Bilong Wanem Yu Mas Lusim Rong Bilong Man?

WANPELA saveman Juda i save raitim ol buk (Joseph Jacobs), em i tok, “i hatwok tru” long lain long mekim pasin sori na lusim rong bilong man. Tru tumas, planti man i hatwok tru long mekim tok olsem: “Mi lusim rong bilong yu.”

Pasin bilong lusim rong i kain olsem pasin bilong lusim mani. Yumi inap sori na lusim planti mani bilong helpim ol man, o yumi inap pasim bel na bungim i stap bilong helpim yumi yet. Pasin sori em pasin bilong God. Yumi mas lain long mekim pasin sori na lusim planti rong. Bilong wanem yumi mas mekim olsem? Long wanem, em laik bilong God, na sapos yumi bel nogut na laik bekim nogut long man, dispela bai mekim hevi i go bikpela.

Inap 7-pela yia wanpela meri i no laik toktok wantaim tambu bilong em. Meri i tok: “Em i rongim mi tru na mi no inap lusim tingting long dispela.” Tasol sapos yu ting wanpela man i bin rongim yu na yu givim baksait long em bambai em i ken pilim na kam tok sori long yu, o yu mekim bilong givim strafe long em, bai dispela i no inapim laik bilong yu long bekim rong bilong em. Dispela bai mekim hevi i stap longtaim, na mekim yu i bel nogut tru long em. Na sapos yu no lusim dispela laik bilong bekim rong, bai yutupela i no inap i stap pren moa, na ating bai yu gat sik long dispela.

Samting Nogut i Save Kamap

Taim man i no laik lusim rong bilong narapela, hevi i save kamap na tingting bilong em i no inap i stap isi. Dispela inap mekim na bai em i gat bikpela sik. Wanpela buk i stori long ol sik na i tok: “Ol ripot . . . i makim olsem: Long ol man i go lukim dokta, planti tru (66 pesen) ol i gat hevi long tingting na dispela i mekim na ol i gat sik long skin.”

Tru tumas, pasin bilong bel nogut, belhat, na tingting long bekim nogut, dispela i save nogutim man wankain olsem ros i save bagarapim ka. Long ausait, ka i luk olsem i gutpela, tasol aninit long pen bilong en, ros i wok isi isi long bagarapim.

Bikpela samting moa, em olsem: Sapos yumi no laik sori na lusim rong bilong man, dispela inap bagarapim yumi long ol samting bilong spirit. Long ai bilong God Jehova yumi inap kamap olsem dispela wokboi long tok piksa bilong Jisas. King i lusim bikpela dinau tru bilong dispela wokboi, tasol taim wanpela wanwok i askim em long sori long em na lusim liklik dinau bilong em, wokboi i no laik na em i mekim hatpela pasin. Jisas i kamapim klia olsem sapos yumi mekim kain pasin olsem, na yumi no laik lusim rong bilong man, orait Jehova i no ken lusim ol rong bilong yumi. (Matyu 18:​21-35) Olsem na sapos yumi no lusim rong bilong man, bai yumi gat asua long ai bilong God, na yumi inap lus long kisim laip long bihain! (Lukim 2 Timoti 1:⁠3.) Orait, yumi mas mekim wanem?

Lain Long Lusim Rong

Bel i kirapim yumi long sori long man, olsem na yumi no ken tingim tingim rong bilong em o laik long bekim nogut long em. Yumi mas larim Jehova yet i skelim na bekim rong.​—⁠Rom 12:19.

Tasol yu mas save, “bel bilong olgeta man i save . . . giaman. Tingting bilong man em i nogut tru.” (Jeremaia 17:⁠9) Olsem na sampela taim yumi no laik sori na lusim rong bilong man, maski yumi mas mekim. Jisas yet i tok, ol samting i kamap long bel em ‘ol tingting nogut na pasin bilong kilim man i dai na olkain pasin pamuk na stil na tok giaman long kot na tok nogut long ol arapela.’​—⁠Matyu 15:19.

Tasol gutpela tru, bel bilong yumi inap lain long bihainim stretpela pasin. Man antap em i mas skulim yumi olsem; yumi yet i no inap mekim. (Jeremaia 10:23) Wanpela man, em spirit bilong God i kirapim em long raitim Song, em i save God i mas soim rot long yumi na em i beten na tok olsem: “Yu skulim mi long olgeta lo bilong yu. Yu skulim mi long bihainim lo bilong yu.”​—⁠Song 119:​26, 27.

Narapela Song i tok, ol samting Jehova i bin mekim long King Devit bilong Israel i bin lainim Devit long pasin bilong em. Olsem na Devit inap tok: “Bikpela i save sori moa yet long yumi . . . Em i no save belhat kwiktaim.” Na em i tok: “Papa i save sori long ol pikinini bilong en. Olsem tasol Bikpela i save sori long ol manmeri i pret long em.”​—⁠Song 103:​8, 13.

Yumi mas lain olsem King Devit i bin mekim. Yumi mas beten na kisim save long gutpela pasin bilong Jehova na Pikinini bilong em long lusim rong bilong yumi man. Olsem bai yumi inap lainim gut bel na bai yumi sori long man na lusim rong bilong em.

Tasol ating sampela i laik save: Olsem wanem long bikpela rong? Yumi mas lusim olgeta rong man i mekim?

Bihainim Stretpela Tingting

Taim narapela i rongim tru man, dispela man inap pilim bikpela bel hevi. Na sapos em yet i no gat asua, bel bilong em bai bagarap moa yet. Sampela inap ting, ‘Olsem wanem mi ken lusim rong bilong man i mekim nogut tru long mi na bagarapim tru bel bilong mi?’ Sapos man i mekim bikpela rong inap long kongrigesen i ken rausim em, ating man em i rongim i mas bihainim tok bilong Matyu 18:​15-17.

