Ol Tok We i Helpim Yumi Long Wetim Ol Gutpela Samting

God Bai Pinisim Olgeta Man Nogut

“Maski ol man nogut i kamap planti olsem ol gras nogut na ol man bilong mekim pasin nogut i kisim planti samting na i stap gut, ol bai pinis olgeta.”—BUK SONG 92:7.

Olsem yumi lainim long atikol i kamap paslain long dispela, pasin nogut i wok long go bikpela. Yumi no kirap nogut long dispela. Long wanem, Baibel i tok profet long 2 Timoti 3:1-5 olsem long “taim bilong las de,” pasin bilong ol man bai go nogut olgeta. Las de bilong wanem samting? Las de bilong ol manmeri i sakim tok bilong God. Klostu nau, God bai pinisim olgeta man i no laik senisim pasin nogut bilong ol. Bihain, ol gutpela manmeri tasol—em ol manmeri i bihainim tok bilong God—bai stap long graun. “Ol stretpela man bai kisim graun olgeta, na ol bai stap oltaim long en.”—Buk Song 37:29.

God Bai Bagarapim Satan

“God husat i save givim bel isi, em bai krungutim Satan.”—ROM 16:20.

Taim olgeta man nogut, Satan, na ol spirit nogut i pinis olgeta, bel isi bai stap long graun olgeta. Krieta bilong yumi i tok promis olsem: “I no gat wanpela bai mekim [yu] i pret.”—Maika 4:4.

God Bai Pinisim Sik na Dai

“Haus sel bilong God i stap wantaim ol manmeri . . . Na em bai mekim drai aiwara i stap long ai bilong ol, na bai i no gat dai moa, na ol bai i no bel hevi moa na krai moa, na ol bai i no inap pilim pen gen.”—REVELESEN 21:3, 4.

Pen na hevi na sik bai pinis bikos God bai stretim bek olgeta samting nogut em Satan, Adam, Iv, na sin bilong yumi yet i kamapim. Olsem na “bai i no gat dai moa.” Ol man i laikim na bihainim tok bilong Krieta ol bai stap oltaim oltaim. Tasol ol bai stap long we?

Krieta Bilong Yumi Bai Mekim Graun i Kamap Paradais

“Ples wesan nating wantaim ples drai bai ol i amamas tru, long wanem, ol naispela plaua bai i kamap na karamapim ol dispela hap.” —AISAIA 35:1.

Taim God i pinisim ol pasin nogut, graun bai kamap paradais! Bai pulap long ol naispela pak na ol gaden, na graun bai kamapim planti kaikai. (Buk Song 72:16) Solwara, ol raunwara, na ol wara bai klin na pulap long olgeta samting i gat laip. Ol man bai no inap tingim olsem bipo graun i pulap long ol samting i doti. Ol man bai wokim ol haus bilong ol yet na sindaun long en. Olgeta man bai gat haus bilong ol yet, no gat wanpela man bai stap hangre, o stap rabis.—Aisaia 65:21, 22.

God Bai Kirapim Bek Ol Man i Dai Pinis

“Bai i gat kirap bek bilong ol man i dai pinis.” —APOSEL 24:15.

Yu laik lukim ol famili na pren bilong yu husat i dai pinis? God i Gat Olgeta Strong bai givim laip bek long ol—o kirapim bek ol—long Paradais long graun. Yu bai luksave long ol, na ol bai luksave long yu. Piksaim long tingting bikpela amamas, yu na ol bai kisim! Wai na yumi ken bilip tru olsem dispela samting bai kamap? Bikos Baibel i stori long ol manmeri na ol pikinini em ol i bin kirap bek na bung gen wantaim ol famili bilong ol. Na tu, planti taim Jisas i bin kirapim bek ol man i dai pinis long ai bilong planti man.—Luk 8:49-56; Jon 11:11-14, 38-44.