elefan i malumalum na inap pilim ol samting

[Kredit Lain]

[Piksa Kredit Lain long pes 16]