Mekim Ol Bikpela Tok i Stap Ples Klia

WANEM ol tok i olsem ol bikpela tok? Tok i kirapim tingting bilong man na yu stori liklik tasol long en, dispela i no bikpela tok. Ol bikpela tok em ol bikpela tingting yu save stori planti long en. Em ol bikpela tingting yu mas kamapim bambai tok i ken mekim wok yu laik bai em i mekim.

Wanpela samting yu mas mekim bambai ol bikpela tok i stap ples klia, em yu mas skelim gut taim yu makim na bungim ol tok yu bai kamapim. Ating yu no inap kamapim olgeta save yu painim long ol buk samting, long wanem, em i planti tumas. Orait olsem wanem yu inap makim wanem ol tok yu mas kamapim?

Namba wan, tingim odiens. Ol i no save tumas long samting yu laik stori long en, o ol i save gut long en? Olsem wanem? Klostu olgeta i wanbel long tok Baibel i mekim long dispela, o i gat sampela ol i no bilip tumas long Baibel? Ol i save bungim wanem ol hevi long olgeta de taim ol i laik bihainim tok Baibel i mekim long dispela samting yu stori long en? Namba tu, yu mas klia gut olsem yu laik bai tok bilong yu i mas kirapim odiens long mekim wanem. Larim dispela tupela tok i stiaim yu long skelim gut ol tok yu painim long ol buk na mekim wok long ol tok i stret long tok yu laik mekim.

Sapos ol i givim yu wanpela autlain i gat wanpela tim na ol bikpela tok, orait yu mas bihainim dispela. Tasol tok bilong yu bai kamap gutpela moa sapos yu tingim dispela tupela tok i stap antap taim yu wok long kamapim ol wan wan bikpela tok. Sapos ol i no givim wanpela autlain long yu, orait em i samting bilong yu long makim ol bikpela tok.

Taim ol bikpela tok i pas gut long tingting bilong yu na yu stretim gut na putim ol narapela tok aninit long ol wan wan bikpela tok, orait bai yu no hatwok long givim dispela tok. Ating odiens tu bai kisim gut.

Sampela Pasin Bilong Stretim Ol Tok. I gat kain kain pasin bilong stretim tok bilong yu. Taim yu kisim save long ol dispela pasin, bai yu luksave olsem yu inap mekim gutpela wok long sampela, i stret long samting yu laik bai dispela tok i mekim.

Wanpela pasin yu ken kamapim planti taim, em pasin bilong bungim ol tok aninit long ol wan wan bikpela tok. (Ol wan wan bikpela tok i bikpela samting, long wanem, ol i helpim odiens long kisim gut tok bilong yu, o i helpim tok bilong yu long mekim wok bilong en.) Narapela pasin, em yu ken stori long ol samting i bin kamap pastaim na ol samting i kamap bihain. (Olsem, pastaim stori long ol samting i bin kamap paslain long bikpela tait, na bihain stori long ol samting i bin kamap paslain long taim Jerusalem i kisim bagarap long 70 C.E., na bihain moa stori long ol samting i kamap nau long taim bilong yumi.) Namba tri pasin, em yu ken stori long wanem samting i mekim na samting i kamap. (O yu ken stori long samting i kamap long nau, na wanem samting i kamap long dispela, na bihain stori long as na dispela samting i kamap.) Namba foa pasin, em yu ken stori long tupela samting ol i narapela narapela kain. (Olsem samting i gutpela na samting i nogut.) Sampela taim tok bai bihainim tupela o tripela bilong ol dispela pasin.

Taim ol i sutim tok giaman long Stiven long ai bilong nambawan kaunsil bilong ol Juda, em i mekim wanpela strongpela tok i stori long ol samting i bin kamap pastaim na ol samting i kamap bihain. Taim yu ritim Aposel 7:​2-53, bai yu lukim olsem ol tok em i kamapim i gat wok bilong en. Pastaim Stiven i kamapim klia olsem em i stori long ol samting i bin kamap long bipo na ol man i no inap tok em i no tru. Na bihain em i stori olsem ol brata bilong Josep i bin givim baksait long Josep, tasol God i bin mekim wok long em bilong kisim bek ol. Bihain moa em i soim olsem ol Juda i bin bikhet long Moses, em man God i mekim wok long en. Long pinis bilong tok em i tokaut olsem ol Juda i bin kilim i dai Jisas Krais, ol i bihainim wankain pasin olsem ol Juda bilong bipo.

