Ol Man i Tingting Nogut Long Yu?
BAGARAPIM man bilong narapela lain, birua long man bilong narapela skin, daunim narapela, tambuim narapela narapela skin o lain long bung wantaim, bagarapim na pinisim wanpela lain olgeta—ol dispela samting i wankain olsem wanem? Ol i wankain olsem: Wanpela pasin kranki bilong yumi ol manmeri i save kamapim ol dispela hevi, em pasin bilong tingting nogut long narapela!
Wanpela bikpela buk dikseneri i stori long pasin bilong tingting nogut long narapela na i tok, em ‘pasin bilong kisim tingting kranki hariap long narapela man na yu no kisim gut save long em pastaim bambai yu ken skelim gut pasin bilong em.’ Yumi ol sinman, olsem na dispela pasin kranki i stap long yumi olgeta. Ating yu inap tingim sampela taim yu bin popaia long skelim pasin bilong narapela man. Baibel i tok, pasin bilong yumi long skelim man i narapela kain tru long pasin bilong God Jehova long skelim man. Em i tok: “Ol man i save lukluk long bodi. Tasol mi save lukim tingting na laik bilong man na mi skelim ol.”—1 Samuel 16:7.
Pasin Bilong Tingting Nogut Inap Kamapim Hevi
Olsem wanem? Ating wanpela i bin popaia long skelim pasin bilong yu? Dispela i save painim yumi olgeta. (Skelim wantaim Saveman 7:21, 22.) Olsem na yumi ken tok, yumi olgeta i bin karim sampela hevi long narapela i tingting kranki long yumi. Sapos man i rausim hariap ol tingting nogut, ating bai i no gat hevi i kamap long dispela. Tasol sapos oltaim em i holim i stap, dispela inap kamapim sampela hevi. Tingting nogut inap giamanim man na bai em i bilipim tok giaman bilong narapela. Olsem: Sampela man i ting sapos wanpela man i gat pasin bilong mangal, o les, o longlong, o hambak, as bilong dispela em lotu, o lain, o ples bilong em.
Planti taim dispela pasin bilong tingting kranki long narapela i kirapim ol man long daunim narapela, o mekim nogut long ol, o bagarapim ol tu. Planti milion i bin dai long taim ol man i bagarapim nating ol man, o ol i laik pinisim wanpela lain olgeta, o narapela lain i birua long narapela lain, na i gat sampela narapela pasin nogut tru i save kamap long dispela pasin bilong tingting nogut long narapela.
Long olgeta hap ol gavman i bin wok strong long daunim dispela pasin na ol i putim ol lo i tok olgeta man i mas i stap fri, na i gat gutpela sindaun, na mekim olgeta samting i stret ol i ken mekim, na narapela man i no ken pasim ol. Sapos yu kaunim ol lo konstitusen bilong kantri bilong yu, ating bai yu lukim sampela hap tok long en i bilong lukautim olgeta man bilong kantri na bai ol i ken mekim ol samting i stret ol i ken mekim—maski ol i bilong wanem lain, o lotu, o ol i man o meri. Tasol pasin bilong tingting nogut long narapela na daunim narapela i go bikpela long olgeta hap.
Olsem wanem long yu? Ating sampela i tingting nogut long yu? Ol i tingim skin, krismas, ples, lotu bilong yu na ol i tok yu man bilong mangal, o les, o yu longlong, o hambak? O, ol i tingting nogut long yu, long wanem, yu wanpela man o meri? Ol i pasim yu long kisim gutpela skul, o wok, o haus, o sampela helpim long ol lain bilong welfe, long wanem, ol i gat tingting nogut long yu? Orait, sapos olsem, olsem wanem yu inap karim dispela hevi?
[Piksa long pes 3]
Tingting nogut oltaim long narapela skin i kamapim pasin birua
[Kredit Lain]
Nina Berman/Sipa Press