Lain Long Putim Gut Yau

HATWOK BILONG EN

Poroman marit bilong yu i tok: “Yu no putim yau long tok bilong mi!” Yu tokim yu yet olsem, ‘Tasol mi bin putim yau long yu.’ Tok yu harim em i narapela long tok poroman bilong yu i bin mekim. Dispela i mekim na narapela tok pait gen i kirap.

Yu inap abrusim kain tok pait olsem. Pastaim, yu mas kliagut long as na yu no bin kisim ol bikpela tok poroman marit bilong yu i mekim, maski yu ting olsem yu bin putim yau long tok bilong em.

AS NA DISPELA I KAMAP

Yu taiet o sampela samting i pulim tingting bilong yu. Ol pikinini i singaut, nois bilong televisen, na yu wok long tingim wanpela hevi yu gat long ples wok. Nau, poroman marit bilong yu i kirap toktok long yu olsem sampela visita bai kam long haus nau nait. Yu nodim het bilong soim olsem “em orait,” tasol tru tru yu harim tok em i bin mekim? Ating nogat.

Yu kisim tingting kranki. Yu kisim tingting kranki olsem tok bilong poroman marit bilong yu i minim narapela samting, tasol i no gat as long yu kisim kain tingting olsem. Olsem, sapos poroman i tok: “Yu mekim planti ovataim long dispela wik.” Yu ting em i sutim tok long yu na yu tok: “Em i no asua bilong mi! Mi mas wok ovataim bikos yu save tromoi planti mani tumas.” Poroman marit bilong yu i bikmaus na tok, “Mi no sutim tok long yu!” Em i tok olsem bikos em i laik bai yupela i rileks na amamas wantaim long wiken.

Yu hariap tumas long stretim hevi. Marciea i tok: “Sampela taim, mi laik kamapim samting mi pilim long bel, tasol Mike i laik tokim mi long rot bilong stretim dispela hevi. Mi no gat laik long stretim hevi. Mi laik tasol bai em i harim tingting bilong mi.” Wanem hevi bilong ol? Mike i hariap tumas long tingim rot bilong stretim hevi. Olsem na, ating em bai harim sampela o i no harim olgeta tingting em Marcie i laik kamapim.

Maski wanem samting i kamapim hevi, olsem wanem yu inap kisim pasin bilong putim gut yau?

SAMTING YU KEN MEKIM

Putim tingting olgeta long harim tok bilong poroman. Poroman bilong yu i laik toktok long yu long wanpela bikpela samting, tasol yu redi long putim gut yau? Ating nogat. Nau yet tingting bilong yu i stap long ol narapela samting. Sapos olsem, orait no ken giaman long harim tok bilong em. Sapos inap, lusim ol samting yu mekim na putim gut yau long tok em i mekim o ating yu ken askim em long wet inap long taim yu redi long mekim olsem.—Stiatok bilong Baibel: Jems 1:19.

Wanbel long larim poroman i toktok na bihain yu toktok. Sapos em taim bilong yu long putim yau, wok strong long daunim pasin bilong katim tok o i no wanbel long tok bilong poroman. Bai yu gat taim bilong toktok. Olsem na nau yet, putim gut yau.—Stiatok bilong Baibel: Sindaun 18:13.

Givim ol askim. Dispela bai helpim yu long kliagut long tok bilong poroman bilong yu. Marcie, em mipela i bin kamapim pinis tok bilong em i tok: “Mi save amamas taim Mike i givim ol askim long mi. Dispela i soim olsem em i tingim tru samting mi toktok long en.”

No ken harim tasol, kisim mining bilong tok. Lukim hau em i wokim han, pes, na ai, na krai bilong nek bilong em i olsem wanem. Dispela tok “Em orait” inap minim olsem “I no orait” taim yu skelim hau em i tromoi tok. Ating kain tok olsem “Yu no save redi long helpim mi” inap minim olsem “Mi pilim olsem mi no bikpela samting long yu.” Traim long kisim mining bilong tok, maski sapos em i no kolim dispela tok. Sapos yu no mekim olsem, ating yu inap tok pait long ol tok i bin kamap na yu no tingim mining bilong en.

Wok yet long putim gut yau. No ken giaman olsem yu harim tok o wokabaut i go long narapela hap, maski yu no amamas long tok yu harim. Olsem, yu inap mekim wanem sapos poroman marit bilong yu i sutim tok long yu? Gregory, husat i marit winim 60 yia pinis, i tok: “Wok yet long putim gut yau. Tingim gut tok poroman i mekim. Maski i hatwok long mekim olsem, dispela bai helpim marit bilong yu.”—Stiatok bilong Baibel: Sindaun 18:15.

Tingim tru poroman bilong yu. Pasin bilong putim gut yau em i no wanpela pasin tasol, nogat, em i soim pasin laikim. Taim yu gat laik tru long putim gut yau long tok poroman marit bilong yu i mekim, isi isi dispela bai kamap pasin bilong yu. Long dispela rot yu bihainim tok Baibel i mekim: “Yupela i no ken tingim ol samting bilong yupela yet tasol, nogat. Yupela i mas tingim tu ol samting bilong ol arapela.”—Filipai 2:4.