Askim

◼ Olsem wanem yumi inap mekim ol wan wan miting insait long taim stret?

Taim i save go hariap taim yumi toktok wantaim ol pren bilong yumi long ol gutpela samting. Dispela i mekim na i hatwok liklik long mekim ol miting insait long taim stret ol i makim. Wanem samting inap helpim yumi long mekim ol miting insait long taim stret?

Kirap long taim stret. Taim kongrigesen olgeta i bung, ating wanpela o tupela minit paslain long miting i kirap, i gutpela long singautim olgeta long sindaun na bai miting i ken kirap long taim stret. (Sav. 3:⁠1) Long ol miting we i gat liklik grup tasol i bung, kain olsem ol bung bilong autim tok, no ken surikim taim bilong kirapim bung na wet long ol brata sista i kam leit.

Redi gut. Wanpela rot bilong mekim miting long taim stret em long redi gut pastaim. Tingim gut as bilong tok yu bai mekim. Luksave long ol bikpela tok, na kamapim klia ol dispela samting. Abrusim pasin bilong kolim ol tok i no bikpela samting tumas. Kamapim ol tok i no hatwok long man i kisim. Sapos tok bilong yu i gat ol soim o inteviu, orait mekim traim sampela de paslain long miting. Taim yu mekim traim tok bilong yu, skelim minit bilong tok.

Brukim tok bilong yu. Maski asainmen bilong yu i bilong mekim wanpela tok o toktok wantaim ol brata sista na kamapim askim, i gutpela yu brukim tok bilong yu i go long wan wan hap. Skelim hamas minit yu bai lusim long wan wan hap bilong tok, na raitim dispela long pepa bilong yu. Taim yu mekim tok, yu mas was gut long taim bilong yu. Taim yu lukautim hap we yu bai toktok wantaim ol brata sista na kamapim ol askim, no ken toktok long planti samting tumas long kirap bilong tok, nogut yu no gat taim bilong kamapim gut ol bikpela tok i kamap bihain. Ol brata i lukautim Stadi Wastaua i mas skelim gut taim na bai i gat taim bilong skelim blok bilong riviu long pinis bilong stadi. Na tu, ol i mas was gut na bai ol i no ken yusim hap taim bilong mekim singsing na beten.

Pinis long taim stret. Sapos miting i gat narapela narapela hap bilong en, kain olsem Miting Bilong Wok, olgeta wan wan brata i mekim tok i mas tingim wanem taim stret tok bilong em i mas kirap na pinis. Olsem wanem sapos i luk olsem miting bai go ovataim? Wanpela o sampela bilong ol brata i mekim ol narapela hap bilong miting, ol i ken kamapim tasol ol bikpela poin long tok bilong ol na abrusim ol tok i no bikpela samting. Taim wanpela brata i mekim olsem, dispela i kamapim klia olsem em i wanpela gutpela tisa.

Yumi ol brata sista i harim tok inap helpim brata i mekim tok long rot bilong kamapim ol sotpela bekim i stret long askim. Olsem na yumi olgeta inap mekim ol samting na bai ol miting i “bihainim stret ol gutpela pasin bilong lotu.”​—⁠1 Ko. 14:40.