Nius I Kam Long Olgeta hap

ISRAEL, JORDAN, NA PALESTAIN

Mak bilong raunwara Detsi i wok long go daun inap olsem wan mita long olgeta wan wan yia. Sampela man i ting long yia 2050, dispela raunwara bai i drai olgeta, olsem na ol saveman i traim long stretim dispela hevi. Wanpela samting ol i laik mekim em long rausim sol i stap long solwara Retsi bilong ol man i ken yusim, na bihain ol i ken stiaim ron bilong wara we i gat sol long en i go long raunwara Detsi. Tasol sampela man i ting dispela pasin inap bagarapim ol pis na gras samting insait long solwara Detsi.

JEMANI

Wanpela insurens kampani i mekim wok painimaut na ol i tok, long de bilong Krismas, inap olsem 30 pesen bilong ol man i kisim sik hat atek i save go long haus sik winim olgeta narapela de long yia. As bilong dispela em ol famili na ol pren bilong ol dispela man i save givim bikpela presa long ol long baim ol presen.

BRITEN

Ol saientis bilong Briten i ting wanpela sel bilong solwara long Aislan (Icelandic mollusk) i gat 405 krismas long taim em i dai long 2006, tasol tru tru em i gat 507 krismas long dispela taim. Dispela i soim olsem dispela sel i bin stap laip winim olgeta narapela animala long graun olgeta. Dispela sel i dai taim ol saientis i putim em long frisa bilong kisim i go long laboritori bilong ol.

LATIN AMERIKA NA KARIBIAN

Long wanpela bung long Havana, long Kuba long kirap bilong dispela yia, 33 kantri em ol i stap olsem memba bilong Latin Amerika na Karibian i tokaut olsem ol i no inap pait long narapela narapela bilong stretim ol hevi. Wanpela bilong ol bikman husat i bin go long dispela bung em sekreteri bilong Yunaitet Nesen, Ban Ki-moon.