Pasin Laikim

OLGETA MAN I LAIK BAI OL NARAPELA I LAIKIM OL. Pasin laikim i mas i stap namel long ol marit, ol famili, na ol pren. Man i gat pasin laikim bai i gat gutpela helt na em bai i stap amamas. “Pasin laikim” i makim wanem samting?

Pasin laikim yumi stori long en i no makim pasin laikim namel long man na meri, nogat. Em pasin laikim we i kirapim man long tingim laik bilong ol narapela na putim i stap namba 1, winim bilong em yet. Ol stiatok bilong Baibel i kamapim dispela pasin laikim, na tu, bel i kirapim man long kamapim dispela pasin.

Baibel i stori gut long pasin laikim na i tok: “Man i gat pasin laikim em i no save les kwik, na em i save mekim gutpela pasin. Em i no save jeles, em i no save hambak, em i no gat pasin antap, em i no save bikhet nabaut, em i no save tingim em yet, na em i no save belhat kwik. Em i no save tingim rong ol arapela i mekim long em. Em i no save amamas long ol pasin i no stret, nogat, em i save amamas long ol pasin i tru. Em i no save larim wanpela samting i daunim em, . . . em i save wetim ol gutpela samting i kamap, na em i save sanap strong long olgeta hevi i kamap long em. Pasin laikim i no inap pinis.”—1 Korin 13:4-8.

Kain pasin laikim “i no inap pinis,” em bai stap oltaim. Em inap kamap strong moa insait long sampela haptaim. Man i gat pasin laikim i no save les kwik, em i save mekim gutpela pasin na fogivim ol narapela. Dispela “em i nambawan gutpela rot bilong mekim ol man i kamap wanbel.” (Kolosi 3:14) Taim pasin laikim i stap namel long ol man, dispela bai helpim ol long i stap amamas na bel isi maski ol no gutpela olgeta. Tingim pasin laikim insait long marit.

“PASIN LAIKIM EM I NAMBAWAN GUTPELA ROT BILONG MEKIM OL MAN I KAMAP WANBEL”

Jisas Krais i skulim ol man long ol bikpela stiatok long marit. Em i tok: “Man bai lusim papa na mama bilong en na pas wantaim meri bilong en, na tupela bai kamap wanpela bodi’ . . . Olsem na samting God i pasim pinis, man i no ken katim.” (Matyu 19:5, 6) I gat 2-pela bikpela stiatok em ves i kamapim.

“TUPELA BAI KAMAP WANPELA BODI.” Insait long marit, man na meri i save pas gut, na pasin laikim i lukautim marit na ol i no mekim pasin adaltri—man marit na meri marit i “kamap wanpela bodi” wantaim wanpela i no poroman marit bilong ol. (1 Korin 6:16; Hibru 13:4) Pasin bilong i no stap gut long poroman marit inap bagarapim marit na narapela i no trastim narapela. Dispela inap bagarapim tru bel bilong ol pikinini na ol bai pret, belhat, na pilim olsem i no gat man i laikim ol.

“SAMTING GOD I PASIM PINIS.” Marit em samting i holi. Ol marit i rispektim marit olsem samting i holi bai wok strong long lukautim marit bilong ol. Ol i no hariap long divos taim hevi i kamap. Pasin laikim bilong ol i stap strong tru. Taim ol marit i gat dispela pasin laikim, ‘ol i no save larim wanpela samting i daunim ol,’ nogat, ol bai wok strong long stretim ol hevi na stap wanbel na bel isi.

Taim pasin laikim i stap namel long ol papamama, dispela bai helpim tru ol pikinini. Jessica i gat 20 krismas, na em i tok: “Papa na Mama i laikim tru na rispektim narapela narapela. Taim mi lukim Mama i rispektim Papa taim em i stretim mipela ol pikinini, dispela i kirapim mi long mekim wankain pasin olsem em.”

Pasin laikim em nambawan bikpela pasin bilong God. Baibel i tok: “God em i pasin laikim.” (1 Jon 4:8) Yumi no kirap nogut long Baibel i kolim Jehova olsem “God bilong amamas.” (1 Timoti 1:11) Yumi tu bai stap amamas sapos yumi wok strong long bihainim ol gutpela pasin bilong Krieta—moa yet em pasin laikim. Efesus 5:1, 2 i tok: “Yupela i mas bihainim pasin bilong God, em i laikim yupela tumas na yupela i stap olsem ol pikinini bilong em.”