Narakain Kru Bilong Aktik Graun Skwirel

TAIM wanpela animal i kirapim longpela slip bilong en long taim bilong kol, bodi bilong en i save kol. Em bai kol inap long wanem mak? Sampela aktik graun skwirel, bodi bilong ol i save kol tru winim ol narapela animal inap olsem 2.9 digri Selsias aninit long siro mak! Taim bodi bilong ol i kol nogut tru, ating kru bilong ol inap kamap ais na ol inap dai. Olsem wanem dispela Aktik graun skwirel inap stap laip long kain taim olsem?

Tingim: Long olgeta tupela o tripela wik bihain long taim em i slip, aktik graun skwirel i save seksekim em yet bilong hatim bodi inap long em i kisim bek nomol hat bilong bodi em 36.4 digri Selsias, na bai bodi i stap hat inap 12 i go 15 aua samting. Ol saveman i tok taim aktik graun skwirel i hatim gen bodi, maski em sotpela taim tasol, dispela i helpim kru long stap laip. Na tu, long taim bilong dispela longpela slip bilong en, het bilong aktik graun skwirel i no kol tumas olsem ol narapela hap bodi bilong en. Taim ol i mekim wok painimaut long dispela skwirel, ol i kisim save olsem hat bilong nek bilong en i no save go daun tru abrusim mak bilong 0.7 digri Selsias.

Bihain long taim skwirel i lusim longpela slip bilong en, kru bilong en i save kirap mekim wok gen insait long tupela aua. Wanpela wok painimaut i tok kru bilong skwirel i save wok gut moa bihain long em i lusim slip! Ol saveman i kirap nogut long dispela. Ol i tok em i wankain olsem ol gras samting i save kru gen sampela de bihain tasol long paia i kukim bikbus.

Ol saveman i ting olsem save ol i kisim long aktik graun skwirel inap helpim ol long kisim sampela save moa long wok bilong kru bilong ol man. Ol i mekim olsem bilong painimaut rot bilong pasim o pinisim ol bagarap i save kamap long sel bilong kru na kamapim kain sik bilong kru olsem sik Alsaima.

Yu ting wanem? Kru bilong aktik graun skwirel i kamap long rot bilong evolusen o wanpela man i bin wokim?