GRAUN I PULAP LONG HEVI

1 | Lukautim Helt Bilong Yu

WAI EM BIKPELA SAMTING

Wanpela hevi o disasta i kamap inap bagarapim helt bilong ol manmeri o i bagarapim ol long narapela rot.

Ol hevi i putim presa long ol manmeri, na taim hevi i stap longpela taim dispela inap mekim na isi long ol i kisim sik.
Ol hevi inap putim presa long ol haus sik na ol i no inap lukautim gut ol sikman bikos i gat planti sikman na ol i sot long marasin.
Ol hevi inap givim hatwok long ol manmeri long baim ol samting ol i nidim, kain olsem ol kaikai na ol marasin samting.

Samting Yu Mas Save

Bikpela sik na pasin bilong tingting planti inap mekim na yu no skelim gut ol samting, na dispela bai mekim na yu no lukautim gut helt bilong yu. Olsem na sik bilong yu inap kamap bikpela moa.
Sapos yu no stretim sik bilong yu hariap em inap go bikpela, na yu inap lusim laip bilong yu.
Sapos yu stap helti, yu bai mekim ol gutpela disisen long laip bilong yu maski i gat hevi i stap.
Maski yu gat wanem kain sindaun, yu inap mekim ol samting bilong lukautim helt bilong yu.

Samting Yu Ken Mekim Nau

Sapos inap, man i gat savetingting i save skelim ol hevi we inap kamap na mekim ol samting bilong abrusim ol. Yu mas mekim olsem long helt bilong yu. Planti taim yu inap daunim sik long rot bilong lukautim gut yu yet na klinim gut haus bilong yu. Pasin bilong lukautim helt bilong yu i gutpela moa winim pasin bilong kisim marasin.

“Mipela i lukautim gut mipela yet na mekim ol samting bambai haus bilong mipela i stap klin, olsem na mipela i no tromoi bikpela mani long go lukim dokta na baim marasin.”—Andreas.a

a Mipela i senisim sampela nem long dispela magasin.

HAU YU INAP KARIM HEVI—Sampela Gutpela Poin

Long taim bilong hevi, lukautim helt bilong yu long rot bilong mekim ol dispela samting

MEKIM OL SAMTING BILONG STAP KLIN

Mekim Ol Samting Bilong Stap Klin

Baibel i tok: “Man i gat pasin bilong tingting gut na mekim samting, em i lukim hevi na em i haitim em yet.” (Provep 22:3) Traim long tingim ol hevi inap kamap na abrusim ol samting inap bagarapim helt bilong yu.

Wasim han bilong yu olgeta taim wantaim sop na wara, moa yet paslain long yu holim kaikai o bihain long yu yusim toilet.
Olgeta taim klinim haus bilong yupela wantaim marasin, moa yet olgeta hap bilong haus we yupela i save tatsim.
Sapos inap, stap longwe long ol man i gat sik i save kalap long narapela.

KISIM GUTPELA KAIKAI

Kisim Gutpela Kaikai

Baibel i tok: “I no gat wanpela man i save heitim bodi bilong em yet, nogat. Em i save givim kaikai long en na tingim olsem samting i dia tumas.” (Efesus 5:29) Yumi soim olsem yumi laikim bodi bilong yumi taim yumi skelim gut kaikai yumi kisim.

Dring planti wara.
Kisim kain kain prut na kumu samting.
No ken kaikai ol samting i gat planti gris, sol, na suga.
No ken smok o dring tumas planti alkohol, o kisim drak

“Mipela i traim long kisim ol gutpela kaikai na bai mipela i no ken sik; sapos mipela i no mekim olsem, mipela bai tromoi mani mipela i kisim bilong baim dokta na marasin. Olsem na mipela i yusim mani bilong mipela long baim gutpela kaikai bilong helpim bodi.”—Carlos.

EKSASAI NA MALOLO GUT

Eksasais

Baibel i tok: “I gutpela moa long kisim liklik malolo winim pasin bilong wok hat tumas na ron i go bilong holimpasim win.” (Eklisiastis 4:6) Yumi mas wok tasol yumi mas malolo tu.

Mekim ol eksasais. Yu ken mekim olsem long rot bilong wokabaut olgeta taim. Eksasais inap helpim helt bilong yu maski yu lapun, o yu gat sampela bagarap long bodi, o yu gat sik we i no inap pinis.
Malolo Gut

Kisim gut malolo. Long nau, sapos yu no slip gut dispela inap mekim na presa bilong yu i go antap na yu no inap putim gut tingting long ol samting. Na bihain, yu inap kisim bikpela sik moa.
Makim wanpela taim stret bilong go slip na bihainim. Traim long go slip long wankain taim, na kirap long wankain taim long olgeta de.
Abrusim pasin bilong watsim TV o yusim ol elektronik divais taim yu stap long bet.
Abrusim pasin bilong kisim bikpela kaikai, ol dring na kaikai i gat kafin long en, na alkohol paslain long yu slip.

“Mi luksave olsem pasin bilong mi long slip i mekim sampela samting long helt bilong mi. Sampela taim sapos mi no slip gut, het na bodi bilong mi i save pen. Tasol taim mi slip gut mi pilim olsem mi inap long mekim olgeta samting! Mi gat bikpela strong na mi no save sik tumas.”—Justin.