Kisim Save Long Stori Tru

Hevi

Planti taim ol tok giaman i as bilong pasin bilong bel nogut long narapela lain. Skelim ol dispela eksampel:

Sampela wokman i gat tingting kranki olsem ol meri i no fit long mekim wok saiens o mekim ol wok long kompiuta samting.
Long Yurop, namel long yia 500 C.E. na 1500 C.E., ol man i sutim tok giaman long ol Juda olsem ol i putim posin long ol hulwara na spredim sik. Long taim Nasi i bosim kantri, ol man i sutim tok giaman gen long ol Juda. Tasol nau ol i tok ol Juda i mekim na bikpela hevi bilong mani i kamap long Jemani. Dispela tupela tok giaman i mekim na ol man i bel nogut tru long ol Juda, sampela bilong ol dispela pasin i stap yet long nau.
Planti man i kisim tingting kranki olsem olgeta man i gat bagarap long bodi ol i save stap bel hevi na kros.

Ol man husat i bilipim kain tok giaman olsem ating ol bai painim ol eksampel o risen bilong strongim pasin bilong ol long bel nogut long narapela lain. Na ol i tok man husat i no wanbel long tingting bilong ol em i no luksave long dispela.

Stiatok Bilong Baibel

“Man i no gat save, dispela i no gutpela.”—PROVEP 19:2.

Dispela i makim wanem samting? Sapos yumi no save long ol stori tru, yumi bai mekim ol disisen nogut. Sapos yumi bilipim tok giaman na yumi no bilipim stori tru, yumi bai kisim tingting kranki long ol narapela lain

Save Long Stori Tru Dispela Bai Helpim Yu

Sapos yumi save long stori tru bilong wanpela lain, yumi no inap bilipim ol tok giaman ol man i mekim long ol. Na taim yumi save olsem stori ol man i mekim long wanpela lain i no tru, ating yumi laik save tingting yumi gat long narapela lain em tru, o nogat.

Wanpela Stori Tru: Jovica (Bolken)

Jovica, em pastaim yumi stori long em long fes atikol, taim em i wok long go bikpela em i harim ol wantok bilong em, ol nius, na televisen program i save kamapim ol ripot nogut long wanpela liklik lain. Em i tok: “Mi kisim pasin bilong bel nogut tru—na tu heitim—dispela lain. Na mi ting i stret long mi pilim olsem long ol.

“Tasol taim mi stap long ami, maski mi les long ol mi stap na wok wantaim ol wanwok soldia bilong dispela liklik lain. Sampela taim bihain, mi kisim save long planti samting long ol. Na tu, mi stat long lainim tokples bilong ol na harim ol singsing bilong ol. Mi stat long wok gut wantaim ol, na tingting bilong mi long ol i senis. Tasol pasin bilong bel nogut long narapela lain inap kamap gen. So mi abrusim ol nius ripot we i givim tingting kranki long dispela lain. Na tu, mi no watsim ol muvi o ol pani piksa we i daunim ol. Mi save olsem pasin bilong bel nogut long narapela lain inap kirapim pasin bilong belhat na heitim narapela.”

Samting Yu Ken Mekim

Tingim olsem taim ol man i tok wanpela lain i gat sampela pasin i no gutpela, dispela i no makim olsem olgeta wan wan man bilong dispela lain i gat dispela pasin, nogat.
Yu mas save olsem infomesen yu harim long wanpela lain, ating em hap stori tasol.
Traim long kisim infomesen long ol lain em yu trastim.