Yu Save Lusim Rong Bilong Man Olsem Jehova i Mekim?
“Sapos yupela i lusim rong bilong ol arapela manmeri, orait Papa bilong yupela long heven em bai i lusim rong bilong yupela tu. Tasol sapos yupela i no lusim rong bilong ol arapela manmeri, orait Papa bilong yupela em tu bai i no lusim ol rong bilong yupela.”—MATYU 6:14, 15.
JEHOVA em i “save sori moa yet long yumi na oltaim em i marimari long yumi. Em i no save belhat kwiktaim . . . Yumi inap kisim pe nogut bilong sin bilong yumi, tasol em i no save givim dispela pe nogut long yumi. . . . Hap bilong sankamap em i no klostu long hap bilong san i go daun. Em i longwe tru. Olsem tasol God i save tekewe sin bilong yumi na sin i stap longwe tumas. Papa i save sori long ol pikinini bilong en. Olsem tasol Bikpela i save sori long ol manmeri i pret long em. Em i save olsem em i bin kisim graun na wokim yumi na em i tingim yumi i olsem das tasol.”—Song 103:8-14.
2 Taim mama i karim yumi, yumi gat sin pinis. Lo bilong sin long skin bilong yumi i wok long kalabusim yumi, na yumi mas i gat wanpela God ‘i tingim yumi i das tasol’ bilong helpim yumi. Inap 300 yia bihain long taim Devit i stori gut tru long Jehova long Song 103, narapela man bilong raitim Baibel, em Maika, em i litimapim nem bilong dispela God long pasin bilong em long lusim rong ol man i bin mekim. Em i tok: “Bikpela, i no gat wanpela god i olsem yu: Yu save lusim sin na pasin nogut bilong ol man. Kros bilong yu i no save stap oltaim. Yu amamas long mekim pasin marimari. Yu mas marimari long mipela gen, na krungutim ol sin bilong mipela, na tromoi olgeta sin bilong mipela i go daun long as bilong solwara.”—Maika 7:18, 19, The Jerusalem Bible.
3 Long Nupela Testamen, insait bilong hap tok Grik ol i tanim olsem “lusim rong” i olsem “larim i go.” Devit na Maika i mekim ol gutpela tok bilong stori long dispela. Bilong helpim yumi long pilim tru gutpela pasin bilong Jehova long lusim rong bilong ol man, yumi ken stori long sampela taim em i bin mekim olsem. Namba wan i makim olsem Jehova inap senisim tingting na lusim rong bilong man pastaim em i bin tingting long bagarapim em.
Moses i Askim—Jehova i Harim
4 Jehova i lukautim lain Israel na ol i lusim Isip bilong go insait long graun em i bin promis long givim long ol, tasol ol i pret long ol man bilong Kenan na ol i no laik go insait. Ol i bin lukim Jehova i kamapim 10-pela hevi bilong helpim ol long lusim Isip, na long solwara Retsi em i wokim rot bilong ranawe, na em i bagarapim ami bilong Isip taim ol i laik bihainim ol, na em i wokim kontrak bilong Lo wantaim ol long maunten Sainai na kisim ol i stap lain bilong em stret, na em i bin wokim mirakel na givim kaikai long ol, em mana bilong heven, tasol ol i pret long go insait long Graun Bilong Promis, long wanem, i gat sampela longpela traipela man i stap long Kenan!—Namba 14:1-4.
5 Moses tupela Aron i bel hevi tru long dispela tok na tupela i brukim skru na putim het i go daun long graun. Josua na Kalep, em tupela man bilong lukstil i stap gut long God, tupela i wok long strongim ol Israel. Tupela i tok: ‘Dispela graun i gutpela tumas, na i gat planti gris. Yupela i no ken pret long ol manmeri i stap long dispela hap. Jehova i stap wantaim yumi!’ Tasol ol dispela manmeri i pret na ol i bikhet long Jehova na ol i no laik harim. Ol i tok long tromoi ston long Josua na Kalep.—Namba 14:5-10.
