HAP TRI
BEL HEVI “Maski Sapos i Gat As na Wanpela i Gat Tok Long Narapela”
“Wanpela sista long kongrigesen i sutim tok olsem mi bin stilim mani bilong em. Sampela long kongrigesen i harim na ol i ting dispela tok i tru. Bihain, dispela sista i tokim mi olsem em i kisim save olsem mi no bin stilim mani bilong em. Maski em i tok sori, mi tingim hevi mi karim na mi pilim olsem mi no inap long fogivim em.”—Linda.
LINDA i bel hevi tru long pasin wanbilip bilong en i mekim. Yu pilim hevi bilong en? Sori tru olsem sampela i bel hevi long pasin bilong ol narapela, na ol i lusim pasin bilong go long miting na autim tok samting. Olsem wanem? Wankain hevi i bin painim yu?
Husat Inap “Tekewe Yumi Long Pasin Laikim Bilong God?”
Em tru olsem sampela taim i hatwok long fogivim wanbilip bilong yumi sapos ol i rongim yumi. Olsem na Baibel i tok ol Kristen i mas laikim narapela narapela. (Jon 13:34, 35) Sapos wanbilip i rongim yumi, yumi inap bel hevi tru na dispela inap long daunim yumi.—Song 55:12.
Baibel i tok, sampela taim “i gat as na wanpela [Kristen] i gat tok long narapela.” (Kolosi 3:13) Maski i olsem, taim kain samting olsem i kamap long yumi, ating i hatwok long karim dispela hevi. Olsem wanem? I gat rot bilong kisim helpim? Yumi ken stori long 3-pela stiatok bilong Baibel:
Papa bilong yumi long heven i save lukim olgeta samting. Jehova i lu2kim olgeta samting i kamap, na em i save tu long taim wanpela i rongim yumi na yumi bel hevi. (Hibru 4:13) Na tu, taim hevi i painim yumi Jehova i save pilim hevi bilong yumi. (Aisaia 63:9) Jehova i no save larim “hevi o taim nogut,” o wanpela wokman bilong en i mekim yumi bel hevi na dispela i “tekewe yumi long pasin laikim bilong God.” (Rom 8:35, 38, 39) Olsem na yumi no ken larim wanpela samting o wanpela man i pasim yumi long lotuim Jehova.
Taim yu fogivim narapela, i no olsem yu orait long pasin bilong em. Taim yumi fogivim ol man i rongim yumi, dispela i no makim olsem yumi orait long pasin bilong ol, o ting olsem rong ol i mekim i liklik samting, nogat. Tingim, Jehova i no orait long man i mekim rong, tasol em i save fogivim man sapos em i tanim bel. (Song 103:12, 13; Habakuk 1:13) Jehova i save fogivim ol narapela, olsem na em i laik yumi tu i mas bihainim dispela pasin. Baibel i tok long God olsem, “belhat bilong en i no save stap longpela taim.”—Song 103:9; Matyu 6:14.
Taim yumi lusim pasin bilong bel nogut, dispela i helpim yumi yet. Bilong wanem yumi tok olsem? Tingim, sapos yu apim wanpela ston i no hevi tumas na yu holim inap sotpela taim, ating dispela i no inap givim hevi long yu. Tasol olsem wanem sapos yu holim dispela ston inap sampela minit, 1-pela aua, o inap longpela taim liklik? Ating bai yu pilim olsem han bilong yu i tait tru, long wanem, yu bin holim ston longpela taim na nau dispela i givim hevi long yu! Na dispela i wankain long pasin bilong bel nogut. Taim yumi bel nogut long wanpela, maski em i rongim yumi long liklik samting, dispela inap long givim hevi long yumi yet. Olsem na Jehova i tok long yumi mas lusim pasin bilong bel nogut. Tru tumas, taim yumi fogivim ol narapela, orait yumi helpim yumi yet.—Sindaun 11:17.
Taim yumi lusim pasin bilong bel nogut, dispela i helpim yumi yet
“Mi Pilim Olsem Jehova i Toktok Long Mi”
Wanem samting i helpim Linda long no ken bel nogut long wanbilip i rongim em? Wanpela samting i olsem, em i tingim ol stiatok bilong Baibel i stori long pasin bilong fogivim narapela. (Song 130:3, 4) Linda i save olsem taim em i fogivim ol narapela, Jehova bai fogivim em tu. (Efesus 4:32–5:2) Ol stiatok bilong Baibel i helpim Linda, olsem na em i tok: “Mi pilim olsem Jehova i toktok long mi.”
Bihain, Linda i lusim pasin bilong bel nogut. Em i fogivim dispela sista, na tupela i stap olsem ol gutpela pren. Nau Linda i givim bel tru long mekim wok bilong Jehova. Yu ken bilip tru olsem Jehova i laik bai yu stap amamas, olsem na em bai helpim yu long daunim pasin bilong bel nogut.