Yu Inap i Stap Gut Insait Long Lain Bilong God
“Bai mi tenkyu long yu namel long planti lain manmeri i bung wantaim.” —SNG. 35:18.
1-3. (a) Wanem samting inap bagarapim bilip bilong ol Kristen? (b) Lain bilong God inap i stap gut long wanem hap?
JOE na meri bilong em ol i holide, na ol i glas long solwara we rip i pulap long ol pis i gat kain kain kala na sais. Ol i swim i go moa bilong lukim gut rip i stap insait long wara. Taim ol i swim i go long hap we solwara i go daun tru, meri bilong Joe i tok, “Ating yumi go longwe tumas.” Joe i tok: “No ken wari, bai yumi orait.” Bihain liklik Joe i tingting, ‘Ol pis i go we?’ Em i kirap nogut na luksave long as bilong dispela samting. Long hap we solwara i daun tru, wanpela sak i swim i kam stret long em. Joe i no inap mekim wanpela samting. Taim sak i stap inap wan mita samting longwe long Joe, sak i tanim na swim i go long narapela hap.
2 Wanpela Kristen inap kirap long laikim ol samting bilong graun bilong Satan—ol amamas, wok mani, mani kago—na em i no luksave olsem hevi inap painim em. Joe em wanpela elda Kristen, na em i tok: “Samting i bin painim mi long solwara i kirapim mi long tingting long wanem kain man yumi save poroman wantaim. Yumi mas i stap long hap we yumi inap i stap gut na amamas—insait long kongrigesen!” Yu no ken swim i go longwe, olsem i go longwe long kongrigesen na nau hevi bai painim yu. Sapos yu stap longwe long kongrigesen, orait wantu yu mas kam bek. Sapos yu no mekim olsem, yu inap kisim bagarap long ol samting bilong spirit.
3 Long nau, pasin bilong dispela graun inap bagarapim bilip bilong ol Kristen. (2 Ti. 3:1-5) Satan i save em i gat sotpela taim tasol bilong i stap, na em i laik bagarapim ol lain i no was i stap. (1 Pi. 5:8; KTH 12:12, 17) Tasol yumi gat samting bilong lukautim yumi. Jehova i bin givim lain bilong em wanpela ples we ol inap i stap gut long ol samting bilong spirit—em kongrigesen Kristen.
4, 5. Planti man i ting olsem wanem long samting bai painim ol long bihain? Bilong wanem i olsem?
4 Ol man bilong dispela graun inap mekim sampela samting tasol bilong helpim yumi long stap gut long skin o long bel. Pasin raskol, pasin bilong pait na bagarapim man, bikpela pe bilong ol samting, na pasin bilong bagarapim graun na wara, ol dispela samting i mekim na planti man i pilim olsem ol i no inap sindaun gut. Ol hevi bilong lapun na sik i save painim yumi olgeta. Na ol lain husat i gat wok, haus, mani, na i no save sik tumas, ating ol i tingting long wanem taim ol dispela gutpela samting bilong ol bai pinis.
5 Na tu, bel na tingting bilong planti manmeri i no stap gut. Sori tru, planti husat i bin ting ol bai stap bel isi na amamas taim ol i marit na kamapim famili, ol i lukim olsem dispela samting i no kamap. Long ol samting bilong spirit, planti lain husat i save go long lotu, ol i paul na ol i gat tupela tingting long tok ol lotu i mekim bilong stiaim ol. Ol i tingting planti moa yet taim ol i tingim pasin nogut bilong ol bikman bilong lotu na ol tok bilong ol em Baibel i no as bilong en. Olsem na planti man i ting ol i no gat narapela rot, ol i ting ol i mas bilip tasol long saiens o long gutpela pasin na tingting bilong ol man. Yumi no kirap nogut long ol man i pret o ol i no laik tingting tumas long ol samting bai painim ol long bihain.
6, 7. (a) Wanem samting i mekim na tingting bilong ol man i lotuim God i narapela kain long tingting bilong ol man i no lotuim em? (b) Bai yumi skelim wanem samting?
