HEVI BILONG PRAIS I GO ANTAP

Basetim Gut Mani

Prais bilong ol samting i wok long go antap na dispela i givim hatwok long yumi olgeta. Tasol no ken pilim olsem yu no gat rot. I gat sampela samting em yu inap mekim bilong helpim yu.

WAI EM I BIKPELA SAMTING

Sapos yu no traim long basetim gut mani bilong yu, bai hatwok long yu kontrolim hamas mani yu save spendim, na dispela bai mekim hevi bilong yu long mani i go bikpela. Maski yu no gat planti mani, i gat sampela samting em yu inap mekim bilong helpim yu long basetim gut mani bilong yu.

SAMTING YU KEN MEKIM

No ken spendim bikpela mani winim mani yu gat. Taim yu mekim olsem, yu bai pilim olsem yu inap kontrolim gut hau yu yusim mani bilong yu, na bel bilong yu bai stap isi na yu bai gat mani bilong spendim long narapela samting.

Bilong helpim yu long no ken spendim bikpela mani winim mani yu save kisim, yu mas wokim wanpela baset—mekim plen, olsem raitim hamas pe yu save kisim na hamas mani yu save spendim, dispela bai helpim yu long was gut na yu no tromoi nating nating mani. Taim yu skelim baset bilong yu, strongim tingting long baim tasol ol samting em yu nidim tru. Na traim bes long bihainim gut plen bilong yu, yu ken senisim sapos pe bilong yu o prais bilong ol samting i senis. Sapos yu marit, orait yu na poroman marit bilong yu i ken mekim disisen wantaim long dispela.

Traim dispela: No ken yusim kredit kat long baim ol samting, yu mas baim long mani stret. Sampela i lukim olsem taim ol i bihainim dispela rot, ol i lukautim gut baset bilong ol na ol i no gat dinau. Na tu, yu mas lusim sampela haptaim long ritim na skelim gut ol benk stetmen. Yu bai i no pilim presa tumas sapos yu save long hamas mani yu gat long akaun bilong yu.

Em hatwok long baim olgeta samting yu nidim sapos yu no save kisim bikpela pe. Tasol sapos yu gat gutpela baset plen, dispela bai helpim yu.

“Skelim gut pe bilong [ol] samting.”—Luk 14:28.

Lukautim gut wokmani bilong yu. Yu inap mekim wanem ol samting bilong lukautim wok mani bilong yu? Sampela eksampel: Go long wok long taim stret. Holim stretpela tingting long wok bilong yu. Soim olsem yu redi long helpim ol narapela, na wok strong. Rispektim ol narapela. Bihainim ol lo, na traim long mekim wok bilong yu i kamap gutpela moa.

No ken westim mani long ol samting i no inap helpim yu. Askim yu yet, ‘Mi gat pasin bilong baim ol samting we i no inap helpim mi, o i no gutpela long mi?’ Eksampel, planti man i westim pe bilong ol long baim drak, pilai laki, smok, o drink planti tumas alkohol. Ol dispela pasin inap bagarapim helt bilong ol na bos inap rausim ol long wok.

“Man i painim pinis savetingting, em i ken amamas . . . Dispela i winim pasin bilong kisim silva.”—Provep 3:13, 14.

Seivim sampela mani long taim bilong imejensi. Sapos inap, yu ken putim sampela mani long sait long taim wanpela hevi we yu no tingim i kamap o long taim bilong imejensi. Mani yu seivim long sait bai lukautim yu o wanpela long famili husat i kisim sik wantu, taim yu no wok moa, o sampela narapela hevi we yu no ekspektim i kamap.

“Taim nogut na ol samting we man i no ting inap kamap, i save painim [yumi] olgeta.”—Eklisiastis 9:11.

Sampela Edvais Bilong Seivim Mani

Kukim kaikai long haus.

Em ekspensiv long kaikai oltaim long restron o long olgeta de baim dring o kaikai ol i redim pinis. Maski yu mas lusim bikpela taim na strong bilong kukim kaikai long haus, dispela bai helpim yu long seivim mani. Na tu, bai yu inap skelim na lukautim gut kaikai bilong yu.

Tingting gut taim yu laik baim samting.

Raitim long wanpela lista ol samting yu mas baim, na bihainim stret lista. Sakim strong laik bilong baim samting yu no tingting long baim.
Baim ol kaikai long 6-pek samting sapos pe bilong en i daun na yu inap long baim. Tasol yu mas putim gut ol kaikai long seiv ples so ol i no ken bagarap.
Skelim gut samting long stua em pe i daun we yu inap baim, sapos em i strongpela na inap stap longpela taim.
Painim ol samting long Intenet we prais i daun, no ken baim samting em yu no plen long baim long stua, na was gut long mani bilong yu taim yu baim samting long Intenet. Sapos yu inap baim samting long rot bilong Intenet long hap yu stap long en, yu ting yu laik traim?
Painim ol samting we i gat diskaun long en, na lukluk long ol kaikai samting i stap long spesel. Skelim prais bilong ol samting wantaim kos bilong pawa, na ol narapela samting.

Tingting gut paslain long yu laik baim nupela samting.

Ol kampani bilong wokim fon na ol narapela narapela samting i save wokim ol nupela nupela model long olgeta taim bilong kisim bikpela profit. So askim yu yet: ‘Sapos mi baim nupela fon, ating dispela inap helpim mi tru? Mi nidim tru dispela nupela model? Na sapos mi baim nupela fon, tru tru mi nidim dispela leitest model?’

Ol samting bilong stretim na yusim gen.

Yu mas lukautim gut ol samting bilong yu olsem fris na stov na bai ol i stap gut na stap longpela taim, sapos ol i bagarap yu ken stretim sapos yu inap, na bai yu no inap tromoi bikpela mani long stretim. Ating yu ken skelim tu sapos yu ken baim ol samting long sekenhen.

Planim kaikai bilong yu yet.

Yu inap painim liklik hap graun bilong planim kaikai bilong yu? Sapos yu mekim olsem bai yu no tromoi bikpela mani long stua. Ating yu ken planim ol kaikai we yu inap serim, o senisim wantaim ol narapela, o salim.

“Ol plen bilong man i save wok strong bai kamapim gutpela samting.”—Provep 21:5.

“Long olgeta de, mipela i save putim ai long prais bilong ol samting mipela i save baim oltaim, na mipela i save was gut bambai mipela i no yusim kredit kat bilong mipela long olgeta taim.”—Miles, Inglan.

“Paslain long mipela i go long stua, mi na famili bilong mi i save raitim ol samting mipela i nidim long wanpela lista.”—Jeremy, U.S.A.

“Long olgeta taim mipela famili i save skelim baset bilong mipela na bai mipela i ken save sapos mipela i mas mekim sampela senis, na putim long sait sampela mani bilong yusim long taim wanpela hevi mipela i no ekspektim i kamap.”—Yael, Israel.

“Mipela i save skulim ol pikinini bilong mipela long stretim ol samting i bruk na mipela i no baim nupela. Dispela i makim tu ka bilong mipela na ol samting bilong haus. Na tu, mi na meri bilong mi i abrusim pasin bilong baim ol leitest model.”—Jeffrey, U.S.A.

“Mi no spendim bikpela mani tumas bikos mi planim kaikai bilong mi yet na lukautim kakaruk. Na tu, mi inap long serim kaikai wantaim ol narapela.”—Hono, Mianma.

Wanpela man i kisim ol vetstebol long gaden.