Jehova i Invaitim Yumi Long Stap Olsem Ol Gest Bilong Em

1-2. Jehova i givim wanem invatesen long ol gutpela wokman bilong em?

YU GAT wanem tingting long Jehova? Ating yu bai tok, ‘Jehova em Papa bilong mi, em God bilong mi, na em Pren bilong mi.’ Na tu, i gat ol narapela biknem em yu inap kolim long Jehova. Tasol olsem wanem? Yu bin tingim yu yet tu olsem wanpela gest bilong em?

² King Devit i stori olsem pasin pren i stap namel long Jehova na ol wokman bilong Em, dispela i wankain long pasin pren i stap namel long wanpela papa bilong haus na ol gest bilong em. Devit i askim olsem: “Jehova, husat inap i stap long haus sel bilong yu? Na husat inap i stap long maunten holi bilong yu?” (Sng. 15:1) Long ol dispela tok, yumi lainim olsem yumi ken stap olsem ol gest bilong Jehova, em ol pren bilong em. Dispela em naispela invatesen i kam long Jehova, a?

JEHOVA I LAIK YUMI STAP OL GEST BILONG EM

3. Husat em i fes gest bilong Jehova, na Jehova na gest bilong em i pilim olsem wanem long narapela narapela?

³ Paslain long Jehova i wokim olgeta samting, em wanpela tasol i bin stap. Tasol bihain, em i wokim fesbon Pikinini bilong em. Jehova i stap olsem Papa bilong haus na em i invaitim fes gest bilong em i kam insait long haus sel bilong em, na em i amamas tru long mekim olsem. Baibel i kamapim klia olsem Jehova i bin “amamas” long Pikinini bilong em. Dispela i mekim na long “olgeta taim [Jisas i] amamas long ai” bilong Jehova.—Prov. 8:30.

4. Bihain Jehova i invaitim husat moa long stap olsem ol gest long haus sel bilong em?

⁴ Bihain, Jehova i wokim ol narapela ensel na em i invaitim ol tu long stap olsem ol gest bilong em. Baibel i kolim ol ensel bilong em olsem ol “pikinini man bilong God” na ol i amamas long stap wantaim Jehova. (Jop 38:7; Dan. 7:10) Inap planti yia, ol ensel tasol i stap olsem ol gest bilong God, em ol i stap long heven wantaim em. Bihain em i wokim ol manmeri na ol tu inap stap olsem ol gest bilong em. Sampela bilong ol em Enok, Noa, Abraham, na Jop. Baibel i stori olsem ol dispela bilipman ol i pren bilong God, o ol man em ol i bin wokabaut “wantaim God tru.”—Stt. 5:24; 6:9; Jop 29:4; Ais. 41:8.

5. Yumi lainim wanem samting long tok profet i stap long Esekiel 37:​26, 27?

⁵ Inap planti handret yia, Jehova i wok yet long invaitim ol pren bilong em long stap olsem ol gest bilong em. (Ritim Esekiel 37:​26, 27.) Olsem, long tok profet bilong Esekiel, yumi lainim olsem Jehova i laik tru olsem ol gutpela wokman bilong em i pas gut wantaim em. Em i tok promis long mekim “wanpela kontrak bilong bel isi wantaim ol.” Dispela tok profet i makim wanpela taim bai kamap we ol Kristen em ol i bilip na wet long kisim laip long heven na ol Kristen em ol i bilip na wet long kisim laip long graun, ol bai stap wanbel wantaim long haus sel bilong Jehova olsem “wanpela lain sipsip.” (Jon 10:16) Dispela samting i kamap tru long nau!

GOD I TINGIM YUMI MASKI YUMI STAP LONG WANEM HAP

6. (a) Olsem wanem wanpela inap stap olsem gest long haus sel bilong Jehova? (b) Haus sel bilong Jehova i stap long wanem hap?

⁶ Long taim bilong ol man i raitim Baibel, haus sel bilong wanpela man i stap olsem ples we ol man i ken malolo long en na stap seif long win na ren samting. Wanpela gest long dispela haus sel, em i ken save tru olsem papa bilong haus sel bai lukautim em gut. Taim yumi dediketim laip bilong yumi long Jehova, yumi stap olsem ol gest long haus sel bilong em. (Sng. 61:4) Yumi amamas long ol tok bilong strongim bilip yumi save kisim na long stap pren bilong ol narapela em ol tu i stap olsem ol gest bilong Jehova. Haus sel bilong em i no stap long wanpela hap tasol, nogat. Ating yu bin raun i go long wanpela narapela kantri bilong i go long wanpela spesel kibung, na yu bungim ol narapela em ol i amamas long stap insait long haus sel bilong God. Haus sel bilong God i stap long olgeta hap em ol wokman bilong em i stap long en.—Rev. 21:3.