6 Tingting bilong ol lain insait long kongrigesen Kristen i narapela kain tru long tingting bilong ol lain i no insait long kongrigesen! Yumi ol lain bilong Jehova i save karim ol wankain hevi olsem ol narapela man, tasol tingting bilong yumi long ol dispela hevi i narapela kain. (Ritim Aisaia 65:13, 14; Malakai 3:18.) Bilong wanem i olsem? Long wanem, yumi save long tok Baibel i mekim long as na ol hevi i painim ol manmeri, na yumi save long pasin bilong karim ol hevi na hatwok bilong laip. Dispela i mekim na yumi no tingting planti tumas long taim bihain. Yumi lotuim Jehova na dispela i banisim yumi long ol tok i no stret na ol tok em Baibel i no as bilong en, na long pasin pamuk, na ol samting nogut ol dispela samting i save kamapim. Olsem na ol lain insait long kongrigesen Kristen i save kisim kain bel isi ol narapela i no save long en.—Ais. 48:17, 18; Fl. 4:6, 7.
7 Stori bilong sampela inap helpim yumi long tingim i stap bilong ol lain i lotuim Jehova na skelim dispela wantaim i stap bilong ol man i no lotuim em. Ol dispela stori inap kirapim yumi long skelim tingting na pasin bilong yumi yet, na long skelim sapos yumi mas bihainim moa yet tok bilong God, em dispela tok i bilong lukautim yumi.—Ais. 30:21.
“Klostu Mi Laik Pundaun”
8. Kirap long bipo yet na i kam, ol wokboi bilong Jehova i mas abrusim wanem pasin?
8 Kirap long bipo yet na i kam, ol lain husat i laik lotuim Jehova na bihainim tok bilong em, ol i no laik poroman wantaim ol man i no lotuim Jehova. Tru tumas, Jehova i bin tok olsem bai i gat pasin birua i stap namel long ol lain i lotuim em na ol lain i bihainim Satan. (Stt. 3:15) Lain bilong God i strong long bihainim ol stiatok bilong God, olsem na pasin bilong ol i narapela kain long pasin bilong ol man bilong graun. (Jo. 17:15, 16; 1 Jo. 2:15-17) Sampela taim i hatwok long bihainim ol stiatok bilong God, olsem na sampela wokboi bilong Jehova i gat tupela tingting olsem em i savetingting long daunim laik bilong ol yet o nogat.
9. Stori long samting em man bilong raitim Song 73 i tingting planti long en.
9 Wanpela wokboi bilong Jehova husat i bin tingting planti long em i bin mekim gutpela disisen o nogat, em man bilong raitim Song 73, ating em wanpela tumbuna pikinini bilong Asap. Dispela man bilong raitim song i askim olsem, bilong wanem planti taim i luk olsem ol man nogut i stap gut, amamas, na ol i gat planti samting, na ol man i lotu long God, ol i karim ol hevi?—Ritim Song 73:1-13.
10. Bilong wanem ol tok em man bilong raitim song i kamapim i bikpela samting long yu?
10 Olsem wanem? Sampela taim yu bin mekim ol kain askim olsem man bilong raitim song i bin mekim? Sapos yu bin mekim, i no gat as na maus bilong bel i mas kotim yu na yu mas ting olsem yu wok long lusim bilip. Nogat. Planti wokboi bilong Jehova, na sampela wokboi em Jehova i bin yusim bilong raitim Baibel, ol tu i bin i gat ol kain tingting olsem. (Jop 21:7-13; Sng. 37:1; Jer. 12:1; Hab. 1:1-4, 13) Tru tumas, olgeta husat i laik lotuim Jehova, ol i mas kliagut na wanbel long bekim bilong dispela askim: Olsem wanem? Pasin bilong lotuim God na bihainim tok bilong em i nambawan gutpela samting bilong mekim? Tok Satan i bin sutim long Jehova long gaden Iden i insait long dispela samting. Em i bikpela samting long dispela tok i bin kamap long husat i stap nambawan bos. (Stt. 3:4, 5) Olsem na i stret yumi olgeta i tingim dispela tok em man bilong raitim song i bin kamapim. Olsem wanem? Yumi jeles long ol man nogut we i luk olsem ol i no gat hevi? I gutpela yumi “lusim” Jehova na kirap bihainim pasin bilong ol? Dispela em i samting Satan i laik bai yumi mekim.
11, 12. (a) Wanem samting i helpim man bilong raitim song long kisim stretpela tingting? (b) Wanem samting i bin helpim yu long kisim wankain tingting olsem man bilong raitim song?
