DNA Inap Holim Planti Infomesen Tru

LAIN bilong yusim kompiuta i save kamapim planti infomesen na ol i mas seivim ol dispela infomesen bilong yusim bihain. Ol saientis i laik wokim nupela masin bilong seivim infomesen, na ol i laik kopim wanpela samting i save stap long ol samting i gat laip na i save holim planti infomesen, em DNA.

Tingim: DNA i stap long sel bilong ol samting i gat laip na i holim planti bilion infomesen long laip bilong dispela samting. Nick Goldman bilong European Bioinformatics Institute i tok: “Mipela inap kisim DNA long bun bilong ol elefan i gat planti gras em ol i bin stap bipo tru . . . na kliagut moa long dispela animal. Na tu, DNA i liklik tru, inap holim planti infomesen, na i no nidim pawa, olsem na em i isi long bungim, salim, na lukautim.” DNA inap holim ol infomesen em ol man i kamapim? Ol saveman i tok yes.

DNA em ol saientis i bin wokim em ol inap putim ol rait, ol piksa, na ol toktok na musik i go insait long en, wankain olsem kompiuta i save holim ol infomesen. Bihain ol saveman i rausim stret olgeta infomesen ol i bin seivim. Ol saientis i bilip olsem bihain wanpela gram bilong DNA ol i wokim inap holim planti infomesen inap long 3,000,000 CD i ken holim, na ol dispela infomesen bai stap gut inap planti handret o planti tausen yia. Dispela pasin bilong holim infomesen inap holim olgeta infomesen i stap long olgeta kompiuta long graun olgeta. Ol man i kolim DNA olsem “nambawan gutpela had-draiv.”

Yu ting wanem? Dispela rot bilong DNA long holim planti infomesen tru i kamap long rot bilong evolusen? O wanpela i bin wokim?