Rot Bilong Daunim Pasin Bilong Bel Nogut

HATWOK BILONG EN

Yu no inap lusim tingting long ol hatpela tok na ol pasin kranki bilong poroman marit bilong yu. Ol dispela samting i pas strong long tingting bilong yu. Bipo yu bin laikim em tru, tasol nau yu bel nogut long em. I luk olsem i nogat wanpela samting yu inap mekim long stretim dispela hevi. Maski i olsem, yu mas strong long mekim pasin laikim insait long marit bilong yu.

Yu ken bilip tru olsem yu inap long stretim dispela hevi. Tasol pastaim, yumi ken skelim sampela samting em pasin bilong bel nogut i save kamapim.

SAMTING YU MAS SAVE LONG EN

Pasin bilong bel nogut inap bagarapim marit. Bilong wanem yumi tok olsem? Long wanem, dispela pasin i save daunim olgeta gutpela pasin we i save strongim marit, olsem pasin bilong laikim na trastim poroman, na pasin bilong i stap gut long narapela. Olsem na pasin bilong bel nogut em wanpela hevi insait long marit. Em as na Baibel i tok: “Yupela i mas rausim olgeta pasin bilong bel nogut.”—Efesus 4:31.

Sapos yu bel nogut long narapela, dispela i nogutim yu yet. Dispela pasin i olsem yu paitim yu yet na yu laik narapela man i pilim pen. Long buk Healing From Family Rifts, Mark Sichel i tok: “Taim yu bel nogut long wanpela long famili, dispela i no givim hevi long em, nogat, em i amamas na em i no tingting planti long dispela samting.” Yumi kisim wanem skul long dispela? Sichel i tok: “Pasin bilong bel nogut i save nogutim yu moa yet, winim man o meri yu bel nogut long en.”

Man yet i mekim disisen long bel nogut. Sampela man i gat tupela tingting long dispela tok. Ating ol bai tok: ‘Poroman marit bilong mi i mekim na mi bel nogut long em.’ Dispela kain tingting inap makim olsem yumi sutim tok long pasin bilong poroman marit bilong yumi, em samting yumi no inap kontrolim. Tasol Baibel inap stretim tingting bilong yumi. Em i tok: “Olgeta man wan wan i mas skelim wok bilong ol yet.” (Galesia 6:4) Yumi no inap long bosim tok o pasin narapela i mekim long yumi, tasol yumi inap bosim pasin yumi mekim long kain taim olsem. I gat planti rot bilong stretim hevi, na i no long rot bilong bel nogut long narapela.

SAMTING YU KEN MEKIM

Tingim olsem yu yet i bel nogut. Em i isi tru long sutim tok long poroman marit bilong yu. Tasol tingim olsem yu yet i mekim disisen long bel nogut. Na dispela i wankain tu long pasin bilong fogivim narapela. Yu inap bihainim tok bilong Baibel olsem: “No ken larim san i go daun na yupela i belhat yet.” (Efesus 4:26) Pasin bilong fogivim narapela inap helpim yu long holim stretpela tingting long ol samting yu ken mekim bilong stretim hevi long marit bilong yu.—Stiatok bilong Baibel: Kolosi 3:13.

Skelim gut pasin bilong yu. Baibel i tokaut olsem sampela man i save “belhat kwik” na “kros.” (Sindaun 29:22) Olsem wanem? Yu save mekim olsem? Askim yu yet: ‘Mi save bel nogut? Mi save bel hevi hariap long tok bilong ol narapela? Mi save bel hevi na toktok planti long ol liklik samting?’ Baibel i tok: “Sapos man i toktok nabaut long wanpela rong, orait em bai i mekim man i kros long pren bilong en.” (Sindaun 17:9; Saveman 7:9) Dispela pasin inap kamap insait long marit tu. Olsem na sapos yu gat pasin bilong bel nogut long narapela, askim yu yet, ‘Mi inap bosim gut bel na bai mi no ken kros kwik long poroman marit bilong mi?’—Stiatok bilong Baibel: 1 Pita 4:8.

Makim wanem samting i bikpela samting tru. Baibel i tok i gat “taim bilong pasim maus na taim bilong toktok.” (Saveman 3:7) I no olsem yu mas stretim olgeta liklik hevi wantaim man husat i bagarapim bel bilong yu. Sampela taim yu ken “tingting gut long dispela tok, na pasim maus.” (Song 4:4) Sapos wanpela hevi i kamap na yu mas toktok wantaim poroman marit bilong yu long dispela samting, mobeta yu wet inap long taim bel bilong yu i kol. Wanpela meri marit nem bilong em Beatriz i tok: “Taim mi bel hevi, mi save wet inap long taim bel bilong mi i kol. Sampela taim mi luksave olsem dispela hevi i no bikpela samting, na nau mi inap toktok long pasin rispek.”—Stiatok bilong Baibel: Sindaun 19:11.

Kliagut long mining bilong tok “fogivim.” Long Baibel long tok Hibru, dispela tok “fogivim” inap makim olsem yumi lusim wanpela samting i go na yumi no tingim moa. Olsem na taim yumi fogivim narapela, dispela i no makim olsem yumi tingim dispela hevi olsem liklik samting o yumi ting olsem dispela samting i no bin kamap tru, nogat. Dispela i makim olsem yu no tingim rong narapela i mekim long yu. Na tu, yu luksave olsem pasin bilong bel nogut inap bagarapim helt bilong yu na marit bilong yu.