6 Jehova i belhat! Em i tokim Moses olsem: “Mi bin wokim planti mirakel namel long ol [dispela manmeri], tasol ol i no bilip. Olsem na mi bai . . . bagarapim ol. Tasol bai mi mekim yu i kamap tumbuna bilong wanpela bikpela strongpela lain manmeri i winim ol dispela lain.” Tasol Moses i tokim Jehova: “Bikpela, long strong bilong yu yet yu bin kisim ol dispela manmeri long Isip na bringim ol i kam pinis. Sapos yu bagarapim ol manmeri bilong yu, bai ol Isip i harim tok long dispela samting. Na ol bai i tokim ol dispela arapela lain pipel . . . Na sapos yu kilim olgeta manmeri bilong yu, ol arapela lain i bin harim tok long biknem bilong yu, ol bai i tok olsem, ‘Bikpela i no inap bringim ol manmeri bilong en i go long dispela kantri bipo em i bin promis long givim ol, olsem na em i kilim ol i dai long ples drai nating.’ ”—Namba 14:11-16.
7 Moses i beten askim Jehova long tingim nem bilong em na lusim rong bilong ol. Em i tok: “Mi askim yu long rausim sin bilong ol dispela manmeri.” Jehova i harim tok bilong Moses na em i tok: “Bai mi lusim sin bilong ol, olsem yu askim mi long mekim.”—Namba 14:19, 20.
Rong Bilong Manase na Rong Bilong Devit
8 Jehova i marimari moa yet na em i lusim rong bilong Manase, em pikinini man bilong gutpela King Hesekia. Manase i gat 12-pela krismas na em i kamap king long Jerusalem. Em i wokim ol ples lotu bilong ol god giaman, na ol alta bilong lotu long Bal, na ol pos i gat piksa bilong god giaman, na em i lotuim ol sta, na wokim marila, na makim ol glasman bilong helpim em, na putim piksa bilong god giaman insait long tempel bilong Jehova, na em i go long ples daun bilong Hinom na kukim ol pikinini man bilong em yet long paia olsem ofa bilong god giaman. Em i “mekim planti sin moa” long ai bilong Jehova, na “pulim ol Juda na Jerusalem na ol i mekim planti pasin nogut moa.”—2 Stori 33:1-9.
9 Bihain Jehova i salim ol Asiria i kam pait long ol Juda, na ol i holim Manase na kisim em i go long Babilon. “Orait na em i pilim hevi nogut tru na em i daunim em yet long ai bilong God . . . Na em i kam bek long God, na i askim God long helpim em. Na God i harim prea bilong Manase na i helpim em na larim em i go bek long Jerusalem na bosim kantri gen.” (2 Stori 33:11-13) Nau Manase i rausim ol god giaman bilong ol narapela lain, na ol piksa bilong god giaman, na ol alta. Em i tokim ol man long tromoi ausait long taun. Na em i kirap mekim ol ofa long alta bilong Jehova, na em i kirapim ol Juda long lotuim Jehova, em i God tru. Jehova i kamapim klia bikpela laik bilong em long lusim rong bilong man i daunim em yet, na beten, na mekim ol samting bilong stretim rong, na mekim pasin i soim olsem em i tanim bel pinis!—2 Stori 33:15, 16.
10 Planti man i save King Devit i trabel long meri bilong Uria bilong lain Hit. Na taim meri i gat bel, Devit i mekim kain kain samting bilong haitim rong bilong em. King i singautim Uria long lusim ples pait na i kam malolo; em i ting bai Uria i go long haus bilong em na slip wantaim meri bilong em. Tasol nogat. Uria i tingim ol wanlain i stap yet long ples pait, na em i no laik i go. Orait, Devit i singautim Uria i kam kaikai wantaim em na em i mekim Uria i spak. Tasol Uria i no go long meri bilong em. Olsem na Devit i salim tok long kepten bilong ol soldia na tokim em long putim Uria long hap em pait i kamap strong long en, na bai ol birua i kilim Uria i dai, na samting i kamap olsem.—2 Samuel 11:2-25.
