Fogivim Ol Narapela

STIATOK BILONG BAIBEL: “Yupela i mas wok yet long . . . fogivim narapela, na mekim olsem maski sapos i gat as na wanpela i gat tok long narapela. Jehova i amamas long fogivim yupela, olsem na yupela tu i mas mekim wankain pasin.”—Kolosi 3:13.

Wanem insait bilong dispela tok? Baibel i tok taim man i mekim rong i olsem em i gat dinau, na pasin bilong fogivim narapela i wankain long man i lusim dinau bilong em. (Luk 11:4) Wanpela buk i stori olsem Baibel i yusim tok Grik ol i tanim olsem “fogivim” long makim olsem “man i lusim dinau bilong narapela, na em i no askim em long bekim dinau.” Olsem na taim yumi fogivim man i rongim yumi, yumi no ken ting olsem em i mas mekim sampela samting na bai yumi lusim rong bilong en. Yumi redi long fogivim narapela, tasol dispela i no makim olsem yumi orait long pasin ol i mekim o yumi tingim rong bilong ol i liklik samting, nogat. Yumi daunim pasin bilong bel nogut, maski “sapos i gat as na [yumi] gat tok long narapela.”

Dispela savetok inap helpim yumi long nau? Olgeta man i gat sin. (Rom 3:23) Olsem na em i bikpela samting long fogivim ol narapela, long wanem, sapos yumi rongim ol narapela ol bai fogivim yumi tu. Na tu, pasin bilong fogivim narapela inap helpim yumi. Bilong wanem yumi tok olsem?

Sapos yumi no fogivim ol narapela na yumi bel nogut long ol, i olsem yumi putim hevi long yumi yet. Pasin bilong bel nogut inap long pinisim amamas bilong yumi, pasim yumi long mekim ol wok bilong wan wan de, na tu, nogutim helt bilong yumi. Andrew Steptoe em profesa bilong saikoloji na Dokta Yoichi Chida i raitim wanpela ripot long buk Journal of the American College of Cardiology na ol i tok: “Ol saveman long nau i mekim wok painimaut na ol i tok ol man i gat pasin bilong belhat na bel nogut inap long kisim sik bilong klok.”

Tasol man i gat pasin bilong fogivim ol narapela em i stap gut. Taim yumi lusim rong bilong ol narapela, yumi inap long i stap wanbel wantaim ol. Na bikpela samting em olsem, yumi bihainim pasin bilong God long fogivim ol man i hevi long rong bilong ol na tanim bel.—Mak 11:25; Efesus 4:32; 5:1.