FRAN PES STORI | NO KEN TINGTING LONG SUASAID

1 Ol Samting i Save Senis

“Kain kain hevi i banisim mipela, tasol ol i no pasim mipela olgeta. Mipela i no kliagut long mipela bai mekim wanem, tasol i no olsem mipela i no gat rot mipela i ken bihainim.”—2 KORIN 4:8.

Ol man i tok suasaid em “rot bilong pinisim tru hevi bilong sotpela haptaim.” Maski sapos wanpela bikpela hevi i kamap na i luk olsem i no gat rot bilong pinisim dispela hevi, ating dispela hevi bai stap sotpela taim tasol. Kwiktaim ol samting inap senis na dispela hevi i pinis.—Lukim blok “Sindaun Bilong Ol i Senis.”

Tasol sapos hevi i stap yet na yu laik mekim ol samting bilong pinisim dispela hevi, orait mekim ol samting inap long skel bilong wan wan de. Jisas i tok: “No ken tingting planti long ol samting bilong de antap, long wanem, de antap bai i gat ol wari bilong en. Hevi bilong wanpela de em inap long dispela de tasol.”—Matyu 6:34.

Tasol olsem wanem sapos hevi bilong yu i no pinis? Olsem: Ating yu gat wanpela sik we i no inap pinis. O ating yu bel hevi, long wanem, yu bungim wanpela hevi we i no inap pinis, kain olsem marit bilong yu i bruk o wanpela yu laikim tumas i dai.

Long kain taim olsem, i gat wanpela samting em yu inap long senisim: em tingting yu holim long dispela hevi. Taim yu luksave olsem yu no inap pinisim dispela hevi, dispela bai helpim yu long kisim stretpela tingting. (Sindaun 15:15) Na tu, dispela bai helpim yu long painim ol rot bilong helpim yu long karim dispela hevi, na yu no inap tingting long pinisim dispela hevi long rot bilong suasaid. Wanem samting inap kamap? Maski sapos yu no inap long bosim dispela hevi, yu inap long bosim tingting yu holim long dispela hevi.—Jop 2:10.

TINGIM DISPELA: Yu no inap kisim wanpela step tasol bilong wokabaut i go antap long wanpela maunten, nogat, yu mas kisim planti step na wokabaut i go yet. Dispela i wankain long ol hevi i painim yu, maski ol dispela hevi i bikpela tru olsem wanpela maunten na i luk olsem yu no inap long pinisim.

SAMTING YU KEN MEKIM LONG NAU: Toktok wantaim narapela, ating wanpela pren o wanfamili long hevi bilong yu. Dispela man inap helpim yu long kisim stretpela tingting long hevi bilong yu.—Sindaun 11:14.

SINDAUN BILONG OL I SENIS

Tingim 4-pela bilipman na bilipmeri em stori bilong ol i stap long Baibel. Ol i bel hevi tru na dispela i mekim na ol i no laik stap laip.

Rebeka: “Sapos dispela samting i kamap, orait bilong wanem mi mas i stap laip?”—Stat 25:22, NW.
Moses: “Yu kilim mi i dai na bai mi no ken hatwok moa long karim dispela hevi.”—Namba 11:15.
Elaija: “Nau mi laik bai yu larim mi i dai, long wanem, mi no gutpela man. Nogat. Mi wankain olsem ol tumbuna bilong mi.”—1 King 19:4.
Jop: “Watpo mi no bin i dai . . . taim mama i bin karim mi?”—Jop 3:11.

Sapos yu ritim stori bilong ol dispela bilipman na bilipmeri long Baibel, bai yu luksave olsem sindaun bilong ol i senis na i kamap gutpela. Em samting ol i no ting bai kamap. Wankain samting olsem inap kamap long yu. (Saveman 11:6) Yu no ken givap!