Skruim Gut Narapela Hap Tok i Go Long Narapela

BILONG skruim gut narapela tok i go long narapela, pastaim yu mas i gat wanpela mak yu laik bai tok i winim. Olsem wanem? Yu laik givim sampela save long ol narapela long wanpela bilip, tingting, pasin, o pasin bilong bihainim? Yu laik kamapim klia olsem wanpela tingting i stret o i no stret? Yu laik kirapim ol man long tingim tru wanpela samting o kirapim ol long mekim samting? Maski yu bai toktok long wanpela man o planti man, bilong mekim gut dispela tok yu mas tingim save ol i holim pinis long samting yu laik stori long en na wanem tingting bilong ol long dispela. Taim yu mekim pinis ol dispela samting, orait stretim ol tok yu laik kamapim long wanpela pasin em bai helpim yu long kamapim samting yu laik mekim.

Stori bilong wok autim tok Sol (Pol) i mekim long Damaskus, i stap long Aposel 9:22 i tok “em i tok klia gut tru long ol Juda i stap long Damaskus olsem, ‘Jisas em dispela man God i makim.’ ” Em i kamapim wanem tok i klia gut tru? Olsem stori bilong wok autim tok bilong Pol long Antiok na Tesalonaika i kamapim, pastaim em i stori long bilip bilong ol Juda long Ol Skripsa Hibru na ol i bilipim tok ol dispela skripsa i mekim long Mesaia. Orait bihain em i kisim ol hap tok bilong ol dispela skripsa i stori long i stap na wok autim tok bilong Mesaia. Em i kolim ol dispela tok na em i skelim wantaim ol samting i bin painim Jisas. Orait bihain em i kamapim samting tok bilong em i kamapim long ples klia pinis, olsem Jisas em i Mesaia. (Ap. 13:​16-41; 17:​2, 3) Sapos yu bihainim wankain pasin long autim tok i tru bilong Baibel, dispela inap kirapim ol man long harim tok yu mekim.

Bungim Gut Ol Tok Yu Laik Mekim. I gat kain kain pasin bilong bungim gut ol tok yu laik mekim. Sampela taim ating yu ken yusim tupela pasin wantaim. Orait yumi ken stori long sampela.

Ol tok i stori long wankain samting. Bilong bungim ol tok long dispela pasin, yu mas bungim long wanpela hap ol tok i stori long wankain samting, na mekim olsem long ol narapela hap tok, na olgeta dispela hap i save helpim wok yu laik bai tok bilong yu i mekim. Ating ol dispela wan wan hap em ol bikpela tok na ol man i mas save gut long en bilong kisim gut tok yu kamapim. O ol dispela wan wan hap i kamapim ol tok i makim olsem samting yu stori long en i tru o i no tru. I gat sampela tok i stret long as tok, tasol ating bai yu putim insait long tok o yu rausim dispela hap tok taim yu skelim odiens o yu tingim samting yu laik bai tok bilong yu i mekim.

Nau yumi ken stori long wanpela rot bilong bungim tok olsem. Sapos yu laik kamapim sotpela tok i stori long nem bilong God, yu ken bungim ol tok olsem: (1) Bilong wanem em i bikpela samting long save long nem bilong God, (2) wanem nem bilong God, na (3) olsem wanem yumi ken litimapim dispela nem.

Yumi ken kisim planti save long pasin bilong bungim ol tok i stori long wankain samting taim yumi skelim ol buk “wokboi i gat gutpela tingting” i save kamapim bilong mekim Baibel-stadi wantaim ol man. (Mt. 24:45) Ol dispela buk i save stori long planti samting bilong helpim ol sumatin long kisim ol bikpela tok bilong Baibel. Insait long ol buk samting i bikpela liklik ol i save brukim ol sapta long ol liklik het-tok. Olgeta wan wan het-tok i save redim sumatin long kisim ol tok i kamap bihain na i helpim em long kisim gut ol bikpela tok.

Samting i mekim na samting i kamap. Pasin bilong stori long wanem samting i mekim na wanem samting i kamap long dispela, em tu i gutpela rot long kamapim ol tok.

Dispela kain pasin inap mekim gutpela wok sapos yu toktok wantaim wanpela lain o wan wan man, em ol i mas skelim gut moa wanem samting bai kamap sapos ol i bihainim yet wanpela pasin o ol i tingting long kirap na bihainim wanpela pasin. Sindaun sapta 7 i stap olsem gutpela piksa bilong dispela. Em i stori gut tru long wanpela yangpela man “i no gat gutpela tingting na save” (em samting i mekim) na em i paul wantaim wanpela pamukmeri na taim nogut i painim em (em samting i kamap).​—Snd. 7:7.

Bilong kamapim strong moa tok yu laik mekim, yu ken skelim ol samting nogut i save painim ol man i no bihainim ol lo bilong Jehova wantaim ol gutpela samting i painim ol man i harim tok bilong em. Spirit bilong Jehova i kirapim Moses long mekim kain tok olsem taim em i toktok wantaim lain Israel taim ol i laik go insait long Graun Bilong Promis.​—Lo, sap. 28.

Bilong kirapim tok, sampela taim i gutpela moa long stori long samting i kamap pinis na bihain stori long ol samting i mekim na dispela samting i kamap. Planti taim bai yu kamapim wanpela hevi na bihain stori long samting bilong stretim dispela hevi.

Hevi na rot bilong stretim. Taim yu autim tok na yu stori long wanpela hevi ol man i save tingim na yu kamapim olsem i gat gutpela rot bilong stretim dispela hevi, ating dispela inap kirapim man long putim yau long tok bilong yu. Ating yu yet yu kirap na stori long dispela hevi, o em wanpela hevi man bilong haus i kamapim.

