Taim Pasin Bilong Tingting Nogut Long Narapela i Pinis!
WANPELA taim, saveman Albert Einstein i bin tok, long dispela taim bilong planti hevi em i hatwok tru long pinisim dispela pasin bilong tingting nogut long narapela man—tasol wok bilong brukim wanpela liklik atom i no hatwok olsem. Na wanpela niusman, Edward R. Murrow, i mekim wankain tok olsem. Em i kisim biknem long taim bilong Namba Tu Pait, na bihain em i kamap dairekta bilong lain U.S. Information Agency. Em i tok, ‘i no gat wanpela man inap long pinisim pasin bilong tingting nogut long narapela man. Yumi save tasol olsem dispela pasin i stap.’
Yu ting tok bilong ol i stret? Pasin bilong daunim narapela na tingting nogut long narapela skin—ating em i no inap pinis? God i gat wanem tingting long dispela pasin?
God i Laikim Olgeta Lain Manmeri
Baibel i tok, God i no orait long pasin bilong laikim sampela na daunim sampela. (Sindaun 24:23; 28:21) Em i tok, “ol man i kisim kain gutpela tingting na save i kam long God, ol i save mekim ol pasin olsem. Namba wan, ol i save bihainim klinpela tingting. Na namba 2, ol i save stap wanbel wantaim ol arapela . . . na ol i save mekim wankain pasin tasol long olgeta man.” (Jems 3:17) Long lain Israel long bipo, God i tokim ol jas ol i mas bihainim kain gutpela tingting olsem. God i tokim ol: “Yupela i mas mekim stretpela pasin long kot. . . . Yupela i no ken helpim ol rabisman bai ol i winim nating kot. Tasol yupela i no ken pret long ol man i gat namba na biknem na helpim ol long winim kot.”—Wok Pris 19:15.
Ol tok bilong Krais Jisas na tupela aposel bilong em, Pita na Pol, i kamapim klia olsem Baibel i no orait liklik long pasin bilong laikim sampela na daunim sampela na tingting nogut long narapela. Jisas i no bin daunim ol manmeri em “tingting bilong ol i paul nabaut, na ol i stap nogut tru, olsem ol sipsip i no gat wasman.” (Matyu 9:36) Em i skulim ol man olsem: “Yupela i no ken skelim ol samting long ai nating. Yupela i mas skelim olgeta samting long pasin i stret.”—Jon 7:24.
Pita na Pol i helpim yumi long save olsem God Jehova i save mekim wankain pasin long olgeta man. Pita i tok: “Tru tumas, nau mi save, God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (Aposel 10:34, 35) Aposel Pol i tok: “God i save skelim olgeta manmeri long wankain pasin tasol, maski ol i bilong wanem lain.”—Rom 2:11.
Baibel Inap Tanim Tingting Bilong Man
Baibel i gat strong bilong senisim pasin bilong ol man i larim tok bilong en i stiaim ol. Hibru 4:12 i tok: “Tok bilong God em i gat laip, na em i wok strong i stap.” Man i save tingting nogut long narapela, Jehova inap helpim em long tanim tingting bilong em na bai em i lusim dispela pasin na kirap mekim wankain pasin long olgeta man.
Olsem long stori bilong Sol bilong Tarsus. Baibel i tok, pastaim em i mekim nogut tru long kongrigesen Kristen, long wanem, em i bihainim ol strongpela pasin bilong lotu bilong ol tumbuna. (Aposel 8:1-3) Ol pasin bilong lotu Juda i kirapim Sol long bilip strong olsem, ol Kristen ol i lain bilong bikhet na lusim bilip tru na ol i birua bilong trupela lotu. Dispela tingting kranki i mekim na em i helpim wok bilong kilim i dai ol Kristen. Baibel i tok, “Long dispela taim Sol i tok strong yet long bagarapim ol disaipel bilong Bikpela na kilim ol i dai.” (Aposel 9:1) Taim em i mekim olsem, em i ting em i mekim gutpela wok bilong God.—Skelim wantaim Jon 16:2.