7. Wai na yumi ken tok olsem ol bilip lain em ol i dai pinis, ol i stap yet olsem ol gest long haus sel bilong Jehova? (Lukim tu piksa.)

⁷ Olsem wanem long ol bilip lain em ol i dai pinis? Yu ting i stret long yumi tok olsem ol i stap yet olsem ol gest long haus sel bilong Jehova? Yes! Wai na yumi ken tok olsem? Long tingting bilong Jehova, ol dispela lain i stap laip. Jisas i tok: “Moses yet i kamapim olsem ol man i dai pinis ol bai kirap bek. Long stori bilong liklik nil diwai, em i tok olsem Jehova em i ‘God bilong Abraham na God bilong Aisak na God bilong Jekop.’ Em i no God bilong ol man i dai pinis, nogat, em i God bilong ol man i stap laip, long wanem, long tingting bilong em olgeta i stap laip.”—Luk 20:​37, 38.

YUMI KISIM OL HELPIM NA YUMI GAT OL WOK LONG MEKIM

8. Ol gest bilong Jehova i kisim wanem helpim long stap long haus sel bilong em?

⁸ Wankain olsem wanpela haus sel tru tru inap stap olsem ples bilong malolo na lukautim man long win na ren samting, haus sel bilong Jehova i save lukautim ol gest bilong em long ol samting inap bagarapim bilip bilong ol na helpim ol long bilip na wet long gutpela samting i kamap bihain. Taim yumi pas gut yet wantaim Jehova, Satan i no inap mekim wanpela samting we inap bagarapim yumi inap oltaim oltaim. (Sng. 31:23; 1 Jon 3:8) Long nupela taim, Jehova bai wok yet long lukautim ol gutpela pren bilong em long ol samting inap bagarapim bilip bilong ol, na tu, long dai.—Rev. 21:4.

9. Jehova i laik bai ol gest bilong em i mekim wanem?

⁹ Tru tumas, em gutpela blesing tru long stap olsem gest long haus sel bilong Jehova, yumi ken pas gut wantaim em inap oltaim oltaim. Yumi mas mekim wanem sapos yumi laik stap yet olsem ol gest bilong em? Sapos wanpela i invaitim yu long i go long haus bilong em, ating yu bai laik save long wanem ol samting em i laik bai yu mekim. Olsem, ating em i laik yu rausim su bilong yu paslain long yu go insait long haus bilong em, na yu bai mekim olsem. Olsem tasol, yumi laik save long ol samting em Jehova i laik bai ol gest bilong em i ken mekim bilong stap yet long haus sel bilong em. Yumi laikim Jehova, na dispela i kirapim yumi long mekim olgeta samting yumi inap mekim bilong “amamasim em.” (Kol. 1:10) Yumi tingim Jehova olsem Pren bilong yumi, tasol yumi luksave tu olsem em i God na Papa bilong yumi, na i stret long yumi rispektim em. (Sng. 25:14) Oltaim yumi mas tingim dispela na soim bikpela rispek tru long em. Taim yumi rispek tru long em, dispela bai helpim yumi long sakim ol pasin em i no orait long en. Tru tumas, yumi laik “mekim pasin daun taim [yumi] wokabaut” wantaim God bilong yumi.—Mai. 6:8.

JEHOVA I MEKIM WANKAIN PASIN LONG OL ISRAEL

10-11. Olsem wanem Jehova i mekim wankain pasin long ol Israel long ples drai nating bilong Sainai?

¹⁰ Jehova i save mekim wankain pasin long ol gest bilong em. (Rom 2:11) Yumi ken kisim save long hau Jehova i save mekim wankain pasin long olgeta man taim yumi skelim pasin em i mekim long ol Israel long ples drai nating bilong Sainai.

¹¹ Bihain long Jehova i kisim bek lain bilong em long wok sleiv long Isip, em i makim ol pris long mekim wok long haus lotu sel. Em i makim ol Livai long mekim ol narapela wok long dispela haus lotu sel. Yu ting Jehova i lukautim gut ol lain i mekim wok long haus lotu sel o ol lain i stap klostu long en winim ol narapela? Nogat! Jehova i save mekim wankain pasin long olgeta man.

12. Wanem samting i helpim yumi long luksave olsem Jehova i mekim wankain pasin long ol Israel? (Kisim Bek 40:38) (Lukim tu piksa.)

