Hevi i Painim Daina

DAINA i go lukim husat? Em i go lukim sampela yangpela meri bilong Kenan. Yu ting papa bilong em Jekop bai amamas long dispela? Bilong helpim yumi long bekim dispela askim, tingim olsem Abraham na Aisak i gat wanem tingting long ol meri Kenan.

Olsem wanem? Abraham i laik bai pikinini man bilong em Aisak i maritim wanpela meri Kenan? Nogat. Na Aisak na Rebeka i laik bai pikinini man bilong ol, em Jekop, i maritim wanpela meri Kenan? Nogat. Yu save bilong wanem ol i no laik bai pikinini bilong ol i maritim ol meri Kenan?

Em i olsem, long wanem, ol Kenan i save lotuim ol god giaman. Ol i no gutpela manmeri bilong maritim, na ol i no gutpela manmeri bilong i stap pren wantaim ol. Olsem na yumi ken save olsem bai Jekop tu i no amamas sapos em i harim olsem pikinini meri bilong em i poromanim ol dispela meri Kenan.

Na tru tumas, hevi i painim Daina. Yu lukim dispela man Kenan i lukluk i stap long Daina? Nem bilong em Sekem. Wanpela taim Daina i go lukim ol dispela meri na Sekem i holim em na fosim em long slip wantaim em. Dispela pasin i no stret, long wanem, ol man na meri marit tasol i ken slip wantaim. Dispela pasin nogut Sekem i mekim long Daina i kirapim bikpela hevi.

Taim ol brata bilong Daina i harim tok long Sekem i mekim rong long Daina, ol i kros nogut tru. Tupela bilong ol, em Simeon na Livai, ol i kros nogut tru na ol i kisim bainat bilong ol na i go insait long taun. Ol i kilim i dai Sekem na olgeta arapela man bilong dispela taun. Jekop i kros long dispela pasin nogut ol pikinini man bilong em i mekim.

Olgeta dispela hevi i bin kirap olsem wanem? Ol i kamap, long wanem, Daina i poromanim ol manmeri i no save bihainim lo bilong God. Yumi no laik mekim olsem, a?