Redi Long Daunim Laik na Tingting Bilong Yu

Yu na poroman marit i gat narapela narapela laik na tingting long wanpela samting. Maski i olsem, i gat 3-pela samting yu inap mekim:

1. Yu inap strong long poroman marit i bihainim laik bilong yu.

2. Yu inap daunim laik bilong yu na bihainim laik bilong poroman marit.

3. Yutupela i ken toktok gut na wanbel long bihainim wanpela tingting.

Ating bai yu tok: ‘Dispela i no gutpela tingting. I kain olsem mitupela i no inap mekim ol samting em mipela yet i laikim!’

Sapos yupela i bihainim savetingting bai yupela i amamas long ol disisen bilong yupela. Tasol pastaim yumi ken stori long olsem wanem yumi inap redi long daunim laik bilong yumi yet na bihainim tingting bilong poroman marit.

SAMTING YU MAS SAVE LONG EN

Toktok gut wantaim. Paslain long yu marit, ating yu yet i save mekim ol disisen. Tasol taim yu marit, nau em i bikpela samting long tingim laik na tingting bilong poroman marit. Gutpela samting inap kamap taim yu mekim olsem. Wanpela meri marit, Alexandra i tok: “Taim tupela man i bungim tingting, dispela inap helpim ol long stretim hevi.”

Redi long harim tingting bilong narapela. Saveman bilong helpim ol marit, em John M. Gottman i tok: “I no olsem yu mas wanbel long olgeta tok o tingting bilong poroman marit, tasol yu mas redi long harim tingting bilong em. Taim poroman marit i toktok long rot bilong stretim wanpela hevi, tasol yu no amamas na yu meknaisim het bilong soim olsem yu no wanbel, orait bai i hatwok long yupela i wanbel long mekim wanpela disisen.”a

Daunim laik bilong yu yet bilong wanbel long tingting bilong poroman marit. Yumi no amamas long i stap wantaim poroman marit husat i save ting, “yu mas bihainim tingting bilong mi, long wanem, dispela tingting i stret.” I gutpela moa sapos tupela wantaim i gat pasin bilong daunim laik bilong ol yet. Wanpela meri marit, June i tok: “Sampela taim mi bihainim tingting bilong man bilong mi na em tu i save mekim wankain pasin. Ol marit i no ken tingim laik bilong ol yet tasol, nogat, ol i mas tingim tu poroman marit bilong ol.”

SAMTING YU KEN MEKIM

Mekim gutpela tok. Sapos yu kamapim tingting bilong yu long hatpela pasin, ating bai i hatwok long toktok gut wantaim na wanbel long wanpela disisen. Olsem na i gutpela long bihainim tok bilong Baibel, em i tok: “Yupela i mas kisim bikpela pasin sori, pasin helpim, pasin daun, pasin isi, na pasin bilong i no les kwik.” (Kolosi 3:12) Ol dispela gutpela pasin bai helpim yupela long abrusim pasin bilong tok pait na yupela i ken stretim ol hevi.—Stiatok bilong Baibel: Kolosi 4:6.

Toktok long ol samting em yupela i wanbel long en. Sapos yupela i tingim tasol olsem laik na tingting bilong yupela i no wankain long ol samting yupela i laik mekim, dispela inap kamapim kros. I gutpela moa yupela i toktok long ol samting yupela i wanbel long en. Bilong helpim yupela, traim mekim ol dispela samting:

Yutupela wan wan i ken wokim tupela lista. Long namba 1 lista, raitim ol tok em yu tingim olsem i bikpela samting. Long namba 2 lista, raitim ol samting em yu laik stori wantaim poroman long en. Bihain yupela i ken skelim ol samting yupela i bin raitim long lista. Ating bai yupela i luksave olsem i gat sampela samting yutupela i wanbel long en. Sapos yupela i mekim olsem, dispela bai helpim yupela long daunim laik bilong yupela na bihainim tingting bilong narapela narapela. Taim yutupela i raitim long pepa ol samting yupela i no wanbel long en, dispela inap helpim yupela long stori gut long ol dispela samting.

Kamapim tingting bilong yupela. Sampela hevi i no bikpela na yu inap long stretim. Tasol sampela hevi i bikpela na i hatwok long stretim. Olsem na tupela marit i ken kamapim tingting bilong ol long narapela narapela long olsem wanem ol bai stretim dispela hevi, na nau ol i ken wanbel long samting ol bai mekim.—Stiatok bilong Baibel: Saveman 4:9.

Redi long bihainim tingting bilong poroman marit. Baibel i tok: “Yupela olgeta wan wan i mas laikim ol meri bilong yupela olsem yupela i save laikim yupela yet. Na maritmeri i mas i gat bikpela rispek long man bilong en.” (Efesus 5:33) Taim ol marit i laikim na rispektim narapela narapela, ol bai redi long senisim tingting bilong ol yet na bihainim tingting bilong poroman marit. Wanpela man marit, em Cameron i tok: “I gat sampela samting yu no gat laik long mekim, tasol poroman marit inap stiaim tingting bilong yu na bihain yu tu bai amamas long ol samting em i laikim.”—Stiatok bilong Baibel: Stat 2:18.