No Ken Kamapim Planti Bikpela Tok. Bilong kamapim gut wanpela tim bilong tok, stori long wan wan bikpela samting tasol​—no ken winim faipela, maski yu mekim tok inap 5-pela minit, 10-pela minit, 30 minit, o winim 30 minit. No ken mekim planti bikpela tok i stap ples klia, long wanem, odiens i no inap kisim gut planti samting long wanpela tok. Na taim tok i longpela, yu mas kamapim strong moa na klia moa ol bikpela tok.

Maski tok i gat hamas bikpela tok, yu mas kamapim gut olgeta wan wan. Givim sampela hap taim long ol man bilong skelim ol wan wan bikpela tok bambai ol dispela tok i ken pas gut long tingting bilong ol.

Tok bilong yu i mas kamapim olsem i no hatwok long kisim gut, maski yu gat planti stori bilong kamapim. Sapos yu bungim gut ol tingting yu laik kamapim aninit long wan wan bikpela tok tasol na yu kamapim ol dispela tok wan wan, bai i no hatwok long ol man i kisim na bai ol i no lusim tingting long en.

Mekim Ol Bikpela Tok i Stap Ples Klia. Sapos yu stretim gut ol tok yu laik mekim, bai yu no hatwok long strongim ol bikpela tok taim yu mekim dispela tok.

Nambawan rot bilong mekim ol bikpela tok i stap ples klia em long kamapim ol tok na ol skripsa na ol narapela samting i soim olsem tok yu mekim i tru, na mekim long wanpela rot i kamapim gut ol bikpela tok. Ol narapela tok i mas kamapim klia, o truim, o kamapim gut ol bikpela tok na soim olsem dispela tok i tru. No ken skruim sampela tok i no helpim ol bikpela tok, maski yu laikim. Taim yu kamapim ol narapela tok, soim klia olsem wanem dispela tok i helpim bikpela tok. Nogut odiens yet i mas skelim dispela. Bilong soim olsem wanem ol narapela tok i save helpim bikpela tok, kolim gen ol wan wan tok i kamapim bikpela tok, o sampela taim kamapim insait bilong bikpela tok.

Sampela ol i save putim namba long ol bikpela tok bilong mekim ol i stap ples klia. Tasol dispela pasin i no ken kisim ples bilong makim gut ol tok yu laik mekim na kamapim gut ol dispela tok.

Ating yu laik kolim bikpela tok long kirap bilong tok na bihain kamapim ol tok i helpim dispela tok. Dispela bai helpim odiens long pilim gut olsem ol tok yu kamapim bihain inap helpim ol, na tu dispela bai kamapim strong bikpela tok yu stori long en. Bilong strongim bikpela tok yu kamapim, yu ken kolim gen taim yu stori pinis long en.

Long Autim Tok. Em i stret yumi ken bihainim ol dispela tok taim yumi mekim tok long pletfom na tu taim yumi toktok wantaim ol man long wok autim tok. Taim yu redim tok yu laik kamapim, tingim ol bikpela hevi ol man long hap bilong yu i tingting long en. Makim wanpela tim i givim rot long yu long soim olsem wanem ol tok bilong Baibel i kamapim rot bilong stretim dispela hevi. Kisim tupela bikpela tok bilong kamapim gut tim yu makim. Makim ol skripsa yu bai ritim bilong helpim tupela bikpela tok. Orait nau tingting long olsem wanem yu bai kirapim tok. Taim yu mekim olsem bai yu gat rot long toktok gut wantaim narapela. Na tu em i save helpim yu long kamapim sampela tok man bilong haus bai tingim long bihain.