NIUS I KAM LONG OLGETA HAP
Nius Bilong Lotu
I tru olsem lotu i mas helpim ol man long i stap wanbel. Tasol planti taim lotu i as bilong ol pait na pasin bilong i no trastim ol narapela.
Graun Olgeta
Winim 75 pesen bilong ol man i stap long ol kantri we i gat tambu long lotu, long wanem, gavman i putim ol lo o ol man i birua long narapela narapela. Insait long 5-pela yia i go pinis, pasin bilong ol man long birua long lotu i go bikpela tru insait long planti kantri.
TINGIM: Wanem sampela risen na ol man i no bilip long lotu?—Matyu 23:27, 28; Jon 15:19.
INGLAN
Praim minista bilong Inglan long bipo em Tony Blair i mekim dispela tok long niuspepa Observer olsem, planti taim “ol man i yusim lotu” bilong mekim pasin teroris. Na tu, em i tok: “Long yia 1900 i go 2000, wok politik i as bilong ol pait we i bin kamap. Tasol long nau ol man bilong narapela narapela kantri na sindaun, na ol lotu i as bilong ol pait.”
TINGIM: Bilong wanem planti taim lotu i as na ol man i no stap wanbel?—Mak 7:6-8.
AUSTRALIA
Lain Australian Bureau of Statistics i tok, 1-pela long olgeta 5-pela man i tok ol i no memba bilong wanpela lotu. Na tu, ol i tok: “Dispela i makim olsem ol i no insait long ol wok bilong lotu.” Inap olsem 15 pesen bilong ol man na 22 pesen bilong ol meri i tok ol i memba bilong ol lotu na ol i givim bel tru long mekim ol wok bilong lotu.
TINGIM: Ol samting ol lotu i mekim long nau i kamapim wanem ol pasin nogut?—Matyu 7:15-20.