Ol Tokples i No Pasim Ol Wok—Ol i Mekim

PASLAIN long ol Witnes Bilong Jehova i trensletim ol buk na nius, ol i save skelim gut ol samting, mekim ol wok painimaut, na raitim ol tok. Taim ol i mekim olsem, Dipatmen Bilong Raitim Tok em ol i kolim Writing Department long hetkota bilong ol long Amerika i save sekim olsem olgeta tok ol i raitim i tru na i stret, na ol man long nau i yusim ol dispela tok.a

Bihain Writing Department i salim ol atikol i go long planti handret trenslesen tim long graun olgeta, planti i stap long ol ples we ol man i mekim tokples ol i trensletim ol buk na nius long en. Na planti bilong ol i mekim wok trenslesen long tokples bilong ol yet. Ol trensleta i mas ritim na kliagut long Inglis na tokples ol i trensletim tok i go long en.

Ol trensleta i save mekim wok bilong ol olsem wanem?

Geraint em trensleta long Briten i tok: “Mi save wok long wanpela trenslesen tim, so pasin bilong wok gut wantaim i bikpela samting. Mipela i painim ol rot bilong winim ol hevi em ol trensleta i save bungim. Taim mipela i mekim olsem, mipela i no save tingting tasol long trensletim olgeta wan wan wed, nogat. Mipela i wok strong long kamapim gut mining na tingting em Inglis i kamapim, na oltaim mipela i tingim ol man husat bai ritim ol atikol mipela i trensletim.”

Wanem nambawan wok bilong yu olsem trensleta?

“Nambawan wok bilong mipela ol trensleta em long mekim gut wok trenslesen na bai man i rit i pilim olsem mipela i bin raitim dispela stori long dispela tokples yet. Na man i no ken ritim olsem tok ol i trensletim. Olsem na mipela i wok strong long yusim ol tok we i stret long tokples bilong ol. Taim mipela i bihainim dispela pasin long wok trenslesen, oltaim ol man i amamas long rit na dispela i kain olsem man i kaikai wanpela gutpela kaikai na em i laikim sampela kaikai moa.”

Wanem ol gutpela samting i kamap taim trensleta i stap long ples we planti man i mekim dispela tokples?

“Taim mipela i stap long hap we ol man i mekim dispela tokples, dispela i helpim mipela long trensletim ol tok long pasin we i no hatwok long ol i kliagut. Long Wels, planti man i save mekim tok Wels, olsem na mipela i harim dispela tokples long olgeta de. Na tu, mipela i ken askim ol man long tingting bilong ol long ol tok mipela i laik yusim. Olsem ol dispela tok i stret na i klia, na ol man i amamas long ritim o nogat. Taim mipela i mekim olsem dispela i helpim mipela long kamapim wankain tingting i stap long Inglis.”

Yupela i mekim wok olsem wanem?

“Wanpela tim i save wok long wanpela projek. Pastaim, wan wan tim memba i ritim atikol na bai ol i save atikol i stori long wanem samting, ol i bihainim wanem kain pasin bilong rait, na ol i luksave long wanem lain bai stap olsem odiens bilong ol. Mipela i save askim mipela yet olsem: ‘Wanem bikpela tok bilong atikol? Mi bai kisim wanem skul taim mi ritim?’ Ol kain askim olsem i helpim mipela long tingim ol bikpela tok bilong atikol taim mipela i trensletim.

“Bihain olgeta long dispela tim i bung wantaim na kamapim tingting bilong ol, na dispela i helpim ol long kisim skul long narapela narapela. Yumi kliagut long bikpela tok atikol i kamapim? Hau bai mipela i bihainim wankain pasin bilong rait olsem long Inglis? Bikpela samting em mipela i laik kamapim wankain tingting olsem Inglis long tokples mipela i trensletim ol buk na nius samting long en, na bai man i ritim atikol i kisim wankain save olsem man i rit long Inglis.”

Hau na olgeta long tim i wok bung wantaim?

“Bikpela tingting bilong mipela em olsem, taim man i ritim ol dispela atikol long fes taim em i mas kliagut long en. Em risen na inap planti taim mipela i save ritim bikpela ol tok bilong atikol long kirap i go long pinis bilong en.

“Trensleta i save trensletim wanpela paragraf long tokples, na mipela ol narapela i save lukim ol tok em i raitim long kompiuta bilong mipela. Mipela bai sekim olsem olgeta tingting long Inglis i stap long tok mipela i trensletim, na mipela i no rausim o putim ekstra tok. Na tu, mipela i save sekim speling, krai bilong sentens, na ol lo bilong rait na kolim tok. Bihain wanpela bai ritim bikpela dispela paragraf na bai olgeta i harim. Sapos ol i luksave olsem tok i no krai gut, orait ol bai sekim gen paragraf bilong luksave long hevi bilong en. Taim ol i trensletim pinis olgeta tok, wanpela tim memba bai ritim gen, na taim ol i putim yau ol i raitim sampela tok long pepa long ol hap we ol i ting ol i mas mekim sampela senis na bai olgeta tok i krai gut.”

Em bikpela wok tru!

“Yes, em bikpela wok tru! Na long apinun mipela i pilim taiet. Olsem na long neks de long moning, taim tingting i wok gut mipela i ritim na sekim gen dispela atikol. Sampela wik bihain, Writing Department i salim wanpela kopi we i gat ol senis long en, na mipela i mekim ol wankain senis long ol atikol mipela i trensletim. Na nau mipela i ritim na stretim gen ol tok.”

Yupela i yusim wanem ol program bilong kompiuta?

“Ol kompiuta i no inap mekim wok olsem wanpela trensleta. Tasol ol Witnes Bilong Jehova i kamapim sampela program bilong helpim wok bilong trensletim ol buk na nius samting. Wanpela bilong ol dispela program em wanpela kain dikseneri we i gat ol tok em planti taim mipela i mekim wok long en. Na narapela em wanpela program i gat ol pablikesen we tim bilong mipela i bin trensletim pinis na inap helpim mipela long trensletim sampela tok mipela i pilim olsem i hatwok long trensletim.”

Yu gat wanem tingting long wok bilong yu?

“Mipela i tingim wok bilong mipela olsem presen bilong helpim ol narapela man. Na mipela i laik mekim gut dispela wok na bai ol man i amamas long ritim na kisim helpim long ol tok bilong en. Mipela i amamas tru taim mipela i lukim olsem wanpela man i ritim wanpela atikol long magasin o tok long Web-sait na em i mekim sampela gutpela senis long i stap bilong en.”

Save Yu Kisim Bai Helpim Yu Inap Oltaim

Long graun olgeta, planti milion manmeri i kisim helpim long rot bilong ritim ol buk na nius bilong ol Witnes Bilong Jehova long tokples bilong ol yet. Baibel i as bilong olgeta tok i stap long ol vidio, ol buk na nius, na long Web-sait bilong ol em jw.org. Baibel i kamapim nem bilong God em Jehova. Na God i tokim yumi olsem em i laik bai ol man “long olgeta kantri, na olgeta lain, na olgeta tokples,” i mas kisim save long em.—Revelesen 14:6.b