Rot Bilong Stretim Ol Hevi

HATWOK BILONG EN

Taim yu na poroman marit bilong yu i laik stretim wanpela hevi, ating pastaim yutupela i toktok gut. Tasol olsem wanem? Bihain long yupela i toktok, yu bel hevi yet? Sapos olsem, yu inap stretim dispela hevi. Pastaim, yu mas save gut olsem man na meri i gat narapela narapela pasin bilong toktok.a

SAMTING YU MAS SAVE LONG EN

Ol meri i save toktok hariap long ol hevi paslain long ol i harim rot bilong stretim hevi. Ol i ting pasin bilong toktok inap stretim ol hevi.

“Mi amamas taim mi tokaut long tingting bilong mi long man bilong mi, na mi save olsem em i kliagut long tok mi kamapim. Bihain long mipela i toktok inap sampela minit, nau mi amamas na mi no wari moa long dispela hevi.”—Sirppa.b

“Mi no inap lusim tingting long dispela hevi sapos mi no kamapim tingting tru bilong mi long man bilong mi. Taim mi tokaut long hevi, nau mi no tingim moa.”—Ae-Jin.

“Pasin bilong toktok i olsem wok painimaut. Taim mi toktok, mi inap skelim gut olgeta samting na kliagut long risen na hevi i kamap.”—Lurdes.

Ol man i save tingting long stretim ol hevi. Ol man i pilim olsem, long wanem, taim ol i stretim hevi ol i ting olsem ol i mekim gutpela wok. Na tu, ol i soim olsem meri inap kisim helpim long ol. Olsem na ol man marit i save tingting planti sapos meri i no amamas long tingting ol i kamapim. Kirk em wanpela man marit i tok: “Mi no klia wai na yu kamapim dispela hevi sapos yu no laik stretim!”

Tasol wanpela buk (The Seven Principles for Making Marriage Work) i tok: “Yu mas kliagut long hevi paslain long yu givim edvais. Na yu mas tokim poroman marit bilong yu olsem yu pilim tru tingting bilong em na yu laik bai yutupela wantaim i stretim dispela hevi, na no ken hariap long kamapim tingting bilong yu. Planti taim poroman marit bilong yu i laik bai yu putim gut yau long tingting em i kamapim, na i no olsem yu mas painim rot bilong stretim dispela hevi.”

SAMTING YU KEN MEKIM

Ol man marit: Kisim pasin bilong putim gut yau na kliagut long tingting bilong meri bilong yu. Tomas em wanpela man marit i tok: “Sampela taim bihain long mi putim yau long meri bilong mi, mi save askim mi yet, ‘Bai mi mekim wanem?’ Tasol planti taim em i laik bai mi putim yau tasol long tok bilong em.” Narapela man marit em Stephen i wanbel long dispela tok. Em i tok: “Mi luksave olsem i gutpela moa long larim meri bilong mi i kamapim tingting bilong en na mi no ken katim tok bilong em. Olsem na planti taim bihain long em i pinisim tok bilong em, em i save tok em i amamas.”

Traim dispela: Long bihain, sapos yu na meri bilong yu i laik stretim wanpela hevi, orait sakim pasin bilong hariap long givim edvais. Lukluk long em na tingim ol tok em i kamapim. Meknaisim het bilong soim olsem yu wanbel long tok bilong em. Kolim gen ol tok bilong em bilong soim olsem yu kliagut long tok em i mekim. Charles em wanpela man marit i tok: “Sampela taim meri bilong mi i laik save sapos mi kliagut long tingting bilong em na mi sapotim em.”—Stiatok bilong Baibel: Jems 1:19.

Ol meri marit: Kamapim tingting bilong yu long man bilong yu. Eleni em wanpela meri marit i tok: “Mipela i laik bai man bilong mipela i save long wanem samting mipela i nidim. Tasol sampela taim mipela i mas tokaut klia long tingting bilong mipela.” Ynez em narapela meri marit i stori long samting em inap long mekim, olsem: “Mi inap tok, ‘Mi bel hevi long wanpela samting na mi laik bai yu putim yau tasol long tok bilong mi. I no olsem yu mas stretim dispela hevi, tasol mi laik bai yu save long tingting bilong mi.’”

Traim dispela: Sapos man bilong yu i hariap long kamapim tingting bilong em long rot bilong stretim hevi, orait no ken ting olsem em i no tingim yu. Ating em i laik helpim yu. Ester em wanpela meri marit i tok: “Mi no save kros, mi luksave olsem man bilong mi i tingim mi na em i laik harim tok bilong mi, na tu, em i laik helpim mi.”—Stiatok bilong Baibel: Rom 12:10.

Man na meri marit: Yumi save mekim gut long ol narapela na yumi laik bai ol i mekim wankain pasin long yumi. Olsem na taim yupela i toktok bilong stretim ol hevi, yu mas tingim pasin em yu laik bai poroman marit bilong yu i mekim long yu. (1 Korin 10:24) Miguel em wanpela man marit i tok: “Sapos yu wanpela man marit, yu mas redi long putim yau long meri bilong yu. Na sapos yu wanpela meri marit, sampela taim i gutpela long yu redi long harim tingting bilong man bilong yu long rot bilong stretim ol hevi. Taim yutupela wantaim i daunim laik na tingting bilong yupela, dispela bai helpim yupela long stap wanbel.”—Stiatok bilong Baibel: 1 Pita 3:8.