11 Wanem samting i helpim man bilong raitim song long kisim stretpela tingting? Em i tok klostu em i lusim stretpela pasin, tasol tingting bilong em i senis taim em i go insait ‘long haus bilong God’—olsem bung wantaim ol lain i strong long ol samting bilong spirit na i stap insait long haus lotu sel bilong God o tempel, na taim em i tingim tingim ol samting God i tingting pinis long mekim. Long dispela taim, i klia tru long man bilong raitim song olsem em i no laik bai wankain samting i painim em olsem i save painim ol man nogut. Em inap luksave olsem ol rot ol i makim na ol pasin ol i bihainim i mekim na ol i “wokabaut long rot i wel moa yet.” Man bilong raitim song i lukim olsem olgeta man husat i lusim Jehova, bihain ol bai “bagarap kwiktaim tumas,” tasol Jehova bai helpim ol lain i lotuim em. (Ritim Song 73:16-19, 27, 28.) Ating yu tu i bin lukim olsem dispela tok em i tru. Planti man inap ting olsem pasin bilong inapim laik bilong ol yet na maski long bihainim lo bilong God, dispela em i gutpela. Tasol ol i no inap abrusim ol samting nogut dispela kain pasin bai kamapim.—Ga. 6:7-9.
12 Stori bilong man bilong raitim song i lainim yumi long wanem narapela samting? Taim em i stap insait long lain bilong God, em i stap gut na em i kisim savetingting. Em i kirap long wokim gut tingting na skelim ol samting taim em i go long ples we ol man i lotuim Jehova. Na olsem tasol long nau, long ol miting bilong kongrigesen, yumi inap bungim ol man i gat savetingting na kisim gutpela kaikai bilong spirit. Olsem na i gat as tru na Jehova i tokim ol wokboi bilong em long i go long ol miting Kristen. Ol miting bai strongim bel bilong ol na kirapim ol long bihainim savetingting.—Ais. 32:1, 2; Hi. 10:24, 25.
Makim Gut Ol Poroman
13-15. (a) Wanem samting i painim Daina? Dispela i kamapim klia wanem samting? (b) Bilong wanem pasin bilong poromanim ol wanbilip Kristen bai lukautim yumi?
13 Stori bilong Daina, pikinini meri bilong Jekop, i kamapim klia olsem ol bikpela hevi i save kamap taim wanpela i pren wantaim ol ausaitman. Buk Stat i stori olsem em i gat pasin bilong bung wantaim ol yangpela meri Kenan i stap long hap we famili bilong em i sindaun long en. Ol Kenan i no gat ol wankain lo long stretpela pasin olsem lain bilong Jehova. Nogat. Ol samting ol saveman i bin painim i kamapim klia olsem pasin bilong ol Kenan i mekim na kantri bilong ol i pulap long pasin bilong lotuim god giaman, pasin pamuk, pasin sem nogut bilong lotuim ol god giaman, na pasin bilong pait na bagarapim man. (Kis. 23:23; Wkp. 18:2-25; Lo 18:9-12) Tingim ol samting i bin kamap taim Daina i bung wantaim ol Kenan.
14 Sekem, wanpela man Kenan, em ol i tok em i ‘nambawan tru long ai bilong lain bilong papa,’ em i lukim Daina “na em i pulim em na mekim pasin nogut long em.” (Stt. 34:1, 2, 19) Dispela samting i nogut tru! Yu ting Daina i bin ting kain samting olsem inap painim em? Ating em i laik prenim tasol ol yangpela bilong dispela hap, na em i ting ol i gutpela lain. Tasol bel bilong em i giamanim em.
15 Dispela stori i skulim yumi long wanem samting? Yumi no inap poromanim ol lain i no wanbilip na ting dispela i no inap kamapim ol hevi. Baibel i tok, “sapos yumi poroman wantaim ol man nogut, bai ol i bagarapim gutpela pasin bilong yumi.” (1 Ko. 15:33) Tasol taim yu poroman wantaim ol lain i gat wankain bilip olsem yu, na wankain ol lo bilong stretpela pasin, na pasin bilong laikim tru Jehova, orait dispela bai lukautim yu. Ol kain gutpela poroman bai strongim yu long bihainim gutpela tingting.—Snd. 13:20.
“God i Wasim Yupela Pinis”
16. Aposel Pol i stori olsem wanem long sampela long kongrigesen Korin?
16 Kongrigesen Kristen i bin helpim planti man na meri long lusim ol pasin i no klin. Taim aposel Pol i raitim namba wan pas bilong em long kongrigesen long Korin, em i stori long ol senis ol Kristen long dispela hap i bin mekim bilong bihainim ol lo bilong God. Bipo sampela bilong ol i bin mekim pasin pamuk, pasin adaltri, lotuim god giaman, man i slip wantaim man, stil, spak, na ol kain pasin olsem. Tasol Pol i tokim ol: “God i wasim yupela pinis.”—Ritim 1 Korin 6:9-11.
