Stadi 20
Skruim Gut Olgeta Hap Tok
1 Sapos yu stretim gut tok na narapela hap tok i pas gut wantaim narapela hap tok, ol man bai putim yau long tok bilong yu.
2 Ol tok i gat tripela hap bilong en: Kirap bilong en, na namel bilong en, na pinis bilong en. Yu mas skruim gut ol dispela hap tok bambai olgeta tok i pas gut wantaim.
3 Ol liklik tok bilong skruim narapela hap tok wantaim narapela hap tok. “Na tu; olsem na; olsem tasol; orait; tru; na; olsem bai,” em sampela liklik tok bilong skruim narapela hap tok i go long narapela hap tok.
4 Olgeta hap tok yumi mekim i mas stret wantaim. Pinis bilong tok i mas stret wantaim kirap bilong tok. Sapos long kirap bilong tok yu bin mekim wanpela tok piksa, orait taim yu mekim pinis bilong tok yu ken kolim gen dispela tok piksa na kamapim insait bilong en.
5 Taim yu mekim tok yu mas tingim ol man bilong harim—ol i save pinis long ol tok yu laik kamapim o ol i nupela man? Sapos ol i nupela man yu mas wok strong long skruim gut narapela hap tok i go long narapela hap tok bambai ol inap bihainim gut ol tok yu mekim na ol inap save gut long as bilong en.
6 Bilong stretim gut tok, pastaim yu ken kolim ol samting i no bikpela tumas, na bihain kolim ol bikpela samting; o pastaim yu ken stori long ol samting i bin kamap long bipo, na bihain yu ken stori long ol samting i kamap long nau; o pastaim yu ken kolim wanpela hevi, na bihain yu ken kolim ol samting bilong stretim dispela hevi.
7 I gat tupela rot bilong wokim tok: (1) Autim ol tok long ol man, na nau kamapim as bilong dispela tok bambai ol man i ken save yu tok stret. (2) Kolim sampela tok ol man i save bilip long en, tasol em i no stret; na nau kamapim sampela tok moa na bai ol i ken save dispela tok i no stret, na nau ol i ken bilip long gutpela tok.
8 Stretim gut bun bilong tok olsem autlain. Olgeta tok yu kamapim i mas i gat as bilong en. Olsem: Sapos yu wokim haus, yu mas putim as o pos pastaim bambai yu ken sanapim banis bilong en. Olsem tasol taim yu mekim wanpela tok: Yu mas wokim as bilong en pastaim. Na narapela hap tok i mas bihainim gut narapela hap tok.
9 Bilong wokim wanpela autlain yu ken mekim olsem: Sapos yu gat sampela gutpela tingting, raitim long wanpela hap pepa. Sapos yu tingim narapela gutpela tok, raitim long dispela hap pepa. Putim ol gutpela tok i go long dispela pepa. Orait, nau skelim ol dispela tok i stap long pepa: Tok yu mas mekim pastaim, putim i go pas; tok yu mas mekim bihain, putim i go bihain. Na sapos sampela hap tok i no stret wantaim ol narapela hap tok, rausim.
10 Was gut, nogut yu lusim wanpela bikpela tok. Sapos man i wokim haus i go antap inap tupela plua na em i no wokim lata, bai em i no gutpela, a? Sapos wanpela bikpela tok i lus, i olsem haus i no gat lata.