11 Jehova i salim profet Natan i go bilong kamapim rong bilong Devit, na nau Devit i tokim Natan: “Mi mekim sin long ai bilong Bikpela.” Na Natan i tok: “Bikpela i rausim dispela sin bilong yu na yu no inap i dai.” (2 Samuel 12:13) Devit i pilim tru bikpela asua bilong em long rong em i bin mekim na em i tanim bel na beten long Jehova olsem: “Sapos mi kilim abus bilong ofa na paia i kukim olgeta, maski, yu no amamas long dispela. Orait God, mi daunim mi yet na mi stap aninit long yu. Dispela em i ofa bilong mi. Mi save, yu no givim baksait long man i pilim hevi long sin na i daunim em yet.” (Song 51:16, 17) Jehova i harim beten bilong Devit, long wanem, Devit i pilim tru rong bilong em. Tasol Devit i kisim bikpela strafe, na dispela i stret long tok bilong Jehova long Kisim Bek 34:6, 7. Em i tok: “Mi save lusim ol kain kain sin . . . Tasol mi save mekim save long ol man i gat asua.”
Solomon i Givim Tempel Long God
12 Solomon i wokim pinis tempel na taim em i laik givim long Jehova, em i beten olsem: “Bikpela, . . . taim mi na ol Israel, em ol lain manmeri bilong yu, i lukluk i kam long dispela haus na beten long yu, orait yu ken harim beten bilong mipela na lusim sin bilong mipela.” Na Jehova i bekim tok, olsem: “Tasol sapos yupela i bikhet long mi na mekim sin, orait bai mi inap pasim ren o salim ol grasopa i kam . . . o mi inap salim wanpela bikpela sik nogut long yupela ol manmeri bilong mi. Na long dispela taim, sapos yupela . . . i tanim bel na . . . beten long mi, na lusim ol dispela pasin nogut yupela i bin mekim, orait . . . bai mi harim beten bilong yupela na lusim ol sin bilong yupela na mekim graun bilong yupela i kamap gutpela gen.”—2 Stori 6:21; 7:13, 14.
13 Taim Jehova i lukluk long yu, em i tingim ol samting yu mekim long nau; em i no tingim ol samting yu bin mekim bipo. I olsem Esekiel 33:13-16 i tok: “Mi save tokim ol stretpela man, ol bai i stap gut. Tasol sapos wanpela stretpela man i ting ol stretpela pasin em i bin mekim ol bai inap helpim em i stap gut, na em i lusim stretpela pasin na i wok long mekim sin, orait bai mi God, mi no inap tingim ol stretpela pasin em i bin mekim bipo. Nogat. Nau em i mekim sin na em i mas i dai. Na mi save tokim ol man nogut, bai ol i mas i dai. Tasol sapos wanpela man bilong mekim sin, em i givim baksait long sin bilong en, na i wok long mekim stretpela pasin, orait bai em i no inap i dai. Sapos em i . . . bekim ol samting em i bin stilim, na em i bihainim gut olgeta lo bilong mi, na em i no mekim sin moa, orait dispela man i no inap i dai. . . . Bai mi no ken tingim ol sin em i bin mekim bipo. Nau em i mekim stretpela pasin na em bai i stap gut.”
14 Pasin bilong Jehova long lusim rong bilong yumi em i narapela kain. Yumi ol man i hatwok long mekim kain pasin olsem—Jehova i save lusim rong bilong man na lusim tingting long en tu. Sampela man i tok: ‘Mi inap lusim rong bilong yu, tasol mi no inap (o no laik) lusim tingting long en.’ Tasol Jehova i tok: “Bai mi lusim sin bilong ol na mi no ken tingim moa.”—Jeremaia 31:34.
15 Inap planti tausen yia pinis Jehova i bin lusim rong bilong ol man i lotuim em. Em i lusim ol rong ol man i save ol i bin mekim, na planti rong ol i no save long en. Oltaim em i save mekim pasin marimari, na pasin isi, na lusim ol rong. Aisaia 55:7 i tok: “Ol manmeri bilong mekim ol pasin nogut i mas lusim ol pasin nogut bilong ol na ol i no ken tingting moa long mekim ol dispela pasin. Na ol i mas kam bek long God . . . Em i save marimari moa yet long ol manmeri i kam bek long em.”
