Skelim Gut Minit Bilong Tok

WOK tisa bilong yu em i nambawan bikpela samting yu laik tingim, tasol tu yu mas tingim minit bilong ol tok yu mekim. Ol i makim taim stret bilong kirapim na pinisim ol miting bilong yumi. Bilong bihainim dispela taim ol i makim, olgeta i mekim tok long miting i mas wok gut wantaim.

Long taim bilong ol man i bin raitim Baibel, tingting bilong ol man long sindaun bilong ol i narapela kain long tingting bilong planti man long nau. Ol i mekim tok olsem “long 9 klok samting” o “olsem 4 klok long apinun.” (Mt. 20:​3-6; Jo. 1:39) Ol i no tingting planti long ol i mas makim taim stret bilong mekim ol samting bilong olgeta de. Long nau tu long sampela hap, ol man i gat wankain tingting.

Tasol maski pasin bilong ples o laik bilong man yet i mekim na ol i no tingting tumas long bihainim taim, em bai helpim yumi sapos yumi lain long tingim gut pasin bilong bihainim stret taim. Taim ol i makim sampela brata long mekim ol hap bilong wanpela miting, ol i mas tingim hamas minit ol i bin makim bilong mekim ol wan wan hap. Taim yumi tingim minit bilong ol tok ol i makim yumi long mekim, yumi laik bihainim as tingting bilong dispela tok hia: “Yupela i mas bihainim stret ol gutpela pasin bilong lotu.”​—1 Korin 14:40.

Bilong Bihainim Gut Minit Bilong Tok. Namba wan samting, em redim gut tok. Ol man i gat hevi long bihainim gut minit bilong tok em ol man i no save redim gut tok. Ating ol i hambak na ting ol i no gat wok long redim gut. O ol i no redim pastaim, ol i wet i go inap taim bilong mekim tok i kam klostu tru. Bilong mekim tok insait long ol minit ol i makim, yu mas tingim tru asainmen bilong yu na yu mas i gat laik long redim gut.

Olsem wanem? Ol i makim yu long ritim hap bilong Baibel o buk samting? Pastaim, skelim Stadi 4 i go 7, ol i stori long toktok i ron gut, malolo, kolim strong tok, na kamapim strong ol nambawan bikpela tingting. Orait, bihainim dispela tok kaunsel taim yu ritim long maus ol tok ol i makim yu long ritim. Skelim gut, yu mekim tok insait long hamas minit. Olsem wanem? Yu mas rit hariap moa bilong pinisim tok insait long ol minit ol i makim? Ol tok i no bikpela tok tumas yu ken ritim hariap liklik, tasol wok yet long malolo long hap i stret na ritim isi ol bikpela tok yu laik kamapim strong. Mekim traim planti taim. Taim toktok bilong yu i wok long ron gut moa, bai i no hatwok tumas long bihainim stret minit bilong tok.

Bai yu raitim tok bilong yu long pepa? Yu no gat wok long raitim planti tok​—olsem wanpela manuskrip​—bilong mekim tok insait long minit ol i makim. Taim yu mekim Stadi 25, yu bin lainim wanpela pasin i winim dispela. Tingim dispela faipela tok: (1) Redim ol gutpela tok, tasol no ken redim planti tumas. (2) Ol bikpela tingting bilong tok i mas stap gut long tingting bilong yu, tasol no ken holim long tingting olgeta tok yu laik mekim. (3) Makim long autlain hamas minit bilong mekim ol wan wan hap bilong tok o hamas minit i mas go pinis taim yu kamap long ol wan wan hap bilong autlain. (4) Taim yu redim tok, tingim wanem tok yu inap lusim sapos taim i wok long pinis. (5) Mekim traim tok bilong yu planti taim.

Pasin bilong mekim traim em i bikpela samting. Taim yu traim tok bilong yu, lukim hamas minit yu yusim long ol wan wan hap bilong tok. Mekim traim planti taim, inap yu ken pinisim tok bilong yu insait long ol minit ol i makim. No ken stori long planti samting tumas. Redim tok i aninit liklik long ol minit ol i makim yu long mekim, long wanem, taim yu mekim tok long pletfom em i save kisim liklik hap taim moa, winim taim yu mekim long haus.

Makim Minit Bilong Ol Wan Wan Hap. Bilong bihainim stret minit bilong tok, yu mas makim stret hamas minit yu bai tromoi long ol wan wan hap bilong en. Yu mas lusim bikpela hap taim long kamapim namel bilong tok. Dispela hap i gat ol bikpela tok long en. Kirap bilong tok i mas longpela inap long mekim tripela samting Stadi 38 i stori long en. No ken pulim stori bilong namel bilong tok i go longpela tumas na nau yu no gat taim long kamapim wanpela gutpela pinis bilong tok, olsem Stadi 39 i stori long en.

Taim yu wok strong long bihainim stret minit bilong tok, ol tok yu mekim bai kamap gutpela moa na bai yu soim olsem yu tingim ol narapela brata i mas mekim tok na odiens tu.