4 Fogivim

MAKIM WANEM SAMTING

Fogivim narapela i makim olsem yu no tingim rong na holim bel kros long rong narapela i mekim. Pasin bilong fogivim narapela i no makim olsem yu no tingim popaia na yu mekim olsem dispela hevi i no bin kamap.

STIATOK BILONG BAIBEL: “Yupela i mas wok yet long karim hevi narapela i putim long yupela na amamas long fogivim narapela, na mekim olsem maski sapos i gat as na wanpela i gat tok long narapela.”—Kolosi 3:13.

“Taim yu laikim wanpela, bai yu no tingim popaia bilong em, bai yu tingim ol samting em i mekim bilong kamap gutpela man o meri.”—Aaron.

WAI NA EM I BIKPELA SAMTING

Sapos yu holim bel kros, dispela inap nogutim helt na tingting bilong yu, na tu, em inap bagarapim marit bilong yu.

“Wanpela taim man bilong mi i tok sori long wanpela samting we i mekim mi bel hevi tru. I hatwok long mi fogivim em. Bihain mi lusim rong bilong em, tasol mi bel hevi olsem mi no bin mekim hariap. Dispela i kamapim hevi we mipela inap daunim na inap bagarapim pasin bilong mipela long pas gut.”—Julia.

SAMTING YU KEN MEKIM

ASKIM YU YET

Taim yu bel hevi long tok o samting poroman marit i mekim, askim yu yet:

• ‘Mi save bel hevi kwik?’

• ‘Dispela hevi i bikpela tru na poroman marit i mas tok sori long mi, o mi inap lusim tingting tasol long en?’

TOKTOK WANTAIM POROMAN MARIT

• Bihain long hamas minit o aua samting na mipela i fogivim narapela narapela?

• Mipela i ken mekim wanem na bai mipela i hariap long fogivim narapela?

SAMPELA ROT

• Taim yu bel hevi no ken kamapim ol pasin nogut bilong poroman marit.

• Tingim olsem “yumi olgeta i save popaia” na poroman marit bilong yu inap popaia tu.—Jems 3:2.

Em isi long fogivim narapela sapos yutupela wantaim i popaia, tasol i hatwok moa taim wanpela tasol i popaia. Pasin bilong kisim tok sori na fogivim narapela i kamapim pasin daun tru.”—Kimberly.

STIATOK BILONG BAIBEL: “Hariap na stretim tok.”—Matyu 5:25.