Taim Mi Marit, Mi Ken Ekspektim Wanem Samting? Hap 2

Sapos yu wok long painim poroman marit, orait i no gat rong long yu ekspektim ol samting yu putim tik long en. Ating yu inap painim wanpela husat i inapim olgeta dispela mak. Samting yu mas tingim em olsem, bihain long sampela haptaim ol man i save senis, na sindaun tu i save senis.

Bikpela samting: Sapos yu laik bai marit bilong yu i kamap gut, yu mas ekspektim ol samting yu no ting bai kamap.

Gutpela samting. Sampela samting yu no ekspektim inap kamap na i olsem gutpela samting.

“Taim mitupela Mariaa i bin pren tasol, mi no bin pilim tumas pasin bilong em long amamas na lap. Tasol taim mitupela i marit pinis, mi pilim tru dispela pasin bilong em. Mitupela i no strong long tingting bilong mipela yet, olsem na ol hevi mipela i karim i no olsem bikpela samting.”—Mark.

Samting nogut. Sampela samting yu no ekspektim inap kamap na i olsem samting nogut. Skelim dispela eksampel:

Ating yu na poroman yu bai maritim, i putim mak long mekim wok misineri long narapela kantri. Tasol olsem wanem sapos bihain long marit, poroman marit i kisim bikpela sik we i pasim yutupela long winim dispela mak? Dispela samting inap kamap, long wanem, Baibel i tok “taim nogut i save painim yumi olgeta.” (Saveman 9:11) Yu bai bel hevi tru long hevi i painim poroman bilong yu, na tu, yu bai bel hevi long yupela i no inap winim mak bilong yupela. Sapos kain samting olsem i kamap, yu mas holim stretpela tingting na mekim sampela senis. Tingim, yu maritim wanpela man o meri, na yu no maritim mak yu putim long winim.

Bikpela samting: Olsem Baibel i tok, ol lain husat i marit ol bai karim “pen na hevi.” (1 Korin 7:28) Sampela taim, pen na hevi i save kamap long rot bilong ol samting yu no bin ekspektim.

Olsem wanem yu inap redi long bungim ol samting yu no bin ekspektim? Sapos yu marit, yu mas i gat dispela tupela samting:

1. HOLIM STRETPELA TINGTING

Maski yu na poroman marit bilong yu i wok gut wantaim, yu mas ekspektim olsem sampela taim

• yutupela bai i no wanbel long olgeta samting.

• yutupela bai i no gat wankain mak yupela i laik winim.

• yutupela bai i no laikim mekim ol wankain samting.

• yutupela bai i no pilim bikpela laikim olsem long bipo.

Ol dispela samting i bin painim planti manmeri. Ol dispela samting i no inap bagarapim marit bilong yu. Tasol sapos yu yet i opim rot, ol dispela samting inap bagarapim marit bilong yu! Tingim, Baibel i tok man i gat pasin laikim em i “save sanap strong long olgeta hevi i kamap long em” na oltaim em i save win.—1 Korin 13:4, 7, 8.

Samting tru: Samting we bai helpim o brukim marit bilong yu, em i no ol hevi yu bungim, nogat, em ol samting yu mekim bilong karim ol dispela hevi.—Kolosi 3:13.

2. STAP GUT LONG POROMAN

Sapos yu na poroman marit i tingting strong long stap wantaim maski wanem samting i kamap, yutupela bai inap tru long karim olgeta kain hevi.—Matyu 19:6.

Sampela i tok, pasin bilong stap gut long poroman i givim hevi long marit. Tasol tru tru i no olsem! Pasin bilong stap gut long poroman i strongim marit. Taim ol hevi i kamap, yu na poroman marit bai painim rot bilong stretim hevi na i no painim rot long lusim poroman marit.

Bilong kisim pasin bilong stap gut long poroman, yu mas holim stretpela tingting long marit. Long kliagut long dispela samting, mekim dispela eksasais.

1. Tingim olsem yu gat 1-pela fri balus tiket bilong flai i go long wanem wanem kantri yu laik go long en. Yu laik go long wanem kantri, na bilong wanem?

Kantri:

Risen:

• ples

• kalsa

• klaimet

• amamas

• narapela samting

2. Tingim olsem tiket bilong yu em wan wei na yu bai stap olgeta long kantri yu bai go long en.

Orait nau yu bai makim wanem kantri bilong go long en?

• Kantri:

• o

  Mi bai stap tasol long hia.

Ating bekim yu bin raitim long namba 1 askim i no wankain long bekim yu raitim long namba 2 askim. Maski sapos ol i wankain, ating yu bin tingting gut moa taim yu bekim namba 2 askim. Yu no tingim yu yet olsem wanpela man husat i go holide na malolo long nambis o raun long ol maunten, nogat. Yu tingim yu yet olsem wanpela man bilong dispela kantri na yu amamas long ol gutpela samting na yu karim tu hevi bilong olgeta wan wan de.

Yu mas holim kain tingting olsem long sait bilong marit. Em tru olsem, bihain long sampela haptaim, sampela senis inap kamap. Yu na poroman marit tu bai senis. Marit bilong yu bai wok gut sapos yu redi long ekspektim ol samting yu no bin ting bai kamap na yu karim ol dispela hevi.

Tingim dispela: Nau yet olsem wanpela singel man o meri, yu save mekim wanem bilong karim ol hevi em yu no ekspektim?