Tasol Sol bilong Tarsus i bin lusim dispela pasin bilong tingting nogut tru long ol Kristen. Na em yet i kamap wanpela Kristen. Bihain em i kisim nem Pol, em wanpela aposel bilong Krais Jisas, na em i raitim pas na i tok olsem: “Tru, bipo mi bin tok bilas long nem bilong em, na mi birua long em na mi bin tok nogut long em. Tasol em i save, mi bin mekim ol dispela pasin, long wanem, mi no bin save gut long em na mi no bilip long em. Olsem na em i sori long mi.”—1 Timoti 1:13.
Tasol i no Pol wanpela tasol i bin mekim bikpela senis long tingting bilong em. Taim Pol i raitim pas long Taitus, wanwok bilong em long autim gutnius, em i tok strong long ol Kristen olsem, ol i “no ken tok nogut long wanpela man, na ol i no ken tok pait. Oltaim ol i mas stap isi tasol na mekim gutpela pasin long olgeta manmeri. . . . Bipo yumi tu i no gat gutpela tingting na yumi save sakim tok. . . . Yumi bin wokabaut long pasin bilong bel kros na bel nogut long ol arapela. Ol man i bin birua long yumi na yumi wan wan i bin birua long ol arapela.”—Taitus 3:2, 3.
Lusim Pasin Bilong Tingting Nogut Long Narapela Skin
Long nau, ol Kristen tru i wok strong long bihainim dispela tok. Ol i no laik skelim ol man long ol samting ol i lukim long ai tasol. Dispela i save helpim ol long abrusim pasin bilong ‘tok nogut’ long ol narapela. Ol i amamas long stap olsem wanpela bikpela lain brata long olgeta hap, maski ol i bilong wanem ples, o lain, o skin—ol i winim pinis ol dispela samting i save pasim ol man bilong dispela graun long i stap wanbel.
Tingim stori bilong Henrique, em wanpela blakskin Brasil. Ol waitskin i bin mekim sampela pasin bilong daunim em, long wanem, em i blakskin, olsem na em i kirap nolaik tru long ol waitskin. Em i tok: “Tupela Witnes, ol i waitskin, ol i bin kam long haus bilong mi na autim tok long nem bilong God. Pastaim mi no laik harim tok, long wanem, mi no bilip long ol waitskin. Tasol kwiktaim mi pilim olsem dispela tok ol i mekim em tok i tru. Mi kirap stadi long Baibel. Namba wan askim bilong mi em olsem, ‘I gat planti blakskin long lotu bilong yupela?’ Ol i bekim tok, ‘Yes.’ Bihain ol i soim mi laspela piksa long buk Baibel Stori Buk Bilong Mi,a na mi lukim ol yangpela bilong kain kain lain. Wanpela, em i blakskin. Dispela i strongim bel bilong mi. Bihain mi bin go long Haus Kingdom bilong ol Witnes Bilong Jehova na mi lukim ol manmeri bilong kain kain lain na narapela i mekim gut long narapela. Dispela em bikpela samting tru long mi.”
Long nau, Henrique em i wanpela Witnes Bilong Jehova, na em i amamas long em i insait long wanpela lain Kristen ol i brata tru. Em i save, dispela i no kamap long wok bilong wanpela man. Em i tok: “Nau mi tenkyu long Jehova na Jisas long olgeta samting ol i bin mekim bilong helpim mi. Mi wok wantaim planti milion gutpela wokboi bilong Jehova, ol i bilong kain kain lain, na skin, na sindaun, tasol ol i wanbel long mekim wanpela wok tasol.”
Na Dario tu, taim em i wok long go bikpela, sampela i bin daunim em, long wanem, em i bilong narapela lain. Taim em i gat 16 krismas, em i kirap stadi long Baibel wantaim ol Witnes Bilong Jehova. Em i tok: “Mi kisim save olsem ol Witnes i no gat kain tingting olsem narapela lain i winim narapela lain.” Em i kirap nogut long lukim pasin bilong ol, em narapela i laikim tru narapela. Na em i lukim tu olsem ol man i holim wok long kongrigesen ol i bilong kain kain lain. Taim sampela man ausait long kongrigesen i tingting nogut long em o ol i mekim sampela pasin bilong daunim em, Dario i save tingting olsem, Jehova i save laikim ol manmeri bilong olgeta skin na lain na tok ples.
