Stadi 17
Kamapim Gut As Tok na Ol Bikpela Tok
1 Taim yu wok long toktok, yu mas kamapim as tok planti taim.
2 Sapos yu laik redim wanpela tok na yu laik tingim wanpela as tok bilong en, pastaim yu mas tingim ol man bai harim, na yu mas tingim ol samting yu laik bai ol i lainim long tok bilong yu. Taim yu mekim tok yu mas kamapim as tok planti taim, na kamapim gut.
3 Gutpela as tok. Long sedyul bilong Skul ol i makim pinis as tok bilong planti tok, tasol sampela taim yu yet yu mas tingim as tok. Yu ken tingim ol tok yu laik mekim na kisim wanpela bikpela tok i olsem as tok.
4 Kolim gen ol bikpela tok bilong as tok. Yu mas kolim ol bikpela tok bilong as tok planti taim insait long tok bambai yu kamapim gut na ol man inap save gut long en.
5 Taim yu tingim pinis as tok, yu mas tingim ol bikpela tok bilong helpim dispela tok, em ol bikpela hap bilong tok. Sapos wanpela tok i no helpim as tok, lusim. Yu mas kamapim gut insait bilong as tok.
6 No ken kamapim planti bikpela tok. Sapos yu kamapim planti tok tumas bai ol man i no inap kisim gut ol dispela tok. Nogut yu redim planti tok tumas na bai yu mas kolim hariap hariap. Gutpela sapos yu redim liklik tok tasol na yu kamapim gut.
7 Kamapim gut olgeta wan wan bikpela tok. Taim yu mekim tok yu mas stori long wanpela bikpela tok pastaim na bihain stori long narapela bikpela tok. Kamapim gut olgeta wan wan bikpela tok. Yu ken kamapim sampela liklik tok bilong helpim ol bikpela tok, tasol ol dispela liklik tok i mas kamapim gut as bilong bikpela tok. Yu mas stretim gut ol tok na skruim narapela bikpela tok i go long narapela bikpela tok bambai ol man i ken save ol dispela tok i stret wantaim.