¹² Olgeta lain long kem bilong Israel i gat rot long pas gut wantaim Jehova, maski ol i mekim wanem wok o ol i stap klostu o longwe long haus lotu sel. Olsem, Jehova i opim rot na bai lain Israel olgeta inap lukim mirakel em i wokim long putim klaut na paia antap long haus lotu sel. (Ritim Kisim Bek 40:38.) Taim klaut i stat long muv i go long nupela daireksen, ol lain em ol i stap longwe tru long haus lotu sel, ol tu inap lukim dispela, olsem na ol i pekim ol kago bilong ol, rausim ol haus sel bilong ol, na bihainim lain Israel olgeta. (Nam. 9:​15-23) Olgeta inap harim bikpela krai bilong tupela silva trampet em ol i winim bilong toksave long olgeta manmeri olsem em taim bilong kirap na wokabaut i go. (Nam. 10:2) Em i klia tru olsem, maski ol lain i stap klostu long haus lotu sel, dispela i no makim olsem ol i pas gut moa wantaim Jehova winim ol lain i stap longwe long haus lotu sel, nogat. Olgeta manmeri insait long nupela lain Israel em Jehova i kamapim inap stap olsem gest bilong em, na ol inap bilip tru olsem em bai stiaim ol na lukautim ol. Olsem tasol, maski yumi stap long wanem hap bilong graun long nau, yumi ken kisim helpim long pasin laikim bilong Jehova, na pasin bilong em long tingim na lukautim yumi.

JEHOVA I MEKIM WANKAIN PASIN LONG OL MAN LONG NAU

13. Wanem wanpela rot Jehova i soim olsem em i save mekim wankain pasin long lain bilong em long nau?

¹³ Long nau, sampela lain bilong God i stap klostu long wol hetkota o wanpela brens ofis bilong ol Witnes Bilong Jehova. Ol narapela i mekim wok long ol dispela hap. Olsem na ol dispela bratasista inap insait long planti wok i kamap long ol dispela hap na ol inap bung wantaim ol lain i go pas long mekim ol wok. Sampela i mekim wok olsem ol wasman sekit o ol i mekim ol narapela wok long spesel fultaim sevis. Sapos yu wanpela bilong ol bratasista i no stap klostu long ol dispela hap o i no mekim ol dispela wok, yu ken save tru olsem Jehova i laikim olgeta gest bilong em. Na em i save tingim tru olgeta wan wan bilong ol. (1 Pita 5:7) Olgeta wokman bilong God i save kisim ol tok bilong strongim bilip bilong ol, stiaim ol, na lukautim ol.

14. Wanem narapela rot Jehova i soim olsem em i save mekim wankain pasin long olgeta man?

¹⁴ Jehova i opim rot na bai ol man long olgeta hap bilong graun i ken ritim Baibel, na dispela em narapela rot Jehova i soim olsem em i save mekim wankain pasin long olgeta man. Long bipo, ol i bin raitim Ol Rait Holi long 3-pela tokples, em tokples Hibru, Aram, na Grik. Yu ting ol lain em ol inap ritim Baibel long ol dispela tokples bilong bipo, ol i pas gut moa wantaim Jehova winim ol lain em ol i no inap ritim Baibel long ol dispela tokples? Nogat, i no olsem.—Mat. 11:25.

15. Jehova i bin mekim wanem samting moa bilong soim olsem em i save mekim wankain pasin long olgeta man? (Lukim tu piksa.)

¹⁵ Jehova i orait long yumi, em i no bikos yumi bin go long bikpela skul o yumi save long ol tokples bilong bipo em ol i bin raitim Baibel long en, nogat. Jehova i opim rot na bai ol manmeri long olgeta hap bilong graun i ken kisim skul long savetingting bilong em, dispela i makim ol man i bin go long bikpela skul na ol man i no bin go long bikpela skul. Ol i bin tanim tok bilong em long Baibel i go long planti tausen tokples, olsem na ol manmeri long olgeta hap bilong graun i ken kisim helpim i kam long en na kisim save long hau ol i ken kamap ol pren bilong em.—2 Tim. 3:​16, 17.

STAP YET OLSEM MAN JEHOVA I LAIKIM

16. Olsem Aposel 10:​34, 35 i kamapim, yumi ken mekim wanem na bai Jehova i laikim yumi na yumi stap yet olsem ol gest bilong em?

¹⁶ Em gutpela blesing tru long Jehova i welkamim yumi long stap olsem ol gest long haus sel bilong em. Olsem Papa bilong haus, em i gat gutpela pasin, pasin laikim, na em i save mekim gut long yumi. Na moa yet, em i save mekim wankain pasin long yumi olgeta, em i welkamim yumi maski yumi stap long wanem hap, wanem bekgraun yumi gat, ediukesen, skin kala, traib, krismas, o yumi man o meri. Maski i olsem, Jehova i save orait tasol long ol man i bihainim ol lo bilong em na bai ol i ken stap olsem ol gest bilong em.—Ritim Aposel 10:​34, 35.

17. Long atikol i kamap bihain, yumi bai stori long wanem samting?

¹⁷ Olsem Buk Song 15:1 i kamapim, Devit i askim olsem: “Jehova, husat inap i stap long haus sel bilong yu? Na husat inap i stap long maunten holi bilong yu?” God i kirapim Devit long bekim ol dispela askim. Atikol i kamap bihain bai stori long sampela samting yumi mas mekim na bai Jehova i orait long yumi stap yet olsem ol gest bilong em.