Yu Ting Sosel Midia i Bagarapim Pikinini Bilong Yu?​—Hau Baibel Inap Helpim Ol Papamama

“Planti yangpela i kisim sik bilong tingting—na sosel midia em namba wan samting we i kamapim dispela hevi.” Dr. Vivek Murthy, U.S. surgeon general, New York Times, Jun 17, 2024.

Hau bai ol papamama i lukautim ol pikinini na bai sosel midia i no bagarapim ol? Baibel i kamapim gutpela edvais.

Samting ol papamama inap mekim

Skelim ol dispela stiatok bilong Baibel.

“Man i gat pasin bilong tingting gut na mekim samting, em i save skelim gut olgeta wokabaut bilong em.”​—Provep 14:15.

Sosel midia inap bagarapim pikinini, olsem na yu no ken ting olsem yu gat wok long larim pikinini i yusim sosel midia. Tasol paslain long yu larim em i yusim sosel midia, skelim sapos em yet inap skelim gut ol samting na i no lusim bikpela taim long sosel midia, strongim pasin pren bilong em wantaim ol narapela, na abrusim ol samting i no stret i stap long sosel midia.

• Sapos yu laik kisim sampela save moa, ritim ol dispela atikol “Should My Child Use Social Media?” and “Teaching Your Teenager Social Media Safety.”

“Yupela i mas yusim gut taim.”​—Efesus 5:16.

Sapos yu bai larim pikinini i yusim sosel midia, orait putim sampela lo bilong em i ken bihainim, na eksplenim hau bai dispela lo i lukautim em. Redi long luksave long sampela senis i kamap long pasin bilong pikinini we inap mekim na yu no larim em i yusim tumas sosel midia.

• Yusim waitbot katun Sosel Netwok-Bihainim Savetingting long helpim pikinini long kliagut long risen na yu no larim em i yusim tumas sosel midia.

Kisim sampela save moa

Baibel i tok yumi stap long ‘taim nogut we bai givim hatwok long ol man.’ (2 Timoti 3:1-5) Na tu, Baibel i kamapim ol gutpela edvais bilong helpim yumi long karim ol hevi. Dispela atikol i gat lista bilong 20 atikol we inap helpim ol papamama na ol pikinini bilong ol long sik bilong tingting we i kamap long ol tineja