Pasin bilong man i mekim rong em bikpela samting: Bihain em i tanim bel tru na hevi long rong em i bin mekim? Em i senisim pasin bilong em? Em i wok long stretim dispela rong? Long ai bilong God, pasin bilong tanim bel em i as bilong lusim rong bilong man maski em i bin mekim pasin nogut tru. Olsem: God i lusim rong bilong Manase, em wanpela king bilong Israel i bin mekim pasin nogut tru. Bilong wanem God i lusim rong bilong em? Long wanem, Manase i daunim em yet na tanim bel tru.​—⁠2 Stori 33:​12, 13.

Baibel i makim olsem man i tanim bel tru em i senisim tru tingting na pasin bilong em; em i bel hevi tru long ol rong em i bin mekim. Sapos i stret na em inap, em i mas wok long bekim ol samting long man em i rongim. (Luk 19:​7-10; 2 Korin 7:11) Sapos man i no tanim bel olsem, God i no ken lusim rong bilong em.a Na sapos man yet em i wokabaut long pasin bilong sin na em i no tanim bel, God i no ting ol Kristen i mas lusim rong bilong dispela man. (Hibru 10:​26-31) Sampela man i mekim bikpela rong tumas na ating i no stret long lusim rong bilong ol.​—⁠Song 139:​21, 22; Esekiel 18:​30-32.

Maski man inap lusim bikpela rong narapela i mekim long em o nogat, ating em i laik skelim narapela samting tu, olsem: Bel bilong mi i mas bagarap na mi belhat i go inap long taim bekim stret bilong dispela rong i kamap? Orait, tingim King Devit. Em i bel hevi tru long taim namba wan ofisa bilong ami bilong em, Joap, i kilim i dai nating Apner na Amasa, em tupela “i gutpela man na . . . pasin bilong tupela i winim pasin bilong Joap.” (1 King 2:32) Devit i tokaut long belhat bilong em, na yumi save em i mas kamapim long Jehova long beten tu. Tasol bihain bel bilong em i no hat moa olsem long pastaim. Em i no belhat i go inap long em i dai. Na em i pas yet wantaim Joap long mekim wok. Tasol em i wokim rot na bihain Joap i kisim bekim stret bilong rong bilong em.​—⁠2 Samuel 3:​28-39; 1 King 2:​5, 6.

Ol man i belhat long bikpela rong narapela i mekim, hap taim i mas lus pastaim na ol i mas wok strong na bai ol inap daunim belhat bilong ol. Ating bai ol i no hatwok tumas long daunim sapos man i mekim rong em i tok sori na tanim bel. Na sapos ol yet i no gat asua, samting inap mekim isi bel bilong ol em olsem: Ol i save long stretpela pasin na savepasin bilong Jehova, na kongrigesen tu inap helpim ol, maski man i mekim rong em i mekim wanem kain pasin.

Yu mas save tu, taim yu lusim rong bilong man, i no olsem yu orait long dispela rong. Nogat. Taim Kristen i lusim rong bilong man, i olsem em i putim dispela hevi long han bilong Jehova na wet long em. Jehova em i stretpela Jas bilong heven na graun, na em bai stretim ol rong long taim stret. Em bai bekim pe tu long “ol manmeri i mekim ol kain kain pasin pamuk.”​—⁠Hibru 13:⁠4.

Dispela Pasin i Helpim Yumi

Devit i raitim Song na i tok: “Bikpela, yu gutpela tru na yu save rausim sin bilong mipela. Yu save laikim tumas olgeta manmeri i save beten long yu.” (Song 86:⁠5) Olsem wanem long yu? Yu bihainim pasin bilong Jehova? Yu save lusim sin bilong man? Dispela pasin inap helpim yu tru.

Namba wan, em inap helpim yu long i stap gut wantaim ol narapela. Baibel i tokim ol Kristen: “Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol, olsem God i lusim sin bilong yupela long nem bilong Krais.”​—⁠Efesus 4:⁠32.

Namba 2, pasin bilong lusim rong bilong ol narapela inap helpim yu long i stap wanbel wantaim ol, na helpim yu yet long i stap bel isi.​—⁠Rom 14:19; Kolosi 3:​13-15.

Namba 3, pasin bilong lusim rong bilong narapela i helpim yumi long tingim olsem yumi tu i gat sin na God i mas lusim. Tru tumas, “yumi olgeta man yumi bin mekim sin.”​—⁠Rom 3:⁠23.

Las tru, sapos yumi lusim sin bilong ol narapela bai God inap lusim sin bilong yumi. Jisas i tok: “Sapos yupela i lusim rong bilong ol arapela manmeri, orait Papa bilong yupela long heven em bai i lusim rong bilong yupela tu.”​—⁠Matyu 6:14.

Long apinun Jisas i dai, em i mas tingim planti samting. Em i tingim ol disaipel bilong em, na wok bilong autim tok, na wok bilong em long i stap gut long Jehova. Tasol taim em i hangamap long diwai na karim bikpela pen, em i toktok long wanem samting? Wanpela laspela tok bilong em i olsem: “Papa, yu ken lusim sin bilong ol.” (Luk 23:34) Yumi ken bihainim gutpela pasin bilong Jisas na sori long ol man na lusim rong bilong ol.

[Ol Futnot]

[Ol Piksa long pes 5]

Yu kisim as bilong tok piksa bilong Jisas long wokboi i no laik mekim pasin sori?

[Ol Piksa long pes 7]

Pasin bilong lusim rong bilong ol narapela i helpim yumi long stap gut wantaim ol na i stap amamas