Rot Bilong Karim Dispela Hevi
Yumi olgeta i laik bai ol narapela i tingim yumi na givim biknem long yumi—yumi no laik bai ol i mekim olsem yumi samting nating. Olsem na taim man i kisim hevi long narapela i tingting nogut long em, dispela hevi i hatwok tru long karim. Kongrigesen Kristen i no save banisim yumi olgeta na bai ol hevi i no ken kamap long yumi long pasin bilong tingting nogut long narapela—em pasin bilong ol man nogut bilong dispela graun. Inap long taim Satan i no bosim moa dispela graun, ol man bai mekim ol pasin i no stret. (1 Jon 5:19) Kamapim Tok Hait 12:12 i toksave olsem: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” Em i laik bagarapim yumi. Baibel i tok em i olsem wanpela animal nogut. Aposel Pita i tok: “Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai.”—1 Pita 5:8.
Na Baibel i tok: “Olsem na yupela i mas daunim yupela yet na i stap aninit long God. Yupela i mas sakim Satan, na em bai i lusim yupela na ranawe.” (Jems 4:7) Nambawan rot bilong karim dispela hevi em long wetim God i helpim yumi, olsem King Devit i bin mekim, em i tok: “God bilong mi, yu kisim bek mi long han bilong ol man nogut. Ol i strong tumas na pasin bilong ol i nogut tru.” (Song 71:4) Na yumi ken beten olsem man bilong raitim Song: “God, yu mas marimari long mi. Ol man i save ranim mi na pait long mi. Oltaim ol birua i mekim nogut long mi.”—Song 56:1.
God bai mekim wanem bilong helpim ol man i beten olsem? Baibel i tok: “Em i save helpim ol rabisman i singaut long em. Na ol manmeri i sot long ol samting na i no gat helpim, orait em yet bai i helpim ol. Em i save sori long ol manmeri i no gat strong na i stap rabis. Na ol manmeri i no gat samting em i save kisim bek ol.” (Song 72:12, 13) Yes, yumi amamas long save olsem, long taim Jehova i makim em bai helpim olgeta manmeri ol man i mekim pasin i no stret long ol!
“Bai i No Gat Wanpela i Mekim Nogut Long Narapela”
Ating ol gavman bilong dispela graun bai wok strong yet long putim ol lo na kamapim sampela wok samting bilong daunim pasin bilong tingting nogut long narapela. Na ol bai tok promis yet long kamapim stretpela pasin na long helpim olgeta man na bai ol i stap wankain. Tasol ol i no inap mekim olsem. (Song 146:3) God wanpela tasol inap pinisim olkain pasin bilong daunim narapela man, na em bai mekim olsem. Em bai mekim na olgeta manmeri bai kamap olsem wanpela famili na stap wanbel. “Planti manmeri tru . . . ol i bilong olgeta lain man na bilong olgeta kantri na bilong olgeta kain skin na bilong olgeta tok ples,” ol bai abrusim bagarap long taim pasin nogut bilong nau i pinis na ol bai sindaun long bel isi.—KTH 7:9, 10.
Jehova bai stretim bek olgeta hevi i bin kamap long pasin bilong tingting nogut long man bilong narapela skin o sindaun. Tingim dispela samting: Bai i no gat wanpela man em narapela i mekim pasin i no stret long em! “Olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.” (Maika 4:4) Na Aisaia 11:9 i tok: “Bai i no gat wanpela i mekim nogut long narapela.”
Sapos nau yu kisim hevi long sampela i tingting nogut long yu, dispela ol gutpela tok promis bilong bihain bai strongim pasin pren bilong yu wantaim Jehova, na bai i helpim yu long karim hevi na sanap strong taim ol man long dispela taim nogut i mekim sampela pasin i no stret long yu. Taim yu wok long karim hevi na lukluk i go long bihain, yu mas bihainim dispela gutpela tok bilong Baibel: “Yupela olgeta manmeri i bilip long Bikpela, yupela sanap strong, na bel bilong yupela i ken kisim strong oltaim.”—Song 31:24.
[Futnot]
a Sosaiti Wastaua bilong Nu Yok i wokim.
[Piksa Kredit Lain long pes 4]
U.S. National Archives photo