Bataflai Painted Lady Nupela Save Long En

OL MAN long Yurop i save amamas long lukim ol bataflai painted lady (Vanessa cardui), na ol i save tingting long wanem samting tru i painim ol long taim sisen bilong san i pinis. Ol i save dai long taim bilong kol? Ol wok painimaut em ol i mekim nau tasol i kamapim wanpela nupela save. Olgeta yia ol dispela bataflai i save flai long noten Yurop i go long Afrika na bihain ol i kam bek gen.

Ol saveman i yusim masin reda bilong lukim ol bataflai, na tu, ol man i bin lukim planti tausen ol dispela bataflai long planti hap bilong Yurop. Dispela wok painimaut i soim olsem taim sisen bilong san i pinis, planti milion bataflai painted lady i save go long hap saut, na ol i flai antap winim 500 mita long graun, em as na ol man i no save lukim ol. Ol dispela bataflai i save wetim senis long ron bilong win, na ol i save larim win i karim ol i go spit tru inap 45 kilomita long wanpela aua long dispela longpela raun bilong ol i go long Afrika. Long olgeta yia, ol i save flai klostu 15,000 kilomita, kirap long hap not tru bilong Aktik na i go stap long hap saut long Wes Afrika we ples i hat. Dispela raun bilong ol i winim raun bilong king bataflai bilong Not Amerika. Namba 1 lain bataflai painted lady i kirapim raun i save dai na nupela lain i kamap i go inap long namba 6 lain i kam bek long ples.

Profesa Jane Hill bilong University of York, long Inglan i tok: “Bataflai Painted Lady i save go, kamapim ol pikinini, na kirap gen long go.” Long olgeta yia, dispela pasin i helpim ol long mekim dispela raun bilong ol long noten Yurop i go long Afrika na kam bek gen.

Richard Fox, maneja bilong Butterfly Conservation long Briten i tok: “Dispela liklik bataflai hevi bilong en i no winim 1 gram, na kru bilong en i sais bilong het bilong pin, na i no gat rot long em i lain long ol bataflai i stap paslain long en, tasol em inap long flai long wanpela kontinen i go long narapela.” Fox i tok moa: “Bipo ol man i ting win i save karim ol dispela bataflai i go bihainim ron bilong win inap long olgeta i dai long bikpela kol bilong Briten.” Tasol dispela stadi i “soim olsem ol bataflai Painted Lady i gat bikpela save long flai long wanpela ples i go long narapela.”