Tok Bilong Lusim Rong Em i Stap Long Nupela Testamen
16 Ol stori bilong pasin marimari bilong God i pulap long Nupela Testamen. Planti taim Jisas i stori long God i lusim rong bilong ol man, na em i kamapim klia olsem em i gat wankain tingting long dispela samting. Oltaim Jisas i save bihainim tingting bilong Jehova; em i wankain tru olsem Jehova yet, olsem na man i lukim em, i olsem em i lukim Jehova.—Jon 12:45-50; 14:9; Hibru 1:3.
17 Wanpela tok piksa bilong Jisas i kamapim klia olsem Jehova i save marimari moa yet long yumi. Jisas i stori long king i lusim bikpela dinau tru (10 milion kina) bilong wanpela wokboi bilong em. Tasol wokboi i no laik lusim liklik dinau (10 kina) bilong wanwok. King i kros nogut tru na i tok: “Yu wokboi nogut. Pastaim yu krai long mi, na mi lusim olgeta dinau bilong yu. Mi bin sori long yu. Olsem na watpo yu no sori tu long wanwok bilong yu?” King i belhat na putim em long kalabus “inap em i bekim olgeta dinau bilong en.” Jisas i stori olsem na bihain em i kamapim as bilong tok piksa, em i tok: “Olsem tasol Papa bilong mi i stap long heven, em bai i mekim wankain pasin tasol long yupela sapos yupela i no lusim tru ol rong ol brata i mekim long yupela.”—Matyu 18:23-35.
18 Paslain liklik long Jisas i mekim dispela tok piksa, Pita i bin askim em: “Bikpela, hamas taim brata bilong mi i ken mekim rong long mi, na mi mas lusim rong bilong en? Ating inap long 7-pela taim?” Pita i ting dispela em i gutpela pasin. Ol saveman bilong lo na ol Farisi i makim hamas taim ol i mas lusim rong bilong brata, tasol Jisas i tokim Pita: “Mi no tok long yu mas lusim rong bilong en inap 7-pela taim tasol. Nogat. Mi tok, yu mas lusim inap 70 taims 7-pela taim.” (Matyu 18:21, 22) Sevenpela taim em i no inap long wanpela de. Jisas i tok: “Sapos brata bilong yu i mekim sin, yu mas tokim em long stretim pasin bilong em. Na sapos em i tanim bel, orait yu mas lusim sin bilong em. Na sapos em i mekim sin long yu inap 7-pela taim long wanpela de, na 7-pela taim em i kam bek long yu na i tok, ‘Mi sori,’ orait yu mas lusim sin bilong en.” (Luk 17:3, 4) Taim Jehova i lusim rong bilong yumi, em i no save kaunim hamas taim yumi mekim rong—em gutpela tru.
19 Sapos yumi daunim yumi yet na tanim bel na autim sin bilong yumi, Jehova i redi long lusim sin bilong yumi. Baibel i tok: “Sapos yumi autim sin bilong yumi, orait God bai i mekim olsem em i bin tok. Em bai i mekim stretpela pasin na lusim sin bilong yumi.”—1 Jon 1:9.
20 Disaipel bilong Jisas, em Stiven, em i mekim gutpela pasin tru na lusim rong bilong ol man i tromoi ston bilong kilim em i dai. Em i singaut na tok: “ ‘Bikpela Jisas, yu kisim spirit bilong mi.’ Na em i brukim skru na i singaut strong moa, ‘[Jehova, NW], yu no ken bekim dispela sin long ol.’ Stiven i tok olsem, na em i dai.”—Aposel 7:59, 60.
21 Jisas i mekim gutpela pasin moa yet long lusim rong bilong ol man na yumi kirap nogut long en. Ol birua i holim em, na wokim kot giaman, na tok em i mas i dai, na ol i tok bilas long em, na spet long em, na wipim em long planti hap let ating i gat ol liklik hap bun na ain long en, na nilim em long diwai na em i stap inap planti aua. Ol Rom i insait long planti samting hia, tasol taim Jisas i laik i dai, em i beten askim Papa long ol soldia bilong Rom olsem: “Papa, yu ken lusim sin bilong ol. Ol i no save long dispela samting ol i mekim.”—Luk 23:34.
