Stadi 26
Pinis Bilong Tok; Minit Bilong Tok
1 Pinis bilong tok i stret long as tok. Sapos yu no laik kolim gen as tok long pinis bilong tok, em orait tu; tasol pinis bilong tok i mas stret long as tok. Pinis bilong tok i mas kirapim ol man long bihainim as tok bilong dispela tok bilong yu.
2 Pinis bilong tok i tokim ol man long ol samting ol i mas mekim. Wok bilong pinis bilong tok em i bilong tokim ol man long ol samting nau ol i mas mekim long dispela save ol i kisim pinis, na bilong kirapim ol long mekim. Taim yu laik pinisim tok, mekim ol sotpela sotpela tok. Tokim ol man bilong wanem i gutpela ol i bihainim ol tok yu bin kamapim na em bai helpim ol olsem wanem. Tok klia na strong na kolim gen ol samting nau ol i mas mekim.
3 Taim yumi autim tok, yumi mas pinisim gut tok. Yumi mas kamapim gut ol tok bambai man i ken save long ol samting em i mas mekim, olsem kisim buk o stadi long Baibel samting.
4 Taim yu mekim tok long Skul na yu laik pinisim tok, no ken rivyu tasol, olsem kolim gen ol bikpela tok yu bin kamapim. Yu mas helpim ol man bambai ol i ken save bilong wanem i gutpela ol i bihainim ol dispela tok; pinis bilong tok i mas kirapim ol long mekim ol dispela samting. Sampela taim yu ken kaunim wanpela ves i kamapim as tok.
5 Longpela bilong pinis bilong tok i stret. Longpela bilong pinis bilong tok i no gat minit bilong en. Sapos ol tok yu mekim bilong pinisim tok i kirapim ol man long bihainim ol tok ol i harim pinis, longpela bilong en i stret. Sampela pinis bilong tok i sotpela na sampela i longpela liklik, tasol sapos pinis bilong tok i mekim gut wok bilong en, longpela bilong en i stret.
6 Buk Saveman i gat sotpela pinis bilong en. (Sav 12:13, 14) Tasol dispela tok Jisas i mekim long Maunten em i gat longpela pinis bilong en. (Mt 7:24-27) Tasol longpela bilong tupela wantaim i stret, long wanem, wanpela wanpela i mekim gut wok bilong en.
7 Taim yu mekim pinis bilong tok yu mas tok klia na tok isi isi na bai ol man i ken pilim i olsem pinis bilong tok. Sapos yu nupela long mekim tok, mekim sotpela tok tasol bilong pinisim tok.
8 Minit bilong tok. No ken pulim tok i go bikpela na kalapim minit bilong tok. Sapos yu wok long tokim ol man long planti planti samting, bai yu kalapim minit bilong tok na ol bai les long harim tok bilong yu. Sapos yu redim planti tok tumas bai yu no inap kamapim gut ol tok. Na sapos yu redim liklik tok tumas na wok long pulim tok i go bikpela, bai yu toktok nabaut long ol narapela narapela samting na bai as tok bilong tok i no kamap gut.
9 Sapos oltaim man i save kalapim minit bilong tok, em i no tingim ol narapela man bilong mekim tok. Sapos ol i bin redim program na i gat planti man bilong mekim tok, olgeta wan wan i mas bihainim stret minit bilong tok bilong em. Sapos long Miting Bilong Wok i gat faipela man bilong mekim tok na olgeta i pulim wanpela wanpela minit, miting bai kalapim minit bilong en na pulim narapela faiv minit moa, na ating taim miting i no pinis yet sampela brata i mas kirap na lusim miting. Na sapos yu sotim tumas tok bilong yu, ating narapela man bilong mekim tok bihain long yu bai i no redi.
10 Yu mas redim gut tok bambai yu no ken kalapim minit bilong en.
11 Sapos wasman bilong Skul i tok, taim i pinis, sumatin i mas lusim laspela tok bilong em na i go sindaun.
12 Taim yu redim autlain, olsem bun bilong tok, makim gut ol bikpela tok, na sapos yu lukim minit bilong tok bilong yu i laik pinis, kamapim tasol ol dispela bikpela tok.
13 Long arere bilong autlain yu ken raitim hamas hamas minit bilong olgeta hap bilong tok, na taim yu wok long autim tok, yu no ken pulim bikpela hap taim tumas. Sapos ol minit i laik pinis, yu mas lusim sampela hap tok. Yu mas skelim gut hamas minit bilong kirap bilong tok na bilong ol narapela hap tok, na bai i gat hap taim moa i stap bilong mekim pinis bilong tok.