Wanpela Naispela Gaden

LUKIM graun long dispela piksa! Olgeta samting i luk nais tru! Lukim gras na ol diwai, ol plaua na ol animal. Yu inap makim elefan na ol laion?

Dispela naispela gaden i kamap olsem wanem? Orait, yumi ken stori long olsem wanem God i bin redim graun na bai yumi inap i stap long en.

Pastaim, God i wokim gras bilong karamapim graun. Na em i wokim kain kain plaua na diwai. Ol dispela samting i bilasim graun. Tasol i gat narapela wok tu ol i mekim. Planti bilong ol i givim yumi gutpela kaikai i swit tru.

Bihain God i wokim ol pis bilong swim insait long wara, na ol pisin bilong flai antap long skai. Em i wokim ol dok na pusi na hos; ol bikpela animal na ol liklik animal. Wanem ol animal i stap long hap bilong yu? Yumi mas amamas long God i bin wokim olgeta dispela samting bilong yumi, a?

Bihain tru, God i mekim wanpela hap bilong graun i kamap olsem wanpela naispela ples tru. Em i kolim dispela ples olsem gaden Iden. Em i gutpela olgeta. Olgeta samting long en i nais tru. Na God i laik bai olgeta hap bilong graun i kamap olsem dispela naispela gaden em i bin wokim.

Tasol lukluk gen long piksa bilong dispela gaden. God i lukim olsem dispela ples i sot long wanpela samting. Yu save em wanem samting? Orait, nau yumi ken lukim.