Ol Witnes Bilong Jehova Long Olgeta Hap—Naijiria
NAIJIRIA em wanpela kantri i stap long hap wes bilong Afrika. Em i stap long nambis bilong Pasis Bilong Gini, antap liklik long ekweta, na lain bilong kantri i winim 88 milion manmeri.a
Long yia bilong wok bilong 1992 na 1993, brens-ofis bilong Sosaiti Was Taua long Naijiria i bin wok strong long helpim ol yangpela. Ol i lukim olsem long yia 1992, long ol kongrigesen bilong ol Witnes Bilong Jehova long Naijiria, bikpela hap lain (80 pesen) i autim tok em ol yangpela manmeri, em ol i gat 10-pela inap 20 krismas. Na long ol manmeri i bin kisim baptais long dispela yia, planti tru (63 pesen) ol i yangpela olsem.
Ol Yangpela i Laik Mekim Wok Painia
Planti yangpela i kirap mekim wok painia; ol i autim tok long olgeta de. Wanpela em Hannah na em i tok: “Mi laik pinis long skul na mi go lukim sampela brata sista i go long Skul Bilong Wok Painia. Mi bungim tupela lapun sista na mi tingting olsem: ‘Sapos tupela inap mekim wok painia, mi tu inap mekim.’
“Orait mi pinis long skul na mi kamap painia. Tripela mun bihain mi bungim Josephine, em i gat 26 krismas na em i save lotu long ol spirit. Em i tok: ‘Yupela ol Witnes Bilong Jehova i man nogut. Yupela i no save mekim Krismas o holim samting bilong sakim ol spirit nogut.’ Mi tok sapos em i orait long mi lainim em long Baibel bai em inap save long as bilong dispela pasin bilong mipela. Em i orait long mi go lukim em gen. Kwiktaim em i kirap long i kam long ol miting, na em i senisim tru pasin bilong em. Long Disemba 1990 em i baptais, na kirap long Ogas 1991, em i mekim wok painia. Taim em i go long Skul Bilong Wok Painia long yia i go pinis, em i tokim ol wanskul, mi mama bilong em long ol samting bilong spirit!”
Video na Haus Kingdom
Wanpela video bilong Sosaiti i bin helpim wanpela liklik kongrigesen long kisim hap graun bilong wokim Haus Kingdom long en. Ol i laik baim hap graun na 4-pela brata i go lukim Hetman bilong dispela hap. Em i tok ol i ken kisim wanpela hap graun pe bilong en em 20,000 naira (K1,025). I gat 17 pablisa tasol bilong givim mani na ol i no inap baim. Hetman i tok, em bai painim narapela hap graun bilong ol.
Sampela mun bihain, wanpela elda bilong kongrigesen i go long haus bilong Hetman. Hetman i lukim video bilong taim ol i bin putim em i stap Hetman. Elda i tok: “Mi gat video mi laik bai yu lukim, nem bilong en Jehovah’s Witnesses—The Organization Behind the Name.”
Bihain elda i askim Hetman long tingting bilong em long dispela video. Hetman i tok: “Mi lukim 5-pela taim.” Elda i kirapim tingting bilong Hetman long ol Haus Kingdom em i bin lukim long video na em i tokim Hetman, kongrigesen bilong em i laik wokim wanpela olsem. Nau em i tokim Hetman, kongrigesen i laik baim liklik hap graun i pas wantaim hap graun ol i holim pinis. Hetman i tok: “Asde long apinun mi lukim pinis video na mi tu mi tingim dispela hap graun na mi laik givim long yupela.” Em i makim hap graun i braitpela inap 6 mita na em i tok: “Yupela i ken kisim hap graun olsem. Longpela bilong en, em yupela i ken makim inap long laik bilong yupela. Redim ol pepa na bai mi sainim nem long en.”
[Ol Futnot]
a Sapos yu laik kisim sampela save moa long dispela, yu ken lukim kalenda bilong ol Witnes Bilong Jehova bilong 1994.
[Blok long pes 9]
OL SAMTING BILONG KANTRI
Yia Bilong Wok Bilong 1993
HAMAS OL I AUTIM TOK: 174,582
SKELIM OLSEM: Wanpela insait long 507 man
HAMAS I BUNG LONG MEMORIAL: 473,245
HAMAS PAINIA, AVERES: 19,777
HAMAS BAIBEL-STADI, AVERES: 242,028
HAMAS I KISIM BAPTAIS: 8,888
HAMAS KONGRIGESEN: 3,289
BRENS-OFIS: BENIN SITI, PROVINS EDO