Ating dispela hevi i olsem: Yumi save go lapun na i dai, i gat planti pasin raskol, o planti man i no mekim pasin i stret long ol narapela. Yumi no gat wok long stori planti long kain hevi olsem, long wanem, dispela hevi i stap ples klia. Olsem na yumi ken stori liklik long dispela hevi, na bihain stori long tok Baibel i mekim bilong stretim dispela hevi.

O ating dispela hevi em samting bilong wanpela man tasol, olsem ol traim i painim ol papamama wanpis, bel hevi bilong man i gat bikpela sik, o ol hevi man i karim long wanem narapela i no mekim pasin sori long em. Bilong helpim tru man, yu mas putim gut yau long tok bilong em. Baibel i save kamapim ol gutpela tok long ol dispela kain hevi. Tasol bilong mekim wok long dispela tok yu mas bihainim pasin bilong gutpela tingting. Bilong helpim tru man, ol tok yu mekim i mas stret long samting yu stori long en. Kamapim klia olsem yu stori long samting bilong pinisim dispela hevi, o stretim inap sotpela taim tasol, o yu kamapim sampela tok bilong helpim man long karim wanpela hevi i no inap pinis long dispela taim nogut yumi stap long en. Ol tok bilong Baibel yu kamapim i mas helpim gut ol tok na tingting yu kamapim bilong stretim dispela hevi. Sapos nogat, ating man i no inap ting tok yu mekim bilong stretim dispela hevi em i stret.

Samting i kamap pastaim, samting i kamap bihain. Sampela tok i stret tru long stori long wanem samting i bin kamap pastaim na wanem samting i kamap bihain. Olsem: Taim Buk Kisim Bek i stori long 10-pela hevi, em i stori long wanem hevi i bin kamap pastaim na wanem hevi i kamap bihain. Long Hibru sapta 11, lista em aposel Pol i raitim bilong ol bilipman na bilipmeri i kolim husat i kamap pastaim na husat i kamap bihain.

Sapos yu stori long ol samting i bin kamap long bipo na yu kolim samting i kamap pastaim na samting i kamap bihain, dispela inap helpim ol man long kisim save long olsem wanem ol samting i bin kamap. Dispela i stret long ol samting i kamap pinis long nau na ol samting i bin kamap long taim bilong Baibel. Olsem na ating yu bai bungim pasin bilong stori long wanem samting i kamap pastaim na wanem samting i kamap bihain wantaim pasin bilong stori long wanem samting i mekim na wanem samting i kamap. Sapos yu laik stori long ol samting Baibel i tok bai kamap bihain, orait pasin bilong stori long wanem samting i kamap pastaim na wanem samting i kamap bihain bai isi moa long ol man i ken kisim gut na tingim.

Taim yu laik bihainim dispela pasin, i no olsem yu mas kirap na stori long samting i bin kamap pastaim. Sampela taim i gutpela long kirap stori long wanpela bikpela samting i bin kamap. Olsem: Taim yu kamapim wanpela ekspiriens, ating bai yu laik stori long taim samting i kamap bilong traim wanpela brata, em bai stap gut long God o nogat. Long rot bilong dispela stori yu kirapim laik bilong ol man long harim tok bilong yu. Orait nau yu ken kirap kolim ol samting i bin kamap pastaim na samting i kamap bihain i kam inap long dispela traim i painim em.

Kamapim Ol Tok i Helpim Stori Tasol. Maski yu stretim ol tok yu laik mekim long wanem kain pasin, was gut na kamapim ol tok tasol i helpim stori bilong yu. Ol tok yu laik kamapim i mas stret long tim. Na tu yu mas tingim husat ol man bai harim tok bilong yu. Ating wanpela lain i mas harim wanpela tok yu autim bambai ol i ken kisim save, tasol long narapela lain yu no gat wok long kamapim dispela tok. Na tu, olgeta tok yu laik kamapim i mas helpim wok yu laik bai tok i mekim. Sapos nogat, ating ol man bai laikim tok bilong yu, tasol em i no inap helpim gut ol.

Taim yu wok long painim save, ating bai yu painim planti gutpela tok i stori long samting yu laik stori long en. Yu mas mekim wok long hamas bilong ol dispela tok? Sapos yu kamapim planti tok tumas ol man bai i no inap kisim, na tok bilong yu i no mekim gutpela wok. Sapos yu kamapim wan wan bikpela tok tasol ol man bai holim gut long tingting, winim planti tok yu kamapim hariap tru. Dispela i no makim olsem yu no ken kamapim sampela tok ol man bai laikim tasol i no wanpela bikpela tok, nogat. Tasol no ken larim ol dispela kain tok i haitim as tru na yu mekim tok. Lukim gutpela tingting ol i bihainim taim ol i putim kain tok olsem insait long stori i stap long Baibel long Mak 7:​3, 4 na Jon 4:​1-3, 7-9.

Taim yu stori pinis long wanpela samting na nau yu laik stori long narapela samting, was gut, no ken lusim wanpela tok wantu na kalap kwik long narapela tok na ol man i no save olsem wanem tupela tok i stret wantaim. Bilong ol narapela narapela tingting i ken pas gut wantaim, ating yu mas i gat sampela tok i stap olsem bris bilong bungim tupela kain tingting. Ating yu mas kolim wanpela tok o sentens olgeta bilong soim olsem wanem dispela tupela tingting i stret wantaim. Long sampela tok ples i gat ol liklik tok o hap tok em man i ken kolim bilong soim olsem wanem wanpela nupela tingting i pas wantaim wanpela tingting yu bin kamapim pastaim.

Taim yu kamapim ol tok i helpim stori tasol na skruim gut wanpela hap tok i go long narapela, orait tok bilong yu bai kamapim tru samting yu laik bai em i mekim.