Ol i Brukim Wara Jordan

LUKIM! Ol Israel i brukim wara Jordan! Tasol wara i stap we? Em taim bilong bikpela ren, olsem na sampela minit paslain, wara i bin pulap tru. Tasol nau olgeta wara i no stap! Na ol Israel i wokabaut long graun i drai olsem ol i bin mekim long solwara Retsi! Olgeta wara i go we? Orait, nau yumi ken stori.

Taim ol Israel i redi long brukim wara Jordan, Jehova i tokim Josua long givim dispela tok long ol manmeri: ‘Ol pris i mas kisim bokis kontrak na go pas long yumi. Taim ol i putim lek i go insait long wara Jordan, wara bai i no inap ran moa.’

Olsem na ol pris i kisim bokis kontrak, na ol i karim i go pas long ol manmeri. Taim ol i kamap long wara Jordan, ol i wokabaut i go insait stret long wara. Wara i spit tru na i daun. Tasol taim lek bilong ol i tatsim wara, kwiktaim wara i no ran moa! Em wanpela mirakel! Jehova i pasim wara antap. Olsem na i no longtaim na wara i drai olgeta!

Ol pris em ol i karim bokis kontrak, ol i wokabaut i go long namel stret bilong dispela wara i drai pinis. Yu inap lukim ol long piksa? Taim ol i sanap i stap, olgeta Israel i wokabaut long graun i drai na go long hapsait bilong wara Jordan.

Taim olgeta i go kamap pinis long hapsait, Jehova i tokim Josua long tokim 12-pela strongpela man olsem: ‘Go long hap ol pris wantaim bokis kontrak i sanap long en. Kisim 12-pela ston, na hipim long ples yupela bai slip long en nau long nait. Na bihain, taim ol pikinini i askim yupela long ol dispela ston i makim wanem samting, orait yupela i mas tokim ol olsem wara i no ran moa taim ol i kisim bokis kontrak bilong Jehova i go long hapsait bilong wara Jordan. Ol dispela ston bai helpim yupela long tingim gen dispela mirakel!’ Na tu, Josua i hipim 12-pela ston long dispela hap ol pris i bin sanap long en.

Bihain Josua i tokim ol pris i karim bokis kontrak: ‘Lusim wara Jordan na kam long hapsait.’ Taim ol i mekim olsem, kwiktaim wara i stat long ran gen.