GRAUN I PULAP LONG HEVI

4 | Holimpas Pasin Bilong Bilip na Wet

WAI EM BIKPELA SAMTING

Pasin bilong tingting planti long ol hevi i kamap long graun inap givim sik long man na bagarapim bel na tingting bilong man. Planti manmeri em ol dispela hevi i painim ol, ol i no ting ol samting bai kamap gutpela. Ol i mekim wanem?

Sampela i no laik tingting long wanem samting bai kamap bihain.
Bilong daunim pasin bilong tingting planti, sampela i save kisim alkohol o drak.
Sampela i pilim olsem laip bilong ol i no gat as bilong en, so ol i tingting long suasaid.

Samting Yu Mas Save

Sampela bilong ol hevi yu karim, ol i bilong sotpela taim na ol inap senis wantu na sindaun bilong yu inap kamap gutpela.
Maski sindaun bilong yu i no senis, i gat ol samting yu inap mekim bilong karim ol hevi.
Baibel i stori long gutpela samting yumi ken bilip na wet long en—em i tok promis long wanpela rot bilong pinisim tru ol hevi bilong ol man.

Samting Yu Ken Mekim Nau

Baibel i tok: “No ken tingting planti long ol samting bilong de antap, long wanem, de antap bai i gat ol wari bilong en. Hevi bilong wanpela de em inap long dispela de tasol.”—Matyu 6:34.

Tingim hevi bilong wan wan de tasol. No ken wari long ol samting bai kamap bihain na dispela i mekim na yu no mekim ol samting em yu mas mekim long nau.

Pasin bilong wari long ol hevi we ating inap kamap o i no inap kamap, inap putim presa moa long yu na dispela inap mekim na pasin bilong yu long bilip na wetim ol gutpela samting bai kamap bihain i go slek.

HAU YU INAP KARIM HEVI—Sampela Gutpela Poin

TINGTING LONG OL GUTPELA SAMTING

Baibel i tok: “Taim man i karim hevi, olgeta de i nogut tasol long em, tasol taim bel bilong man i stap amamas, olgeta de i olsem de bilong bikpela kaikai long em.” (Provep 15:15) Sapos yu tingting tasol long hevi, ating yu no inap save olsem i gat rot bilong stretim hevi. Tasol taim yu putim tingting long ol gutpela samting, dispela bai helpim yu long tingim ol rot bilong stretim hevi.

Lusim pasin bilong tromoi bikpela haptaim long lukim ol nius.
Long pinis bilong wan wan de, tingim tupela o tripela samting em yu tenkyu long en.
Raitim lista bilong ol samting em yu mas mekim long nau. Yu ken brukim ol bikpela wok i go liklik liklik na mekim na bai yu lukim ol gutpela samting i kamap long dispela long pinis bilong de.

KISIM HELPIM LONG OL NARAPELA

Baibel i tok: “Man i stap em yet, . . . em i sakim olgeta savetingting.” (Provep 18:1) Yu yet i no inap kamaut long hul i dip tru, wanpela i mas helpim yu bilong kam antap.

Askim ol famili na ol pren long helpim yu.
Na tu, painim ol rot bilong yu ken helpim ol. Taim yu mekim ol samting bilong helpim ol narapela, dispela bai helpim yu long holim stretpela tingting long ol hevi bilong yu.
Sapos yu wok long kisim tingting olsem no gat gutpela samting bai painim yu, na yu pilim olsem i no gat as bilong laip bilong yu, i gutpela long go lukim dokta. Sampela taim dispela kain filings em mak bilong sik, kain sik olsem sik bilong tingting o dipresen. Planti manmeri i kisim helpim taim ol i kisim marasin samting.a

a Nius Kirap! i no makim stret wanpela marasin o rot bilong bihainim.

Baibel i Stori Long Ol Samting Yumi Ken Bilip na wet Long En

Wanpela man bilong raitim Buk Song long bipo i beten long God olsem: “Tok bilong yu i olsem lam i stiaim lek bilong mi, na i olsem lait bilong soim rot long mi.” (Buk Song 119:105) Skelim olsem wanem Baibel—Tok Bilong God—i kain olsem lam.

Long nait, lam inap helpim yumi long skelim wanem hap yumi ken wokabaut long en. Olsem tasol Baibel i gat savetingting bilong stiaim yumi taim yumi laik wokim ol disisen we i hatwok long mekim.

Lait inap soim rot long yumi na yumi inap lukim ol samting i stap longwe. Olsem tasol, Baibel inap soim yumi olsem i gat ol gutpela samting em yumi ken bilip na wet long en bai kamap bihain.

Baibel em wanpela buk holi i stori long hau ol man i kamap, na em i stori tu long ol gutpela samting yumi ken bilip na wet long en. Em i bekim ol dispela askim: