Haus Sel Bilong Mekim Lotu

YU SAVE dispela haus i bilong mekim wanem? Em i wanpela haus sel bilong lotuim Jehova long en. Ol i kolim tu olsem haus lotu sel. Ol manmeri i bin pinisim dispela haus sel inap wanpela yia bihain long ol i lusim Isip. Yu save husat i bin tokim ol long wokim?

Jehova i tokim ol. Taim Moses i stap antap long maunten Sainai, Jehova i tokim em long pasin bilong wokim dispela haus lotu sel. Em i tok, ol i mas wokim bambai ol inap sanapim o brukim kwiktaim. Long dispela rot ol inap karim ol hap bilong en i go long narapela ples na sanapim gen. Olsem na taim ol Israel i wokabaut long ples drai nating, ol i karim haus lotu sel i go wantaim ol.

Sapos yu lukluk insait long liklik rum long arere bilong haus sel, yu inap lukim wanpela bokis. Dispela em i bokis kontrak. I gat tupela ensel ol i bin wokim long gol i stap antap long en. God i raitim gen Tenpela Lo long tupela hap ston, long wanem, Moses i bin brukim tupela hap ston em i bin givim long em pastaim. Ol i putim dispela tupela hap ston i go insait long bokis kontrak. Na tu, ol i putim wanpela sospen i gat mana long en. Yu inap tingim, mana em wanem samting?

Aron, em brata bilong Moses, em man Jehova i makim bilong kamap hetpris. Em i stap olsem gopas bilong ol manmeri long lotuim Jehova. Ol pikinini man bilong em tu ol i mekim wok pris.

Orait, nau lukluk long bikpela rum bilong dispela haus sel. Em i bikpela moa long liklik rum, olsem dabol. Yu lukim wanpela liklik bokis, em smok i kamap long en? Dispela em i alta ol pris i save kukim sanda long en, em wanpela samting i gat gutpela smel. Na i gat wanpela lam i stap, em i gat 7-pela han. Na namba tri samting long dispela rum em wanpela tebol. Antap long en i gat 12-pela bret.

Insait long banis bilong haus lotu sel i gat wanpela bikpela dis i pulap long wara. Ol pris i save yusim wara bilong waswas. Na tu, i gat bikpela alta i stap. Ol i save kilim ol animal na kukim long dispela alta olsem ofa long Jehova. Ol i sanapim haus lotu sel namel stret long ol haus sel bilong ol Israel.