Save Bilong Grasopa Long Muv-Hariap Tru

OL GRASOPA i save bung na flai klostu long narapela narapela. Olsem, “insait long 1-pela skwe kilomita, klostu 80 milion grasopa” inap bung na flai long wankain taim. Tasol ol i no save bamim narapela narapela. Wanem samting i helpim ol long mekim olsem?

Tingim: Baksait long ai bilong grasopa i gat wanpela rop bilong kru em ol i kolim lobula giant movement detector (LGMD) we i save helpim grasopa long luksave long ol samting i stap klostu. Taim ol grasopa i flai klostu tru long narapela narapela, ol dispela rop bilong kru i save salim toksave i go long ol wing na lek bilong grasopa na long dispela rot ol grasopa i no inap bamim narapela narapela. Grasopa i save mekim olsem hariap tru winim taim man i blinkim ai bilong em.

Ol saientis i stadim ai na ol rop bilong kru bilong grasopa, na dispela i helpim ol long wokim wanpela kompiuta sistem we i helpim wanpela robot long luksave na abrusim ol samting i kam klostu long em, olsem na i nogat wok long yusim masin reda samting long lukim ol samting. Ol saveman i yusim dispela kain sistem long ol kar, na dispela inap helpim ol draiva long abrusim ol eksiden samting kwiktaim tru. Profesa Shigang Yue long University of Lincoln long Yunaitet Kingdom i tok: “Yumi inap lainim planti samting long ol liklik binatang, wanpela bilong ol em grasopa.”

Yu ting wanem? Save bilong grasopa long muv hariap tru i kamap long rot bilong evolusen? O wanpela i bin wokim?