Planti manmeri i wok hat tru long olgeta de bilong kisim ol samting ol i nidim. Sori tru, ol hevi bilong graun i givim bikpela hatwok tru long ol man. Bilong wanem?
Taim hevi i kamap long wanpela hap, dispela i mekim na pe bilong ol samting olsem kaikai na haus i go antap tru.
Ol hevi i mekim na planti man moa i lusim wok o ol i mekim wok we ol i kisim liklik pe tasol.
Ol disasta inap bagarapim wok bisnis bilong ol man, haus, o ol narapela samting bilong ol, na mekim planti i kamap rabis.
Samting Yu Mas Save
Yu mas yusim gut mani bilong yu na long taim bilong hevi yu bai gat mani bilong lukautim yu yet.
Tingim olsem pe yu kisim, na mani yu bungim, strong bilong ol inap pinis, na ol samting yu gat i no inap helpim yu taim ol i bagarap.
I gat ol samting we yu no inap baim long mani olsem, amamas na pasin wanbel insait long famili.
Samting Yu Ken Mekim Nau
Baibel i tok: “Sapos yumi gat kaikai na laplap samting, orait yumi ken ting ol dispela samting em inap long yumi.”—1 Timoti 6:8.
Taim yumi tingim olsem ol samting yumi gat pinis em inap, bai yumi no tingting tumas long kisim ol samting yumi laikim, nogat, yumi bai amamas long ol samting yumi gat pinis em yumi nidim long olgeta de. Dispela i bikpela samting taim yu no gat planti mani.
Bilong amamas long ol samting yu gat pinis, yu mas redi long senisim sindaun bilong yu. Sapos oltaim yu baim ol samting i gat bikpela pe, hevi bilong yu long mani bai go bikpela.