Taim Yu No Amamas Long Marit Bilong Yu

HATWOK BILONG EN

Taim yu na poroman bilong yu i no marit yet, planti tingting na laik bilong yutupela i wankain. Tasol nau bel hevi i mekim na yupela i no pas gut moa, yu pilim olsem yu kalabus wantaim poroman marit bilong yu na yupela i no stap amamas.

Yu inap mekim marit bilong yu i stap amamas. Tasol pastaim skelim wanem samting i mekim na yu bel hevi.

AS NA DISPELA I KAMAP

Hevi bilong wan wan de. Wok mani, mekim bikpela long ol pikinini, na mekim ol samting wantaim ol tambu, ol dispela samting inap bagarapim amamas bilong marit. Na tu, sampela hevi inap kamap wantu na i putim hevi long marit, olsem bikpela hevi bilong mani o i gat wok long lukautim wanpela long famili i gat bikpela sik.

I no inap kamap wanbel. Taim man na meri i poroman wantaim, ol i no save tingim tumas ol samting ol i no gat wankain tingting long en. Tasol taim ol i marit pinis, man na meri i luksave olsem ol i no gat wankain pasin long toktok, lukautim mani, na stretim ol hevi. Ol samting em bipo ol i ting em liklik samting tasol, nau dispela inap kamap olsem bikpela hevi tru.

Narapela i no tingim moa filings bilong narapela. Pasin bilong tok nogut o mekim pasin nogut long narapela na ol hevi i bin kamap bipo em tupela i no bin stretim, dispela inap mekim na man o meri marit i no laik kamapim tingting na filings bilong em long poroman, na bikpela hevi moa inap kamap taim man o meri i kirap pas gut wantaim narapela i no poroman marit bilong em.

Samting yu wetim i no inap kamap. Taim sampela i marit, ol i ting ol i bin painim rait poroman stret. Ating kain tingting olsem em nais tru, tasol dispela inap kamapim bikpela hevi. Taim ol hevi i kamap, dispela tingting olsem ol i painim “rait poroman stret” i pinis nating, na tupela i pilim olsem ol i popaia pinis.

SAMTING YU KEN MEKIM

Tingim ol gutpela pasin bilong poroman bilong yu. Traim dispela: Raitim 3-pela gutpela pasin bilong poroman bilong yu. Holim dispela lista, olsem putim long baksait bilong liklik weding poto o long mobail samting. Planti taim lukluk long dispela lista bilong kirapim yu long tingim risen na yu bin maritim poroman bilong yu. Pasin bilong tingim ol gutpela pasin bilong poroman inap kamapim bel isi na i helpim yu long karim hevi taim yupela i no gat wankain tingting long ol samting.​—⁠Stiatok bilong Baibel: Rom 14:19.

Lusim haptaim bilong stap wantaim. Paslain long yupela i marit, ating yupela i bin makim haptaim bilong mekim ol samting wantaim. Yupela i bin amamas long poroman wantaim na stretim rot bilong raun wantaim. Gutpela sapos yupela i mekim wankain samting long nau tu. Makim haptaim we yu na poroman bilong yu i ken mekim ol samting. Taim yupela i mekim olsem, bai yupela i pas gut moa na yupela inap karim ol hevi bilong laip i save kamap long taim we yu no ting ol bai kamap.​—⁠Stiatok bilong Baibel: Sindaun 5:18.

Kamapim bel na tingting bilong yu. Sapos sampela tok o pasin bilong poroman bilong yu i bin bagarapim bel bilong yu, yu inap lusim tingting long dispela? Sapos yu no inap, orait no ken kisim pasin bilong pasim maus tasol na i no laik toktok. Toktok isi na stretim tok wantaim poroman bilong yu long dispela de yet sapos inap.​—Stiatok bilong Baibel: Efesus 4:26.

Luksave olsem filings bilong yu na laik bilong poroman bilong yu i no wankain. Ating yutupela wantaim i no min long bagarapim bel bilong narapela. Tokim poroman bilong yu long dispela na tok sori long yu bin bagarapim bel bilong em. Toktok long ol samting yutupela wantaim i ken mekim na bai narapela i no bagarapim bel bilong narapela. Bihainim edvais bilong Baibel: “Mekim pasin helpim long narapela narapela, na sori tru long ol, na redi long fogivim narapela narapela.”​—Efesus 4:32.

Holim stretpela tingting. Baibel i tok ol manmeri i marit ol “bai karim pen na hevi.” (1 Korin 7:28) Taim yu karim kain hevi olsem, no ken hariap na ting olsem yu popaia taim yu marit, nogat. Wok gut wantaim poroman bilong yu long stretim ol hevi na ‘wok yet long karim hevi narapela i putim long yu na amamas long fogivim narapela.’​—Kolosi 3:13.