Pul Bilong Hambek Weil

BIKPELA hambek weil em i longpela na em i hevi moa winim wanpela trak i pulap long ol kago. Dispela bikpela animal i save kontrolim gut bodi bilong em taim em i swim hariap tru na tanim tanim long solwara. Wanem samting i mekim na em inap swim hariap tru? Wanpela bilong ol samting i helpim em long mekim olsem em ol bukbuk long pul bilong en.

Tingim: Klostu olgeta weil na ol dolfin i gat ol pul em arere bilong ol i smut. Tasol hambek weil i narapela kain. Long fran sait bilong tupela pul, long arere, em i gat ol bikpela bukbuk. Taim hambek weil i swim, wara i ron antap na namel long ol dispela bukbuk, na dispela i mekim wara i tantanim raun raun long ol liklik sekol. Disain bilong ol dispela bukbuk i mekim wara i meknais. Ol dispela samting i helpim weil taim em i stap daunbilo tru long wara long swim i kam antap. Na tu, ol dispela bukbuk i mekim na wara i no pas tumas long pul bilong en na givim hatwok long em long swim. Dispela em i bikpela samting bikos tupela pul bilong dispela weil i longpela tru olsem 4.5 mita.

Ol saveman i yusim dispela aidia long wokim ol stia bilong bot, masin bilong tanim wara i kamapim pawa, winmil, na propela bilong helikopta.

Yu ting wanem? Yu ting pul bilong hambek weil i kamap long rot bilong evolusen o wanpela man i bin wokim?