Ol Elektronik Divais I Mekim Wanem Long Ol Pren?
Maski tupela man i stap long ol narapela narapela hap bilong graun, ol inap toktok wantaim long rot bilong teks, e-meil, vidio konferens, na sosel netwok. Ol i yusim ol elektronik divais long mekim ol gutpela samting.
Tasol sampela man i save yusim tasol ol elektronik divais bilong toktok wantaim ol pren, na dispela save kamapim ol hevi olsem . . .
ol i no kliagut long ol filings bilong ol pren bilong ol.
ol i pilim ol i stap wanpis na laip i no gat as bilong en.
ol i tingim ol yet tasol na ol i no tingim narapela.
SAMTING YU MAS SAVE
PILIM TINGTING BILONG NARAPELA
Bilong pilim filings bilong narapela, yumi mas stap isi, no ken les kwik na tingim em—samting i mekim na i hatwok long mekim olsem em yumi bisi long ritim na salim planti teks mesis na wok long lukluk long sosel netwok.
Sapos ol elektronik divais i bosim yu, bai yu pilim olsem em bikpela wok tumas long bekim mesis bilong pren bilong yu. Ating yu pilim olsem yu mas hariap long bekim ol mesis na yu no luksave olsem wanpela pren bilong yu i nidim helpim.
SAMTING BILONG TINGIM: Olsem wanem yu inap “pilim hevi bilong narapela” taim yu yusim ol elektronik divais long toktok wantaim ol pren?—1 PITA 3:8.
LAIP I NO GAT AS BILONG EN
Wanpela wok painimaut i kamapim olsem planti manmeri i save lukluk long wanpela sosel netwok na bihain ol i no pilim amamas. Ol saveman i tok pasin bilong lukluk long ol piksa na stori bilong ol narapela inap mekim na man “i pilim olsem em i no mekim wanpela gutpela samting long laip bilong em.”
Na tu, taim yu lukim ol piksa bilong ol narapela, dispela inap mekim na yu pilim olsem laip bilong yu yet i no gutpela tumas. Ating i luk olsem ol narapela i stap amamas, na laip bilong yu yet em boring.
SAMTING BILONG TINGIM: Taim yu yusim sosel netwok, hau bai yu ken abrusim pasin bilong skelim yu yet wantaim ol narapela? —GALESIA 6:4.
YU TINGIM YU YET
Wanpela tisa i tok sampela sumatin bilong em i save tingim ol yet tasol na ol i laik bai ol narapela i sapotim ol. Man o meri i gat kain pasin olsem em i laik bai ol narapela i mekim ol samting bilong helpim em tasol. Wanpela inap tingim ol pren bilong em i kain olsem fon o kompiuta em i yusim, na taim em i no nidim em i ofim, olsem i no bisi moa long ol.
SAMTING BILONG TINGIM: Ol samting yu putim long Intenet i soim olsem yu gat pasin bilong resis o yu tingim yu yet tasol?—GALESIA 5:26.
SAMTING YU KEN MEKIM
SKELIM PASIN BILONG YU LONG YUSIM OL ELEKTRONIK DIVAIS
Taim yu bosim pasin bilong yu long yusim ol elektronik divais, dispela bai helpim yu long toktok gut oltaim wantaim ol pren bilong yu na strongim pasin pren bilong yu wantaim ol.
STIATOK BILONG BAIBEL: “Man i gat pasin laikim . . . em i no save tingim em yet.”—1 KORIN 13:4, 5.
Makim wanem tok i stap em yu laik bihainim, o raitim ol aidia bilong yu yet.
Traim long toktok wantaim ol narapela (no ken salim tasol teks mesis o e-meil)
Lusim fon i stap (o putim long silent) taim yu toktok wantaim ol narapela
Sotim ol taim em yu save yusim long sosel netwok
Putim gut yau taim narapela i toktok
Ringim o salim mesis long wanpela pren em hevi i painim em