Skwirel i Save Flai

WANPELA MAN LONG FINLAN I RAITIM DISPELA STORI BILONG KIRAP!

OL SKWIREL i stap long klostu olgeta hap bilong graun. Tasol sampela skwirel tasol i wankain olsem skwirel bilong Saibiria i save flai.a Olsem wanem? Dispela liklik animal inap tru long flai? Em wanem kain animal na bilong wanem planti man i no inap lukim em?

Olsem Wanem Ol i Save Flai?

Olgeta skwirel i save kalap i go long narapela narapela diwai, tasol i no gat wanpela bilong ol inap winim skwirel i save flai. Ol dispela skwirel i save flai i go longwe inap 80 mita! Tasol olsem wanem dispela skwirel inap flai?

Dispela skwirel i gat wanpela hap skin i kain olsem wing em ol ensinia bilong balus bai kirap nogut tru long en. Buk The World of the Animals i tok: “Insait long dispela skin i gat wanpela kain rop i kirap long han bilong em i go long lek bilong em. Maski dispela hap skin i luk olsem em i gat tupela hap skin tasol, long namel bilong en i gat masol i helpim em long bendim hap skin bilong em na bai em i ken stiaim em yet taim em i flai.”

Taim skwirel i flai bodi bilong em i slip stret. Taim em i no flai, i luk olsem em i werim wanpela saket i gat gras na i bikpela tumas long em!

Olsem wanem skwirel inap flai tasol em i no bamim wanpela samting? Tel bilong em i wok olsem stia na i stiaim em taim em i flai. Paslain long em i pundaun long diwai, em i save mekim bodi bilong em i kamap olsem parasut bambai em i ken kam daun isi isi. Wan wan taim tasol em i abrus long ples em i laik kamap long en na pundaun long graun.

Dispela skwirel i no hevi tumas na dispela tu i helpim em long flai. Hevi bilong wanpela skwirel i bikpela pinis em inap olsem 150 gram na longpela bilong em inap olsem 20 sentimita, dispela i no makim tel tu. Yau bilong em i liklik na i no gat gras long en, olsem na ol i no pasim em taim em i flai.

Wanpela Pailot Bilong Nait

Skwirel i save flai i gat narapela kain ai, ol i luk olsem bikpela blakpela bis. Dispela skwirel i no wankain olsem ol narapela skwirel, em i save raun long nait. Olsem na em i mas i gat gutpela ai bilong painim ol kaikai em i save laikim​—⁠wanpela plaua ol i kolim katkin na lip bilong ol diwai na ol nupela nil bilong diwai konefe. Long taim bilong kol i no gat planti kaikai, olsem na long taim bilong san i pinis skwirel i save bungim ol katkin na haitim ol antap long ol han bilong diwai na insait long ol hul bilong diwai.

Long taim bilong kol i pinis, sampela skwirel i save flai i save amamas long pilai na ol i save lusim tingting long slip. Na long dispela taim tu, i gat narapela samting i save pulim tingting bilong ol​—⁠em taim bilong kamapim pikinini. Taim meri skwirel i amamas pinis long pasin bilong man skwirel long flai, orait em taim nau bilong wokim haus bilong kamapim ol pikinini. Sapos i gat haus bilong ol pisin i stap pinis, em bai mekim dispela i kamap haus bilong em, o em bai mekim wok long wanpela hul i stap long diwai. Skwirel i save flai i gat planti haus. Sampela haus i stap olsem ples bilong putim kaikai na sampela olsem ol rum. Sampela skwirel i save flai i save wokim haus insait long haus bilong bulmakau. Tasol em i no olsem ol narapela skwirel, dispela skwirel i save flai i no save stap long taun!

Long kirap bilong taim bilong san, mama skwirel bai karim tupela o tripela pikinini skwirel. Mama skwirel bai bisi tru long painim kaikai na givim long ol pikinini, em bai mekim olsem long san tu. Long taim mama i karim ol, ol i liklik tru inap olsem het bilong pinga; tasol paslain long taim bilong san i pinis, ol bai flai lusim haus bilong ol!

Bilong Wanem Planti Man i No Inap Lukim Ol?

Bilong wanem planti man i no inap lukim skwirel i save flai? Wanpela as em dispela liklik animal i save raun long nait na i no pairap taim em i flai antap long ol diwai na ol man i no inap lukim em. Na tu, dispela skwirel i save stap long bus bilong hap not, kirap long solwara Boltik na i go long bus bilong Rasia na long hap bilong solwara Pasifik.

I luk olsem skwirel bilong Saibiria i save flai inap i stap gut long bikpela bus bilong Saibiria. Tasol dispela animal wankain olsem ol narapela animal i save wokim haus insait long ol diwai, ol i no gat gutpela ples moa bilong wokim haus bilong ol long en, long wanem, ol man i wok long katim ol diwai na pinisim ol bus. Lain European Union i putim lo bilong lukautim dispela skwirel i stap long hap wes bilong Finlan. Sapos ol man i laik wokim haus samting long bus na ol i lukim wanpela skwirel i flai o sapos ol i painim pekpek bilong em long graun, dispela bai pasim ol long wokim haus long dispela hap.

Tasol ol skwirel i no save olsem pekpek bilong ol inap senisim plen bilong ol man, na i luk olsem i no gat wanpela samting i pasim ol long ol samting ol i save mekim. Taim tudak i kamap long bus long hap bilong not, planti tausen skwirel i save flai i save kam ausait long ol hul bilong diwai. Longpela mausgras bilong ol na ol han bilong diwai i meknais, na ol skwirel i kirap long raun gen!

[Futnot]

[Piksa long pes 15]

Katkin, kaikai ol skwirel i save flai i save laikim

[Piksa long pes 16]

Bebi skwirel i save flai bilong Saibiria

[Piksa Kredit Lain long pes 14]

Ilya Lyubechanskii/BCIUSA.COM

[Piksa Kredit Lain long pes 15]

Squirrels: Benjam Pöntinen

[Piksa Kredit Lain long pes 16]

Squirrels: Benjam Pöntinen