17. Olsem wanem pasin bilong bihainim ol lo bilong Baibel i bin senisim laip bilong planti?
17 Ol manmeri husat i no gat bilip, ol i no gat ol gutpela stiatok bilong stiaim ol. Ol yet i makim rot ol i laik bihainim, o ol i bihainim nating pasin nogut ol narapela i save mekim, olsem sampela bilong Korin bilong bipo i bin mekim paslain long ol i kamap bilipman. (Ef. 4:14) Tasol stretpela save long Tok Bilong God na ol samting God i tingting pinis long mekim, i gat strong long senisim laip bilong ol man husat i bilip na bihainim tok bilong Baibel. (Kl. 3:5-10; Hi. 4:12) Planti bratasista long kongrigesen Kristen long nau, ol inap stori long yu olsem paslain long ol i bin kisim save long ol lo bilong Jehova long stretpela pasin na ol i kirap bihainim, ol i bin bihainim ol laik bilong skin. Tasol ol i no bin stap belgut na amamas. Taim ol i kirap bung wantaim lain bilong God na bihainim ol stiatok bilong Baibel, long dispela taim ol i stap bel isi.
18. Wanem samting i bin painim wanpela yangpela? Dispela i kamapim klia wanem samting?
18 Tasol sampela husat i bin lusim kongrigesen Kristen, ol i bel hevi tru long ol i bin mekim olsem. Wanpela sista, em yumi ken kolim Tanya, i tok olsem em i “kamap bikpela insait long tok i tru,” tasol taim em i gat 16 krismas, em i lusim kongrigesen bilong “painim ol amamas bilong dispela graun.” Ol samting nogut i painim em, olsem em i kisim bel nating na em i rausim bel. Nau em i tok: “Dispela tripela yia mi bin stap longwe long kongrigesen dispela i bagarapim tru bel bilong mi. Wanpela samting mi no inap tru long lusim tingting long en, em mi bin kilim i dai pikinini bilong mi i stap long bel. . . . Olgeta yangpela husat i gat laik long insait long ol amamas bilong dispela graun, maski em bilong liklik taim tasol, mi laik tokim ol olsem: ‘No ken mekim!’ Ating pastaim yupela bai kisim amamas, tasol bihain ol samting nogut tasol bai painim ypela. Ol samting bilong dispela graun i save givim ol hevi tasol. Mi save tru long dispela. Mi bin insait long en. Stap insait long oganaisesen bilong Jehova! Em tasol i rot bilong stap amamas.”
19, 20. Kongrigesen Kristen inap lukautim yumi long wanem samting? Olsem wanem em i lukautim yumi?
19 Tingim wanem samting bai painim yu sapos yu lusim kongrigesen Kristen we yu inap i stap gut. Planti husat i tingim laip bilong ol paslain long ol i kisim tok i tru, ol i no laik tru long lusim kongrigesen. (Jo. 6:68, 69) Yu inap wok yet long i stap gut na abrusim ol hevi em graun bilong Satan i save kamapim, taim yu pas gut wantaim ol brata na sista Kristen. Pasin bilong bung wantaim ol na go oltaim long ol miting bilong kongrigesen, bai helpim yu oltaim long tingim olsem ol lo bilong Jehova long stretpela pasin i nambawan tru na i strongim yu long bihainim ol dispela lo. I gat as tru na yu mas ‘litimapim nem bilong God namel long bikpela lain manmeri,’ olsem man bilong raitim song i bin mekim.—Sng. 35:18.
20 Tru, i gat narapela narapela as na sampela taim olgeta Kristen i bungim taim we i hatwok long ol i stap gut long God. Ating ol i nidim wanpela long soim ol long stretpela rot bilong bihainim. Yu na kongrigesen olgeta inap mekim wanem bilong helpim ol dispela wanbilip long kain taim olsem? Stadi i kamap bihain long dispela bai skelim olsem wanem yu inap wok yet long “givim gutpela tok long ol arapela manmeri bilong God na strongim bel bilong ol.”—1 Te. 5:11.
Bai Yu Bekim Olsem Wanem?
• Ol samting i painim man bilong raitim Song 73 i skulim yumi long wanem samting?
• Stori bilong Daina i skulim yumi long wanem samting?
• Bilong wanem yu inap i stap gut insait long kongrigesen Kristen?
[Ol Piksa long pes 7]
Swim long hap we hevi i no inap painim yu; stap insait long kongrigesen!