Ol Elektronik Divais I Mekim Wanem Long Ol Marit?
Taim tupela marit i yusim gut ol elektronik divais, dispela bai strongim tupela long pas gut wantaim. Olsem, tupela i ken ring o salim teks long narapela narapela sampela taim insait long de.
Tasol sampela marit i no mekim gutpela wok long ol elektronik divais na dispela i kamapim ol hevi olsem . . .
ol i no gat taim bilong mekim ol samting wantaim.
taim ol i stap long haus ol i yusim ol elektronik divais long mekim wok yet we i no gat nid long mekim.
narapela i no trastim narapela, na tu, ol i no stap gut long narapela narapela.
SAMTING YU MAS SAVE
MEKIM OL SAMTING WANTAIM
Wanpela maritman nem bilong em Michael i tok: “Sampela taim mi na meri bilong mi i stap wantaim, tasol i olsem em i no stap. Em i bisi long lukluk long fon bilong em, na em i save tok, ‘Mi no bin sekim fon inap long nau.’” Wanpela maritman nem bilong em Jonathan i tok, long kain taim olsem “tupela i stap long seim hap tasol i olsem tupela i stap long narapela narapela ples.”
SAMTING BILONG TINGIM: Taim yu toktok wantaim poroman marit bilong yu, hamas taim fon i save ring, teks, o toksave bilong teks i pairap na distebim yutupela?—EFESUS 5:33.
WOK
Sampela manmeri i gat wok we taim ol i stap long haus ol i mas wok yet. Sampela i no gat kain wok olsem, tasol taim ol i stap long haus ol i save wok yet. Wanpela maritman nem bilong em Lee i tok: “Maski mi makim haptaim bilong mekim ol samting wantaim meri bilong mi, mi save sekim yet ol fon kol na ol mesis bilong wok long dispela haptaim.” Wanpela maritmeri nem bilong em Joy i tok: “Mi save stap long haus na wok, so i hatwok long stop long wok. Mi mas taitim bun long balensim ol samting.”
SAMTING BILONG TINGIM: Yu save putim gut yau taim poroman marit bilong yu i toktok?—LUK 8:18.
STAP GUT LONG POROMAN MARIT
Wanpela wok painimaut i soim olsem wanpela as na ol tok pait i save kamap insait long marit em man o meri i saspek long poroman marit bilong em long ol samting em i putim long sosel netwok. Ten pesen bilong lain ol i skelim i tok, ol i putim ol samting long Intenet em ol i no laik bai poroman marit bilong ol i save long en.
Planti manmeri i tok sosel netwok i gat planti samting long en we inap bagarapim marit, na tu, i opim rot long planti marit i mekim pasin adaltri. Wanpela divos loya i tok olsem sosel netwok i wanpela bikpela as na planti marit bilong nau i bruk.
SAMTING BILONG TINGIM: Yu save hait long man o meri bilong yu na toktok o salim teks long wanpela i no poroman marit bilong yu?—PROVEP 4:23.
SAMTING YU KEN MEKIM
MAKIM OL SAMTING I MAS STAP NAMBAWAN
Man i no kaikai em bai no stap helti. Olsem tasol, man o meri i no lusim haptaim long mekim ol samting wantaim poroman marit bilong em, dispela inap kamapim hevi insait long marit.—Efesus 5:28, 29.
STIATOK BILONG BAIBEL: “Skelim gut wanem ol samting i bikpela samting moa.”—FILIPAI 1:10.
Toktok wantaim man o meri bilong yu long ol tok stap daunbilo em yutupela i laik bihainim, o raitim ol aidia we inap helpim yupela na ol elektronik divais i no ken putim hevi long marit bilong yupela.
I gutpela long kaikai wantaim wanpela taim long olgeta de
Makim wanpela taim long mitupela i ofim ol fon na no ken yusim
Stretim rot long mitupela i ken mekim sampela samting wantaim
Mitupela i mas ofim ol fon long nait, na no ken karim i go insait long rum slip
Mitupela i mas ofim fon inap 15 minit long olgeta de, na bai mitupela i ken toktok wantaim na i no gat ol samting i distebim mitupela
Makim wanpela taim stret long olgeta de long stop long yusim Intenet