22 Taim Jisas i mekim Tok Long Maunten, em i bin tok: “Yupela i mas laikim ol birua bilong yupela, na yupela i mas beten bai God i marimari long ol man i save mekim pasin nogut long yupela.” Inap long em i dai, em yet i bihainim dispela pasin. Yu ting i hatwok tumas long yumi ol man i gat sin i bihainim? Maski em hatwok, yumi mas wok strong long bihainim ol tok Jisas i mekim taim em i lainim pinis ol disaipel long pasin bilong beten: “Sapos yupela i lusim rong bilong ol arapela manmeri, orait Papa . . . bai i lusim rong bilong yupela tu. Tasol sapos yupela i no lusim rong bilong ol arapela manmeri, orait Papa . . . tu bai i no lusim ol rong bilong yupela.” (Matyu 5:44; 6:14, 15) Sapos yumi lusim rong bilong ol man olsem Jehova i mekim, bai yumi lusim na yumi no ken tingim moa.
Yu Tingim?
◻ Jehova i mekim wanem long ol rong bilong yumi? Bilong wanem em i mekim olsem?
◻ Olsem wanem na Manase i kisim bek wok king bilong em?
◻ Olsem wanem pasin bilong Jehova long lusim rong bilong man i hatwok long yumi bihainim?
◻ Jisas i mekim wanem gutpela pasin tru long lusim rong bilong ol man na yumi kirap nogut long en?
[Askim Bilong Stadi]
1, 2. Wanem kain God tasol inap helpim yumi? Bilong wanem i olsem?
3. Wanem insait bilong dispela tok “lusim rong”?
4. Ol Israel i lukim wanem ol strongpela wok Jehova i mekim, tasol ol i pret yet long go insait long Graun Bilong Promis?
5. Tupela man i go lukstil na ol i stap gut long Jehova, tupela i tok wanem bilong strongim ol Israel long go insait?
6, 7. (a) Taim ol Israel i no laik wokabaut i go insait long Graun Bilong Promis, Jehova i tingting long mekim wanem? (b) Bilong wanem Moses i no laik bai Jehova i givim dispela strafe long ol? Wanem samting i bin kamap?
8. King Manase bilong Juda i bin mekim wanem kain pasin?
9. Manase i mekim wanem na Jehova i marimari long em? Na wanem samting i bin kamap?
10. Devit i mekim wanem bilong haitim rong bilong em taim em i trabel long meri bilong Uria?
11. Wanem samting i kirapim Devit long tanim bel? Tasol wanem hevi i painim em?
12. Taim Solomon i givim tempel long God, em i askim God long wanem samting? God i bekim wanem tok long em?
13. Tok bilong Esekiel 33:13-16 i makim Jehova i ting olsem wanem long ol man?
14. Olsem wanem pasin bilong Jehova long lusim rong bilong man i narapela kain?
15. Olsem wanem long wok bilong Jehova long lusim rong bilong ol man long bipo na i kam inap long nau?
16. Olsem wanem yumi ken tok, pasin bilong Jisas long lusim ol rong em i wankain olsem pasin bilong Jehova?
17. Jisas i mekim wanem tok piksa bilong makim olsem Jehova i save “marimari moa yet”?
18. Olsem wanem long tingting bilong Pita long lusim rong bilong brata? Wanem tingting bilong Jisas?
19. Yumi mas mekim wanem na bai Jehova i lusim ol rong bilong yumi?
20. Olsem wanem Stiven i kamapim klia olsem em i redi long lusim rong bilong ol man?
21. Bilong wanem yumi kirap nogut long Jisas i redi long lusim rong bilong ol soldia bilong Rom?
22. Yumi mas wok long bihainim wanem tok Jisas i mekim antap long maunten?
[Piksa long pes 24]
Natan i helpim Devit long save, em i bikpela samting long God i mas lusim rong bilong em